Kanalizasiyalar yenə yağışdan üzü qara çıxdı

1 Oktyabr 2011 14:12 | 1 149

Səhər saatlarından paytaxtda yağan leysan xarakterli yağış bir daha sübut etdi ki, şəhər yağıntıya, ümumiyyətlə qışa hazır deyil. Oxşar problemlər hər il qar yağanda da özünü göstərir.
Bu cür yağıntı bir neçə gün davam edərsə, paytaxtda vəziyyətin tamamilə iflic ola biləcəyini təsəvvür etmək o qədər də çətin deyil.

Kanalizasiya sisteminin işləməməsi və bu istiqamətdə heç bir tədbirin görülməməsi isə təəccüb doğurmaya bilmir. "Azərsu" SC-dən verilən məlumata görə, paytaxtda ümumi uzunluğu təxminən 1300 km.-ə yaxın olan yağış kanalizasiya kollektoru şəbəkəsi əsasən, şəhərin mərkəzi hissəsini əhatə edir. Onların yeniləşdirilməsi üçün ümumi uzunluğu 200 km-ə qədər olan müxtəlif diametrli yeni yağış kanalizasiya kollektorları tikilməlidir. Bu işlərin görülməsi üçün isə 84 milyon manat vəsait tələb olunur.

Qurumdan o da bildirildi ki, paytaxtın kanalizasiya sisteminin əsas problemlərindən biri şəhər ərazisinin 30%-nin kanalizasiya sisteminin olmaması, regional ötürücü nasos stansiyalarının istismar müddətlərinin keçməsi ilə əlaqədar məhsuldarlığının azalması, yağış kanalizasiyası ilə təsərrüfat-məişət kanalizasiyasının bir-biri ilə əlaqəli olması, təmizləyici qurğuların məhsuldarlığının az olmasıdır.

Ekspertlər isə hesab edir ki, şəhərdə kanalizasiya problemini qeyri-qanuni yaşayış sahələri yaradır. Səbəb son illər salınmış qəsəbələrin kanalizasiya xətti düzgün hesablanmaması göstərilir. Bəzi ərazilərdə isə tamamilə kanalizasiya sistemi yoxdur. Şəhərin kənar hissələrində
gölməçələr bu üzdən yaranır.

Dövlət Şəhərsalma və Arxitektura Komitəsindən isə bildirildi ki, şəhərdə məişət tullantıları ilə bərabər yağış sularını aparan xüsusi xətlərin qurulması vacibdir ki, bu kimi problemlər olmasın. Bu normativ aktların Bakı şəhərinin Baş planını hazırlayarkən nəzərdə tutulub. Ancaq hazırda mövcud deyil. Həmin xətlər vasitəsi ilə yağıntı suları şəhərin relyefindən asılı olaraq müxtəlif zonalara, dənizə, çaylara axıdılmalı idi. Bakının mərkəzində olan, yağıntı sularını axıtmaq üçün nəzərdə tutulan kanalizasiya xətləri də işləməlidir. Ancaq şəhərin mərkəzi hissələrində əksər yollar yenidən təmir olunub. Bu zaman suyun axıdılması üçün yerlər nəzərə alınmayıb. Dəfələrlə bunlar vurğulansa da, hələ də aparılan təmir işlərində bu məsələlər öz əksini tapmayıb".

Bəzi mütəxəssislər isə hesab edir ki, Bakının çox hissəsi sularına qərq olmasının səbəbi küləklər şəhəri olan Bakında küləyin, qumun, torpağın "lük"lara doldurmasıdır ki, bu da yağışın axıdılmasına mane olur. Qusurlar sırasında Bakının vahid kanalizasiya sisteminin olmaması, avtomobil yolları, körpülərin, hündürmərtəbəli binaların tikilişi zamanı ərazinin kanalizasiya sistemlərinin imkanları nəzərə alınmaması da göstərilir.