Əli Həsənov: \"Ötən il ərzində 2120 ailənin – 10 600 nəfər məcburi köçkünün mənzil-məişət şəraiti yaxşılaşdırılıb\" - MÖVQE
Son 20 ildə qaçqın və məcburi köçkünlərin sosial problemlərinin həllinə
3,7 milyard manat və ya 4,6 milyard ABŞ dolları məbləğində vəsait sərf olunub.
SİA-nın xəbərinə görə, bunu baş nazirin müavini, Qaçqınların və Məcburi Köçkünlərin İşləri
üzrə Dövlət Komitəsinin sədri Əli Həsənov
Nazirlər Kabinetinin iclasında çıxışı zamanı deyib. O bildirib ki, bunun 2,7 milyard ABŞ dolları dövlət
büdcəsinin, 1 milyardı Dövlət Neft Fondunun və 900 milyonu isə ölkəmizdə
fəaliyyət göstərən beynəlxalq humanitar təşkilatların vəsaitidir.
O cümlədən, 2011-ci ildə 500 milyon ABŞ dolları
məbləğində vəsait xərclənmişdir. Həmin vəsaitin 295 milyonu büdcə, 175 milyonu
Dövlət Neft Fondunun və 30 milyonu isə beynəlxalq humanitar təşkilatların
vəsaitidir.
Bu vəsaitin 60 faizi son 8 ildə - sizin prezidentlik fəaliyyətiniz
dövründə istifadə olunmuşdur.
İndiyədək Dövlət Neft Fondundan və digər
mənbələrdən ayrılmış vəsaitlər hesabına 70 müasir, bütün sosial-texniki
infrastruktura malik qəsəbələr salınmış, 22 min ailənin 120 min nəfərədək
qaçqın və məcburi köçkünün mənzil-məişət şəraiti yaxşılaşdırılıb.O cümlədən, 2011-ci ildə 7 fərman və
sərəncam imzalanıb, Nazirlər Kabineti 12 qərar və sərəncam, Milli Məclis isə 1
qanun qəbul edib.
2011-ci ildə
Ağcabədi rayonu ərazisində 560 məcburi köçkün ailəsinə beşmərtəbəli 10 yaşayış
binasının və rayonun Taxtakörpü ərazisində Laçın rayonundan olan 552 məcburi
köçkün ailəsi üçün yeni qəsəbənin, Goranboy rayonu ərazisində 525 ailəlik
beşmərtəbəli 9 yaşayış binasının, Heydər Əliyev Mərkəzinə yaxın yataqxanada çox
acınacaqlı vəziyyətdə məskunlaşmış məcburi köçkünlərə Sabunçu rayonunun Ramana
qəsəbəsində 80 mənzilli binanın tikintisi başa çatdırılıb.
Həmçinin Bakı şəhəri
ərazisində dövlət ehtiyacları ilə əlaqədar 406 məcburi köçkün ailəsinə Maliyyə
Nazirliyinin xətti ilə hazır mənzillər alınmaqla köçürülməsi təmin edilib.
"Naftalan şəhərinin sosial inkişafının sürətləndirilməsinə
dair əlavə tədbirlər haqqında" Sərəncamınızın icrası ilə əlaqədar Naftalan
şəhərindəki bütün məcburi köçkün ailələrinin Goranboy rayonu ərazisində
salınmış beşmərtəbəli 12 yaşayış binasından ibarət yeni məhəllədəki 690 mənzilə
köçürülməsi tamamilə başa çatdırılıb. Ötən il, eyni zamanda, investisiya vəsaiti hesabına
Füzuli rayonunun Haramı ərazisində 80 evin bərpası, Qazax rayonunda konserv
zavodu ərazisində müvəqqəti məskunlaşmış məcburi köçkünlər üçün 24 evin,
həmçinin Axıska türklərinə məxsus tikintisi yarımçıq qalmış 52 evin inşası başa
çatdırılmışdır. İndiyədək Axıska türklərinə məxsus 324 evin inşası başa
çatdırılmış və bundan sonra da bu layihə davam etdiriləcək.
Beləliklə, il ərzində 2120 ailənin – 10 600
nəfər məcburi köçkünün mənzil-məişət şəraiti yaxşılaşdırılıb.
Bütün xəbərlər Facebook səhifəmizdə
USD
EUR
GBP
RUB