“İnteqrasiya vasitəsilə əlillik haqqında stereotiplərin aradan qaldırılması” layihəsinin təqdimatı keçirilib- FOTO
Bu gün "Buta" Humanitar Uşaq Fondu 2011-ci ildə həyata keçirdiyi "İnteqrasiya vasitəsilə əlillik haqqında stereotiplərin aradan qaldırılması" adlı layihəsini təqdim edib.
SİA-nın məlumatına görə, 9 ay müddətində həyata keçirilən layihə çərçivəsində əlilliyi olan insanlar üçün mövcud olan xidmətlər haqqında məlumat toplamaq məqsədi ilə bu istiqamətdə işləyən QHT-lərlə görüşlər keçirilib.
Layihənin iştirakçısı Mətanət Quliyeva çıxışında bildirib ki, Azərbaycanda 480 mindən çox əlilliyi olan insan var ki, onların da 60 mini uşaqlardır: "Layihə çərçivəsində əlilliyi olan insanların mövcud vəziyyəti, onların bacarıqları, cəmiyyətin tələbatları araşdırılıb. Əgər əlil insanların ətrafında olan yaxın insanları da nəzərə alsaq əlilliklə bağlı problemlərlə üzləşənlərin sayı 1 milyonu keçir. Əlilliyin, yoxsulluq göstəricilərinə təsirini, təhsildən və səhiyyə vasitələrindən istifadəni məhdudlaşdırılmasını, həmçinin əlillərin ictimai ayrı-seçkiliyə məruz qaldıqlarını nəzərə alsaq, bu məsələnin mühümlüyünü də başa düşə bilərik".
"Buta" Humanitar Uşaq Fondunun rəhbəri Nazim İbadov əlillərin bəzi problemlərindən danışaraq o insanların daha çox əlil arabalarına ehtiyaclarının olduğunu vurğulayıb: "Azərbaycanda ən azı 40 min xüsusi arabalara ehtiyacı olan əlil var. Dövlət isə bu insanları yalnız ildə 1000 araba ilə təmin edə bilir. Nəzərə alsaq ki, bu arabalar da 3 ildən bir dəyişilməlidir, onda bu sahədəki problemlərin hansı səviyyədə olduğu aydın məsələdir".
Qeyd edək ki, layihə Avrasiya Əməkdaşlıq Fondunun maliyyə dəstəyi ilə həyata keçirilib.
Bütün xəbərlər Facebook səhifəmizdə
USD
EUR
GBP
RUB