İstehlakçıların dayanıqlı və keyfiyyətli elektrik enerjisi ilə təmin edilməsi məqsədilə yarımstansiyalarda, ötürücü qurğularda əsaslı və cari təmir işlərinin yerinə yetirilməsi və beləliklə də, itkilərin azaldılması energetiklərin ən mühüm vəzifələrindən biridir. Digər enerji obyektlərində olduğu kimi, "Mingəçevir Regional Elektrik Şəbəkəsi"nin (REŞ) də xidməti ərazilərində bu istiqamətdə müvafiq tədbirlər həyata keçirilir. "Mingəçevir", "Ağdam" və "Ağsu" elektrik şəbəkələri bu qəbildən olan enerji təsərrüfatlarındandır.
"Azərenerji" ASC-nin mətbuat xidmətindən SİA-ya daxil olan məlumata görə, "Mingəçevir" EŞ üzrə dayanıqlığın daha da artırmaq, uçota nəzarəti gücləndirmək məqsədilə bir sıra müxtəlif təyinatlı təmir-bərpa işləri yerinə yetirilib. Belə ki, 110 kilovoltluq "Şəhər" yarımstansiyasından qidalanan bir neçə hava xəttində cərəyan və gərginlik transformatorları, eyni zamanda hesabat sayğacları quraşdırılmış, 4,4 kilometr uzunluğunda EVX təmir edilmiş, 35 kV-lik "Karxana – 601" yarımstansiyasından çıxan 6 kV-lik 12 və 18 saylı HX-lərinin əlaqələndirilməsi üçün 200 metr uzunluğunda EVX çəkilmiş və bir neçə dayaq quraşdırılıb. Analoji yenidənqurma və müxtəlif təyinatlı təmir işləri 0,4 kV-lik elektrik verilişi xətlərində və transformator məntəqələrində də aparılıb. Ümumilikdə, 5,5 kilometr xətt təmir edilib.
Qeyd edək ki, avtomobil məktəbində yerləşən məcburi köçkünlərin də enerji təchizatı diqqət mərkəzində olub. Belə ki, burada daha effektiv enerji təminatı yaratmaq məqsədilə SİP kabel xətləri çəkilib. Bundan başqa, şəhərin A. Məmmədov küçəsi 7a, Nizami küçəsi 2 saylı binalara gedən 0,4 kV-lik, Sabir küçəsi 3 və 6 saylı binalara gedən 0,4 kV-lik naqillər yeni SİP kabelləri ilə əvəz edilib.
Qeyd edək ki, ümumilikdə 44 ədəd transformator məntəqəsində əsaslı və cari təmir işləri aparılıb. Səmərəliliyin daha da artırılması məqsədilə EŞ üzrə müxtəlif sayda 1 və 3 fazalı smart kart sayğacları quraşdırılıb.
"Mingəçevir REŞ"in xidməti dairəsinə məxsus olan "Ağdam" və "Ağsu" elektrik şəbəkələrində də analoji tədbirlər uğurla icra edilib.
Məsələn, "Ağdam" EŞ üzrə 10 kV-lik "Kanal" hava elektrik verilişi xətti üzrə və 35/10 kV-lik "Qərvənd", eynigərginlikli "Qaradağlı" yarımstansiyaları üzrə naqillərin və ağac dayaqların dəyişdirilməsini bu tədbirlər sırasına daxil etmək olar.
Müvafiq tədbirlər Xındırıstan, Qaradağlı, Quzanlı və Alıbəyli kəndlərini qidalandıran 0,4 EVX-lərdə və transformator məntəqələrində (TM) də aparılıb. Ümumilikdə, 600 metrdən artıq naqıl, 10-dan çox dayaq dəyişdirilmiş, 54 ədəd TM-də müxtəlif təyinatlı təmir işləri görülmüş və 5 ədəd zədələnmiş transformator təmir edilərək şəbəkəyə qoşulub. Onu da qeyd edək ki, "Ağdam" EŞ üzrə quraşdırılımış yeni sayğacların sayı 428-i ötüb. Dəyişdirilmiş sayğacların sayı isə 1470 ədədə yaxındır.
Ağsu şəhərinin enerji təminatında xüsusi rol oynayan eyni adlı elektrik şəbəkəsində də bir sıra sistem əhəmiyyətli təmir-bərpa işləri aparılıb. Enerji obyektindən bildirilir ki, 110/35/10 kV-lik "Ağsu" yarımstansiyasından çıxan "Cəfərli", "Qaravəlli", "İlxıçı", "Ləngəbiz" və "Ərəbmehdibəyli" hava elektrik verilişi xətlərində də uğurlu yenidənqurma işləri aparılmış, enerji ötürücülərin dayanıqlığı daha da artırılıb. O cümlədən, 22 ədəd dayaq və 3,8 kilometrə yaxın naqil dəyişdirilib.
Bütün xəbərlər Facebook səhifəmizdə
USD
EUR
GBP
RUB