Milli Məclisin bu gün keçirilən iclasında dövlət büdcəsi layihəsinin müzakirəsi davam etdirilib. SİA-nın xəbərinə görə, müzakirələr zamanı çıxış edən İqbal Ağazadə qeyd edib ki, milli strategiyaya əsaslanan büdcə neftdən gələn gəlirlərdən formalaşmamalıdır. Neftdən asılılıq ölkəni iqtisadi böhrana sala bilər. Dövlət büdcəsindən ayrılan investisiyalar düzgün xərclənmir. 2007-ci ildən bu yana 33,3 milyard investisiya qoyulub. Bunun da böyük hissəsi tikinti və abadlıq işlərinə sərf olunub. Sırf 9 milyarddan çox pul tikinti işlərinə xərclənib.
Abel Məhərrəmov isə təklif edib ki, elm və təhsil işçilərinin sosial məsələlərinə yenidən baxılmalıdır: "Neft Fondundan transfer artırılıb elm və təhsilin inkişafına sərf olunmalıdır. Elm adamları dedikdə yalnız Elmlər Akademiyasının əməkdaşları nəzərdə tutulur. Halbuki ölkənin müxtəlif ali təhsil ocaqlarında 1800-dən çox professor çalışır. Büdcə layihəsində ali təhsil müəssisələri də nəzərə alınmalıdır".
Büdcə layihəsinə səs verməyəcəyini deyən Qüdrət Həsənquliyev isə büdcə gəlirlərinin strukturuna nəzər yetirdikdə qeyri-neft sektorunun zəif inkişaf etdiyini bildirib. Millət vəkili təklif edib ki, Naxçıvan Muxtar Respublikasının inkişafı ilə bağlı ayrıca dövlət proqramı hazırlansın, eyni zamanda Naxçıvana dəmir yolunun çəkilişi prosesi sürətlənməlidir.
Bütün xəbərlər Facebook səhifəmizdə
USD
EUR
GBP
RUB
