Əmlak Məsələləri Dövlət Komitəsi tərəfindən daşınmaz əmlaka dair hüquqların qeydiyyatının sadələşdirilməsi, bu prosesdə süni maneələrin aradan qaldırılması ölkə ərazisində daşınmaz əmlakın qeydiyyatının kəskin artmasına səbəb olub. 2011-ci ilin ilk 11 ayında Azərbaycanda daşınmaz əmlakın qeydiyyatı ötən ilin eyni dövrünə nisbətən 1,5 dəfə artıb.
Beləliklə, 2011-ci ilin noyabr ayında Azərbaycanda 11 454 əmlak üzərində mülkiyyət hüququ qeydə alınıb ki, bu ötən ilin noyabrına nisbətən 70,0 % artıqdır. Noyabrda aparılan qeydiyyatın 3 637-si ilkin (31,8%), 7 817-i (68,2%) təkrar qeydiyyata aiddir. Ötən ilin noyabrına nisbətən ilkin qeydiyyat 87%, təkrar qeydiyyat isə 63% artıb.
Noyabr ayında 10 476 əmlaka texniki pasport, 9 201 müayinə aktı tərtib edilib, 115 yüklülük, 1 500 ipoteka qeydə alınıb. Ötən ay məhdudlaşdırmaya dair 6 912 arayış, əhaliyə xidmətlə bağlı isə 1 236 müxtəlif arayışlar verilib. Ötən ilin noyabrına nisbətən texniki pasportlar 80%, yüklülük 2,1 dəfə, müayinə aktları 83%, məhdudlaşdırmaya dair arayışlar 46% artıb. (Cədvəl 1.).
Noyabrda mülkiyyət hüquqlarının qeydiyyatı aparılan əmlaklardan 2395-i fərdi yaşayış və bağ evi, 4031-i mənzil, 4319-u torpaq sahəsi, 291-i qeyri-yaşayış binası, 305-i qeyri-yaşayış sahəsi, 59-u əmlak kompleksi, 50-si çoxillik əkmə, 4-ü isə çoxmərtəbəli yaşayış binası olub.
Bu ilin əvvəlki aylarında olduğu kimi, noyabrda əmlakın qeydiyyatı ötən ilin eyni dövrünün göstəricilərini kəskin şəkildə üstələyir. Bəzi əmlak növləri üzrə qeydiyyatın artımı 2 dəfədən çox olub.
Ötən ilin noyabrına nisbətən qeyri-yaşayış sahələrinin qeydiyyatı 2,3 dəfə, qeyri-yaşayış binalarında 2 dəfə, torpaq sahələrində 91%, fərdi yaşayış və bağ evlərinin qeydiyyatı 70%, mənzillərin özəlləşdirilməsi 50% artıb, çoxillik əkmələrin qeydiyyatı 7,4% azalыб (Cədvəl 2.).
Ümumilikdə, 2011-ci ilin ilk 11 ayında ölkədə 134 minə yaxın əmlaka aid hüquqlar dövlət qeydiyyatına alınıb. Bu ötən ilin eyni dövrünə nisbətən 55,3% artıqdır. Qeydiyyatdan keçən əmlakın 48 288-i (36,1%) ilkin, 85 553-ü (63,9%) təkrar qeydiyyatdan keçib. DƏDRX-in məlumatlarına görə, ötən ilə nisbətən ilkin qeydiyyat 83,2%, təkrar qeydiyyat 43% artıb.
Hesabat dövründə komitənin daşınmaz əmlak üzərində qeydiyyatla bağlı göstərdiyi xidmətlərin demək olar ki, bütün növləri üzrə ötən ilə nisbətən ciddi artım qeydə alınıb. 2011-ci ilin yanvar-noyabr aylarında tərtib olunan texniki pasportların sayı ötən ilin eyni dövrünə nisbətən 62%, yüklülük 2,9 dəfə, məhdudlaşdırmaya dair arayışlar 50%, müayinə aktı 71% artıb, ipoteka qeydiyyatı 1,7%, əhaliyə xidmətlə bağlı müxtəlif arayışlar 3,5% azalıb. (Cədvəl 3.)
Mülkiyyət hüquqlarının qeydiyyatı aparılan əmlaklardan 29 763-ü fərdi yaşayış və bağ evi, 48 356-ı mənzil, 47 404-ü torpaq sahəsi, 3 894-ü qeyri-yaşayış binası, 2 866-sı qeyri-yaşayış sahəsi, 797-si əmlak kompleksi, 727-si çoxillik əkmə, 34-ü isə çoxmərtəbəli yaşayış binaları olub.
Yanvar-noyabr aylarında əmlakın qeydiyyatında regionların payı 62,5% təşkil edib. Fərdi yaşayış evi, torpaq sahələri, qeyri-yaşayış binaları və əmlak kompleksləri üzrə əməliyyatların böyük hissəsi regionlarda aparılır. Yanvar-noyabr aylarında regionlarda qeydiyyatdan keçən çoxmərtəbəli binaların sayı Bakıdakından artıq olub (34 binadan 15-i regionlarda qeydə alınıb). Əvəzində mənzillərin özəlləşdirilməsi və qeyri-yaşayış sahələrinin qeydiyyatının əsas hissəsi Bakının payına düşür (Cədvəl 4.)
2011-ci ilin ilk 11 ayında verilən texniki pasportların 69%-i, ipoteka müqavilələrinin 53,9%-i, məhdudiyyət arayışlarının 70,4%-i, əhaliyə xidmətlə bağlı arayışların 65,4%-i, tərtib edilən müayinə aktlarının 75,6%-i regionların payına düşür.
Yanvar-noyabr aylarında Xidmətin 18 ərazi idarəsinin hamısında daşınmaz əmlakın qeydiyyatının artımı müşahidə edilib. Regionlarda əmlakın qeydiyyatı daha çox artıb. Belə ki, ötən ilin eyni dövrünə nisbətən Bakıda əmlakın qeydiyyatı 36,8% artdığı halda, regionlarda artım 68,9% təşkil edib. Ötən ilin eyni dövrünə nisbətən yanvar-noyabr aylarında ən çox artım Beyləqan (2,3 dəfə), Şamaxı (2,2 dəfə), Qəbələdə (2,2 dəfə) və Tovuzda (2 dəfə) qeydə alınıb (Cədvəl 5.).
2011-ci ilin yanvar-noyabr aylarında ölkə üzrə 15 940 mənzil özəlləşdirilib. Ötən ilin müvafiq dövrünə nisbətən özəlləşdirilmiş mənzillərin sayı 71,9% artıb. Ümumilikdə özəlləşdirmə başlayandan 2011-ci il dekabrın 1-dək ölkə üzrə 466 806 mənzil özəlləşdirilib.
Bütün xəbərlər Facebook səhifəmizdə
USD
EUR
GBP
RUB