Azərbaycan Respublikasının Əmək və Əhalinin Sosial Müdafiəsi naziri Fizuli Ələkbərovla ölkədə səfərdə olan Qırğızıstan Respublikasının gənclər, əmək və məşğulluq naziri Aliyasbek Alımkulov arasında görüş olub. SİA-nın xəbərinə görə, respublikada sosial-iqtisadi inkişaf sahəsində əldə olunan uğurlar barədə ətraflı məlumat verən nazir Fizuli Ələkbərov Azərbaycan Prezidenti cənab İlham Əliyevin düzgün düşünülmüş və zamanın çağırışlarına uyğun siyasəti sayəsində ölkəmizin hələ 2009-cu ildə keçid iqtisadiyyatı dövrünü başa vuraraq keyfiyyətcə yeni tərəqqi mərhələsinə qədəm qoyduğunu və inkişaf tempinə görə dünyanın lider ölkəsinə çevrildiyini bildirib.
Ötən il də Azərbaycanda növbəti uğurlara imza atıldığını, respublikada iqtisadi artımın 0,1 faiz, o cümlədən qeyri-neft sektorunda 9,4 faiz, qeyri-neft sənayesində isə 11,1 faiz təşkil etdiyini, əhalinin pul gəlirlərinin 19,6 faiz artaraq 7,9 faizlik inflyasiya göstəricisini 2,5 dəfə üstələdiyini deyən nazir Fizuli Ələkbərov sosialyönümlü dövlətin yaradılmasının dövlət başçısının mühüm məqsədlərindən biri olduğunu vurğulayıb. Qeyd olunub ki, Cənubi Qafqaz iqtisadiyyatında 80 faizdən çox paya malik olan ölkəmizdə son 8 ildə yaradılan iş yerlərinin sayı bir milyonu ötməklə, işsizliyin səviyyəsi 5,4 faizə, yoxsulluq səviyyəsi isə 5,2 dəfə azalaraq 7,6 faizə düşüb.
Aztəminatlı vətəndaşların sosial müdafiəsinin gücləndirilməsi istiqamətində görülən işlərdən söz açılmaqla, aktiv sosial müdafiə tədbirlərinə xüsusi önəm verildiyi və bu sahədə ölkəmizin malik olduğu təcrübə barədə məlumatlar diqqətə çatdırılıb. Bildirilib ki, eyni zamanda, mötəbər beynəlxalq qurumlarla, ayrı-ayrı ölkələrlə əməkdaşlıq əlaqələri daim gücləndirilir. Orta Asiyanın qədim tarixə və zəngin mədəni irsə malik xalqlarından biri olan qırğızlarla azərbaycanlılar arasında ortaq milli-mədəni dəyərlərin, iki ölkə arasında qarşılıqlı etimad və anlaşma mühitinin olduğu, ənənəvi dostluq və əməkdaşlıq əlaqələrinin davam etdirildiyi vurğulanıb. Nazir Fizuli Ələkbərov Qırğızıstanla eyni zamanda əmək, məşğulluq və sosial müdafiə sahəsində əməkdaşlığın inkişafına ölkəmizin daim hazır olduğunu, bunun üçün nazirlik tərəfindən bütün lazımı şəraitin yaradılacağını deyərək, bu görüşün əməkdaşlığın inkişafı üçün uğurlu bir addım olacağına əminliyini ifadə edib.
Səmimi qarşılanmaya görə minnətdarlığını ifadə edən nazir Aliyasbek Alımkulov davamlı tərəqqi proseslərinin həyata keçirildiyi, sosial-iqtisadi inkişaf modeli beynəlxalq aləmdə yüksək dəyərləndirilən Azərbaycanla əməkdaşlıq əlaqələrinin inkişafına Qırğızıstan hökuməti tərəfindən xüsusi diqqət yetirildiyini qeyd edib. Nazir Azərbaycanda eyni zamanda sosial inkişaf istiqamətində məqsədyönlü islahatların həyata keçirildiyini və əhalinin sosial müdafiəsi sahəsində mühüm uğurların əldə edildiyini deyib. Azərbaycanın sosial-iqtisadi inkişaf təcrübəsinin ölkəsi üçün çox dəyərli olduğunu bildirən Aliyasbek Alımkulov Qırğızıstan hökumətinin Azərbaycanın malik olduğu bu təcrübəsindən faydalanmağa xüsusi önəm verdiyini və iki ölkə arasında əmək, məşğulluq və sosial müdafiə sahəsində səmərəli təcrübə mübadilələrinin aparılması üçün yaranan imkanlardan ölkəsinin daim səmərəli şəkildə yararlanacağını vurğulayıb.
Bütün xəbərlər Facebook səhifəmizdə
USD
EUR
GBP
RUB