“Kaspi” qəzetinin 130 illik ildönümü çərçivəsində yeni nəşr olunan kitabların təqdimatı keçirilib-FOTO
Bu gün Beynəlxalq Mətbuat Mərkəzində "Kaspi" qəzetinin 130 illik ildönümü çərçivəsində yeni nəşr etdiyi "Mübariz yol" və "Kaspi" qəzetinin yaranması və fəaliyyəti" adlı kitabların təqdimatı keçirilib. SİA-nın xəbərinə görə, tədbirdə "Kaspi" qəzetinin təsisçisi, filologiya elmləri üzrə fəlsəfə doktoru Sona Vəliyeva, Mətbuat Şurasının sədri Əflatun Amaşov, Azərbaycan Prezidenti yanında Kütləvi İnformasiya Vasitələrinə Dövlət Dəstəyi Fondunun (KİVDF) icraçı direktoru Vüqar Səfərli, bir sıra qəzetlərin baş redaktorları və digər ictimai-siyasi xadimlər iştirak ediblər.
Tədbiri giriş sözü ilə açan "Kaspi" qəzetinin baş redaktoru Natiq Məmmədli bildirib ki, qəzetin 130 illik yubileyi bir çox hadisələrlə yadda qalıb. O bildirib ki, bu yubiley ərəfəsində qəzet bir sıra tədbirlər həyata keçirib, müsabiqələr təşkil edib. Onun sözlərinə görə, bir müddət öncə Azərbaycanın Milli Qəhrəmanı Mübariz İbrahimovun xatirəsinə həsr olunan milli vətənpərvərlik mövzusunda müsabiqə keçirilib və onun nəticələri kitab şəklində çap olunaraq ictimaiyyətə təqdim olunur.
Daha sonra qəzetin tarixinə nəzər salan N.Məmmədli vurğulayıb ki, bu il 130 illik yubileyini qeyd edəcək mətbu orqan ilk dəfə olaraq 1881-ci ildə nəşr olunub. Onun sözlərinə görə, bu vaxtlar çarizmin, senzuranın olmasına baxmayaraq "Kaspi" qəzeti 38 il fəaliyyət göstərə bilib.
Tədbirin davamında çıxış edən "Kaspi" qəzetinin təsisçisi, filologiya elmləri üzrə fəlsəfə doktoru Sona Vəliyeva hər iki kitab barədə ətraflı məlumat verib. O bildirib ki, "Mübariz yol" adlanan birinci kitab "Kaspi" qəzetinin keçirdiyi müsabiqə nəticəsində seçilən ən yaxşı əsərlərin toplusudur: "Sentyabrın 6-da başlayan müsabiqə üçün əsərlərin qəbulu üç aydan artıq davam edib və dekabrın 31-də başa çatıb. Mübariz İbrahimovun xatirəsini əbədiləşdirilməsinə töhfə vermək və vətənpərvərlik mövzusunun geniş yaradıcı ictimaiyyətin diqqətində saxlamaqla kütləviləşdirmək məqsədilə təşkil olunan müsabiqədə çoxlu əsərlər təqdim olunub. Vətənpərvərlik, qəhrəmanlıq mövzusunu ictimaiyyətin gündəmində saxlamaq lazımdır, çünki bu bizə lazımdır, vacibdir, əsasdır".
İkinci kitab barədə məlumat verən S.Vəliyeva qəzetin yaranması, Azərbaycan mətbuatı tarixində oynadığı rol və uğurları barədə danışıb. O bildirib ki, qəzet Azərbaycanın müstəqillik əldə etməsindən sonra yeni mərhələyə qədəm qoyub. Oktyabr ayında "Kaspi"nin 130 illiyinin təntənəli şəkildə qeyd olunacağını deyən təsisçi qeyd edib ki, bu vaxta kimi qəzet haqqında yazılan yazılar toplanaraq "3 əsrin qəzeti" adlı kitab hazırlanacaq. Çıxışının sonunda S.Vəliyeva hər iki qəzetin hazırlanmasında əməyi olan hər kəsə öz təşəkkürlərini bildirib.
"Kaspi" qəzetinin yaranması və fəaliyyəti" kitabının müəllifi Nəsiman Yaqublu kitabın 2 ay müddətində hazırlandığını deyib. O bildirib ki, 1900-cu ildə 56 qəzet fəaliyyət göstərib ki, bunların da 23-ü rus, 15-i gürcü, 15-i erməni, 3-ü isə Azərbaycan dilində nəşr olunub: "Bunların da arasında "Kaspi" qəzeti xüsusi əhəmiyyətə malik olub. Bu qəzet mətbuat, şəxsiyyətlərin siyasi fəaliyyət tarixində mühüm rol oynayıb".
Mətbuat Şurasının sədri Əflatun Amaşov isə "Kaspi" qəzeti ilə bağlı fikirlərini bölüşüb. O bildirib ki, "Kaspi" qəzeti hər zaman orta xətt tutan və baş verən hadisələri tez bir zamanda oxuculara çatdıran qəzet olub: "Amma son illər qəzetin fəaliyyətində əvvəlki illərlə müqayisədə müsbət dəyişikliklər hiss olunur. Belə ki, qəzet son vaxtlar hadisələrə yanaşmasını dəyişib və daha çox hadisələrin, baş verən proseslərin təhlili variantına keçib. Keçirilən tədbirləri və müsabiqələri də buraya əlavə etsək, o zaman "Kaspi" qəzetinin həyatında yeni eranın başlandığını deyə bilərik. Bir sözlə, bu qəzet Azərbaycan mətbuatında böyük əhəmiyyəti olan nəşrlərdən biridir".
Tədbirin davamında çıxış edən KİVDF-nin icraçı direktoru Vüqar Səfərli "Kaspi" qəzetinin Fondla birgə həyata keçirdiyi layihələrdən danışıb. O bildirib ki, ötən il Azərbaycanın Milli Qəhrəmanı Mübariz İbrahimovun xatirəsinin əbədiləşdirilmək məqsədilə müsabiqə təşkil edib və buraya təqdim olunan ən yaxşı yazılar kitab şəklində nəşr olunub. V.Səfərli belə bir kitabın çap edilməsini təqdirəlayiq hal hesab edib.
Tədbirin davamında çıxış edən jurnalist, professor, Qulu Məhərrəmli, "İki sahil" qəzetinin baş redaktoru Vüqar Rəhimzadə, "Yeni Azərbaycan" qəzetinin baş redaktoru Hikmət Babaoğlu, "Şərq" qəzetinin baş redaktoru Akif Aşırlı, "Ədalət" qəzetinin baş redaktoru İradə Tuncay "Kaspi" qəzetinin keçdiyi tarixi yol haqqında danışıb, qəzetin 130 illik fəaliyyətini yüksək qiymətləndiriblər.
Bütün xəbərlər Facebook səhifəmizdə
USD
EUR
GBP
RUB