Azərbaycan Respublikasının İnsan Hüquqları üzrə Müvəkkili Elmira Suleymanova ATƏT-in Azərbaycan nümayəndəliyinin yeni təyin olunmuş rəhbəri Koray Tarqay ilə görüşüb. SİA-nın xəbərinə görə, tanışlıq məqsədi daşıyan görüşdə bu qurumla Ombudsman təsisatının insan hüquqları sahəsində gələcək birgə əməkdaşlığının perspektivləri müzakirə olunub. Müvəkkil qonağı salamlayıb, yeni təyinatı münasibətilə təbrik edib və xoş arzularını bildirib. O, Türkiyədə ötən il keçirilən referendumda bu ölkənin Konstitusiyasına edilən dəyişikliklərdən birinin ilk dəfə Ombudsman İnstitutunun yaradılması ilə bağlı olduğunu, belə bir qurumun təşkilinin insan hüquqlarının daha səmərəli təmininə təkan verəcəyini və Azərbaycanla bu sahədə əməkdaşlıq üçün daha geniş imkanlar yaradacağını bildirib.
E.Süleymanova gələn il 10 yaşını qeyd edəcək Azərbaycan Ombudsman təsisatının fəaliyyət dövrü ərzində ATƏT-in Bakı Ofisi ilə sıx əməkdaşlıq qurduğunu, insan hüquqlarının təmin edilməsi sahəsində qarşılıqlı əlaqələrin faydalı olduğunu, hər iki tərəfin öz imkanlarından səmərəli istifadə etməklə birgə layihələr həyata keçirdiyini diqqətə çatdırıb. O, "Azərbaycan Respublikasının İnsan Hüquqları üzrə Müvəkkili (Ombudsman) haqqında" Konstitusiya Qanununa Müvəkkilin milli preventiv mexanizm kimi fəaliyyətinin tənzimlənməsi, eyni zamanda "İnformasiya əldə etmək haqqında" Azərbaycan Respublikası Qanununun tələblərinə nəzarətin həyata keçirilməsi üzrə əlavə və dəyişikliklər edildiyini bildirib.
Ombudsmana verilən yeni funksiyalarla əlaqədar olaraq təsisatın strukturunda dəyişikliklər aparılacağı nəzərə çatdırılıb. O, bununla əlaqədar olaraq, KİV nümayəndələri və informasiya sahibləri olan dövlət qurumları ilə məsləhətləşmələrin keçirildiyini, daha bir tədbirin QHT təmsilçiləri üçün təşkil ediləcəyini vurğulayıb.
Müvəkkil BMT-nin "İşgəncə və digər qəddar, qeyri-insani və ya ləyaqəti alçaldan rəftar və ya cəza əleyhinə" Konvensiyası üzrə Fakültativ Protokolunun Azərbaycanda tətbiqi və Milli Preventiv Mexanizmin fəaliyyətinə dair ATƏT-in Bakı Ofisi ilə birgə seminarların təşkil olunduğunu, tanınmış beynəlxalq ekspertlərin iştirakı ilə Ombudsman təsisatının əməkdaşları, o cümlədən Müvəkkilin regional mərkəzlərinin nümayəndələri üçün keçirilən treninqlər barədə ətraflı məlumat verib. O, həmçinin Ombudsmanın MPM qismində fəaliyyəti ilə bağlı hesabatın ingilis dilinə çevrilməsində və nəşr edilməsində ATƏT-in Bakı Ofisinin dəstəyini qeyd edib.
Ombudsman Avropa Şurasının və Avropa Birliyinin həyata keçirdiyi layihələrdə, o cümlədən Tvinninq və Şərq tərəfdaşlığı layihələrində Ombudsman təsisatının fəal iştirak etdiyini, bu əlaqələrin gələcəkdə daha da inkişaf etdiriləcəyini söyləyib. K.Targay böyük təcrübəyə malik olan Azərbaycan Ombudsmanı ilə əməkdaşlığın ATƏT-in Bakı Ofisinin fəaliyyətində geniş yer tutduğunu və insan hüquqları sahəsində bu qarşılıqlı əlaqələrin mühüm əhəmiyyət kəsb etdiyini diqqətə çatdırıb.
Bütün xəbərlər Facebook səhifəmizdə
USD
EUR
GBP
RUB