Avtomobilləri istər maye, istərsə də qaz kimi yanacaqlarla təmin edən yanacaqdoldurma məntəqələri "A", yəni partlayış kateqoriyalı ən təhlükəli obyektlər siyahısına daxildir.
Bu səbəbdən də yanacaqdoldurma məntəqələrinin təhlükəsizliyi hər zaman diqqət mərkəzində olmalıdır. Təəssüf ki, bir çox hallarda bu məqamlar unudulur. Nəticə isə böyük faciələrə səbəb olur.
Qeyd edək ki, bu obyektlər Nazirlər Kabineti tərəfindən xüsusi razılıq (lisenziya) verildikdən sonra fəaliyyətə başlayır. Məntəqələr məktəbəqədər uşaq müəssisələrindən, stasionar müalicə obyektlərindən, yaşayış, ictimai bina və qurğuların divarlarından ən azı 50 metr məsafədə tikilib-quraşdırılmalıdır. Bu məsafə yanacaq paylama kolonkalarından və yeraltı maye yanacaq saxlama çənlərindən hesablanmalıdır. Ancaq bu gün fəaliyyət göstərən bir çox yanacaqdoldurma məntəqələri var ki, bu tələblərə riayət olunmur və qanunvericiliyin tələbləri kobud şəkildə pozulur.
Hətta vəziyyət o həddə çatıb ki, real təhlükə mənbəyi olan yanacaqdoldurma məntəqələri yaşayış binalarına bitişik tikilib. Məsələn, Yasamal rayonu ərazisində yerləşən "Günəş petrol\" yanacaqdoldurma məntəqəsi ilə ətraf binalar arasında məsafə addımlarla ölçülə bilər.
Bir müddət əvvəl həmin yanacaqdoldurma məntəqələrinin sökülməsi məsələsi gündəmə gətirildi. Bildirilirdi ki, bu cür məntəqələrinin sayı dəqiqləşdirilərək aidiyyəti qurumlara məlumat veriləcək. Həmin qurumlar bu məsələ ilə bağlı müvafiq qərar qəbul ediləndən sonra təhlükəli hesab edilən yanacaqdoldurma məntəqələri söküləcək. Ancaq vədlər təsdiqini tapmayıb. Bu isə o deməkdir ki, bu cür yanacaqdoldurma məntəqələri təhlükə mənbəyi olaraq qalır və hər hansı bir ehtiyatsızlıq yüzlərlə insanın həyatına son qoya bilər.
Ötən gün Hacıqabul-Padar avtomobil yolunun kənarında baş verən partlayış bir daha yanacaqdoldurma məntəqələrinin real təhlükə mənbəyi olmasını sübut etdi. Baş verən faciə bir neçə insanın həyatına son qoydu.
FHN Dövlət Yanğın Nəzarəti Xidmətinin Yanğına qarşı təbliğat şöbəsinin inspektoru Elçin Xankişiyevin sözlərinə görə, yanacaqdoldurma məntəqələrində yanğın və partlayış təhlükəsinin olmaması üçün aşağıdakı qaydalara riayət olunmalıdır.
Təhlükəsizliyi təmin etmək məqsədilə yüksək gərginlikli, yəni 1000V və daha yuxarı gərginliyə malik elektrik hava xətlərindən yanacaqdoldurma məntəqələrinə qədər olan məsafə 10 metrdən az olmamalıdır. Gərginlik və ya digər parametrlərdən asılı olmayaraq yüksək gərginlikli elektrik hava xətlərinin yanacaqdoldurma məntəqələrinin üzərindən keçməsi qadağandır.
Yanacaqdoldurma məntəqələrinin qoruqların, təbii parkların, nəbatat bağlarının, dendroloji parkların və su qoruyucu zonaların ərazilərində, meşə torpaqları daxil olmaqla şəhərlərin yaşıllıq zonaları ərazisində, hidrometeoroloji stansiyaların mühafizə zolaqlarında, su təchizatı mənbələri və su kəməri qurğuları sahələrinin 1-ci sanitar mühafizə zolaqlarında, kurortların 1-ci sanitar mühafizə zolaqlarında, tarixi və mədəni abidələrin mühafizə zolaqlarında, sürüşmə, qruntların çökmə, sel axını və qar uçqunu zonalarında yerləşdirilməsi qadağandır.
Təcrübə və statistika göstərir ki, yanacaqdoldurma məntəqələrində baş verən hadisələr daha çox istismar qaydalarının pozulması nəticəsində meydana çıxır. Ona görə də yanacaqdoldurma məntəqələrində işə qəbul olunmuş hər bir əməkdaşın ümumi texniki, o cümlədən yanğın təhlükəsizliyi qaydalarını mükəmməl bilməsi çox vacibdir.
Yanacaqdoldurma məntəqələrində sutkalıq mühafizə təşkil edilməlidir. Yanacaqdoldurma məntəqələrində avtomobillərin təmiri üçün zərurət yaranarsa, bu iş paylayıcı kolonkalardan 25 metrdən az olmayan məsafədə həyata keçirilməlidir.
Yanacaqdoldurma məntəqələrində ilkin yanğınsöndürən alət və vasitələr daim normaya uyğun saxlanılmalıdır. Həmin ləvazimatlardan başqa məqsədlər üçün istifadə etmək olmaz.
Yanacaqdoldurma məntəqələrin ərazisi, xüsusən paylayıcı kolonkaların ətrafı daim təmiz saxlanılmalı, avtomobillərə yanacağın doldurulması zamanı neft məhsulları yerə tökülərsə, dərhal təmizlənməlidir. Sərnişin daşıyan avtomobilləri sərnişinlərlə birlikdə yanacaqdoldurma məntəqələrinin ərazisinə buraxmaq, xüsusən də yanacaq doldurmaq üçün qəbul etmək qadağandır. Yanacaq doldurarkən avtomobillərin mühərriki söndürülməlidir. Yanacaqdoldurma məntəqələrində xidmətçilərin geyimlərinin yanacağa bulaşmasına, yanacaqla kirlənməsinə yol vermək yanğın təhlükəsi yarada bilər. Partlayış, yanğın təhlükəli yüklər daşıyan avtomobillərin yüklə birlikdə yanacaqdoldurma məntəqələrinə daxil olması qadağan edilməlidir. Qığılcım söndürən qurğuları olmayan traktorların yanacaqdoldurma məntəqələrində yanacaqla təmin olunmasına icazə verilməməlidir.
Aidiyyəti olmayan təmir işlərinin yanacaqdoldurma məntəqələrində aparılması qadağandır.
Yanacaqdoldurma məntəqələrinə daxil olan və buradan çıxan avtomobillərin yolları biri-biri ilə kəsişməməli, hərəkətin sürəti 20 km/saatı keçməməlidir. Təhlükəsizlik məqsədilə yanacaqdoldurma məntəqələrinin müvafiq yerlərində yol-nəqliyyat nişanları qoyulmalıdır.
Yanacaqdoldurma məntəqələrində yeraltı və yerüstü yanacaqsaxlama çənlərində sızmanı nəzarətdə saxlayan avtomatik sistemin nəzarət lövhəsi fasiləsiz olaraq müşahidə altında saxlanılmalıdır. Yanacaqdoldurma məntəqələrinin ərazisində siqaret çəkilməsi qəti qadağan edilməli və bu ciddi nəzarətdə saxlanılmalıdır.
Yanacaqdoldurma məntəqələrində mobil telefonlardan istifadə olunması da yanğın təhlükəsizliyi qaydalarına ziddir.
Yanacaqdoldurma məntəqələrinin ərazisində yanğınların söndürülməsi üçün daimi su ehtiyatı və müəyyən edilmiş zəruri yanğınsöndürmə avadanlıqları saxlanılmalıdır.
Bütün xəbərlər Facebook səhifəmizdə
USD
EUR
GBP
RUB