Dayanıqlı inkişaf və sülhün təmin edilməsi üçün sağlam, təhsilli və mədəni gənc nəslin formalaşması çox vacibdir. Məhz buna görə BMT hər ilin sentyabr ayının 21-ni Beynəlxalq Sülh Günü kimi qeyd edir. Məhz sentyabr ayının bu günü insanlara, böyüməkdə olan nəslə, təbiətə məhəbbətin aşılanması üçün bir sıra tədbirlər keçirilir.
Bütün bunları və ətraf mühitə dair digər bilgilərin, ekoloji məsuliyyət anlayışının, canlı aləmlə insanın sıx bağlı olması hissinin formalaşdırılmasının sülh üçün əsas komponentlərdən olduğunu nəzərə alaraq "ELS" Müstəqil Araşdırmalar Mərkəzi və Azərbaycan Respublikası Dövlət Neft Şirkətinin Ekologiya İdarəsi Bakı şəhərinin 1 və 2 saylı uşaq evlərinin şagirdləri ilə birgə Beynəlxalq Sülh Gününü qeyd edib.
SİA-nın verdiyi məlumata görə, tədbirdə Dövlət Neft Şirkətinin
"Ekoloji təbliğat və sosial məsələlər idarəsi" nin şöbə rəisi Füzuli Haciyev,
BMT-nin YUNESKO üzrə milli komisiyasının sədri Ramil Əliyev, BMT-nin "Gənclərin
və yeniyetmələrin inkişaf proqramı"nın rəhbəri Natiq Umarov, Mədəniyyət
nazirliyinin nümayəndəsi Səid Haciyev, Təhsil Nazirliyini nümayəndəsi Şərafət
Şirinli və Ekologiya və Təbii Sərvətlər Nazirliyinin nümayəndələri, media işçiləri də iştirak
edirdi.
Tədbir həmin uşaq evlərinin 7-9 sinif şagirdlərinin
yeni açılmış Ekoloji Parka ekskursiyası ilə başladı. Məqsəd şagirdləri yeni
açılmış parkla tanış etmək və onlarda ətraf aləmə sevgini aşılamaq üçün həmin
parkda ağac əkmə mərasimini keçirmək idi. Tədbiri ilk öncə Yaşıllaşdırma
Departamentinin sədri Sadiq Kərimov açdı və jurnalistlərin suallarını
cavablandırdı:
- Parkın elektrik enerjisinə olan tələbatının azı
50 faizi alternativ enerji mənbələri hesabına təmin olunur. Həmçinin, parkın ərazisində
hər biri 10 kilovat-saat enerji hasil etmək üçün 4 külək generatoru, eləcə də
ümumi gücü 20 kilovat-saat olan günəş batareyaları quraşdırılıb. Alternativ
enerji mənbələrinin hesabına hasil olunacaq elektrik enerjisinin ümumi həcmi 60
kilovat-saat təşkil edir. Parkın ərazisində ARDNŞ-nin struktur bölmələrinin, eləcə
də digər dövlət idarələrinin, o cümlədən Azərbaycanın Təhsil Nazirliyinin ekoloji mərkəzi var. Habelə ARDNŞ parkın ərazisində
öz struktur bölmələri üçün şitillər yetişdirmək fikrindədir. Ekoloji Park 9,3
hektar sahədə yaradılıb.
- Necə düşünürsüz, şagridlərin bu parka ekskursiyası
nə dərəcədə əhəmiyyətlidir?
- Ümumiyyətlə, bu parkın yaranmasının əsas məqsədi
cəmiyyət və ekologiyanın vəhdətini yaratmaqdır. İnsanlar bilsin ki,
hər çirkabın içində belə bir gözəllik yaratmaq olar. Bu ərazinin ilkin vəziyyətini
görən insanlar, o vaxtlarda burada işləyən neftçilər parkın indiki vəziyyətini
gördükdə çox təəccüblənirlər. İnsan əməyi buranı bir cənnətə çevirib.
Şagirdlərin parka ekskursiyasının ardından ağac əkmə
mərasimi başlandı. Çox böyük həvəslə fidanları torpağa basdıran balaca fidanlar
ağac əkməyi sevdiklərini və bunu öz uşaq evlərinin həyətlərində daima etdiklərini
söylədilər: "Biz öz həyətimizdəki ağaclara özümüz baxırıq. Onları suvarırıq, əhəngləyirik,
diblərini təmizləyirik".
Şagirdlərə ağac əkməkdə "ELS" Araşdırmalar Mərkəzinin
direktotu İradə Yaqubova da yardım etdi: "Uşaqların mənəvi durumunun yönləndiriliməsi
biz böyüklərin əlindədir. Onlar bizdən eşidir, görür və öyrənir".
Daha sonra tədbir konfrans zalında davam etdi.
Qonaqlar şagirdlərə Beynəlxalq Sülh Günü haqqında danışdılar. Tədbirin sonunda
şagridlərə "Ekoloji təbliğat və sosial məsələlər idarəsi" tərəfindən yemək süfrəsi
təşkil olundu. Hədiyyələr verildi.
Könül Yazar
Bütün xəbərlər Facebook səhifəmizdə
USD
EUR
GBP
RUB