Fevralın 1-də Milli
Məclisdə təmsil olunan siyasi partiyaların rəhbərləri AŞPA Monitorinq
Komitəsinin ölkəmizdə səfərdə olan nümayəndə heyəti ilə görüşüblər. Milli Məclisin mətbuat xidmətindən SİA-ya verilən xəbərə görə, nümayəndə
heyətinə Monitorinq Komitəsinin həmməruzəçiləri Pedro Aqramunt Font de Mora ilə
Cozef Debono Qrex və Monitorinq Komitəsi katibliyi rəhbərinin müavini xanım
Aqnieşka Naçilo daxil idi.
Görüşü parlamentdəki hakim partiyanın nümayəndəsi, YAP icra katibinin müavini
Mübariz Qurbanlı açaraq ölkəmizin beynəlxalq təşkilatlarla əlaqələrə, o
cümlədən AŞPA ilə əməkdaşlığa xüsusi önəm verdiyini deyib. Milli Məclisdə 11
siyasi partiyanın təmsil olunduğunu bildirdi və partiya rəhbərlərini qonaqlara
təqdim edib.
Sonra Ümid Partiyasının sədri İqbal Ağazadə siyasətlə bağlı bir sıra
məsələlər və qanunlar barədə fikirlərini bölüşüb. "Siyasi partiyalar haqqında"
qanunun yenilənməsinə ehtiyac olduğunu vurğulayıb, "Diffamasiya haqqında" qanun
qəbul edilməsini vacib saydığını bildirib.
Ana Vətən Partiyasının sədri Fəzail Ağamalı ölkəmizdə fakt-araşdırıcı missiya
həyata keçirən monitorinq qrupunun obyektivliyə söykənəcəyinə ümid ifadə
edib.
Sosial Rifah Partiyasının sədri Xanhüseyn Kazımlı deyib ki, monitorinqlərdən
Azərbaycanın haqq səsinin dünyaya çatdırılmasını gözləyirik. Nə üçün Fransa
Senatı 100 il öncə baş verdiyi iddia edilən qondarma "erməni soyqırımı"na
münasibət bildirir, amma son onilliklərdə Azərbaycan torpaqlarını işğal etmiş
Ermənistan haqqında qəti mövqe irəli sürülmür?
Ədalət Partiyasının sədri İlyas İsmayılov Avropa Şurasının üzvü olan Fransa,
Slovakiya və İsveçdə insan haqlarını pozan qanunların qəbul edildiyini, hətta
İsveçdə bu yöndə məhkəmə təcrübəsinin də olduğunu vurğulayaraq Avropa
Şurasının bu məsələlərə biganə qaldığını önə çəkib. Xatırladıb ki, fikir və
düşüncəsinə görə insanların təqib olunduğu orta əsrlərdə Fransa, İngiltərə,
İtaliya və Almaniyanın fədakar ziyalıları buna qarşı çıxmışdılar və
nəticədə Avropa qanunvericiliyində insan haqlarının qorunması ilə bağlı irəliyə
doğru addım atılmışdı. İndi isə əks proses gedir.
Böyük Quruluş Partiyasının sədri Fazil Mustafa və Bütöv Azərbaycan Xalq Cəbhəsi
Partiyasının sədri Qüdrət Həsənquliyev fikirlərini bölüşərkən parlament
rəhbərliyində müxalifətin təmsil olunmasını zəruri saydıqlarını qonaqların
nəzərinə çatdırıblar.
Milli Dirçəliş Hərəkatı Partiyasının sədri Fərəc Quliyev qonaqların diqqətini
doğma yurdlarından zorla köçürülmüş 1 milyon Azərbaycan qaçqın və köçkünlərinin
mülkiyyət hüquqları məsələsinə yönəldib, monitorinq qrupunun bu dəfəki
məruzələrində obyektiv həqiqətləri, o cümlədən deyilən məsələni
işıqlandırmasının arzu olunduğunu bildirib.
Siyasi partiya rəhbəri olan deputatların hamısının çıxışında bir fikir xüsusi
vurğulanıb ki, Azərbaycandakı bütün siyasi partiyalar Dağlıq Qarabağ
məsələsində yekdil mövqedədirlər, bu məsələdə iqtidarla müxalifət arasında
fikir ayrılığı yoxdur.
Görüşdə Monitorinq Komitəsinin həmməruzəçisi Pedro Aqramunt Font de
Moranı maraqlandıran suallara aydınlıq gətirilib.
Bütün xəbərlər Facebook səhifəmizdə
USD
EUR
GBP
RUB