Sabah Qafqaz Müsəlmanlar İdarəsinin (QMİ) Qazilər Şurası Ramazan ayının başlanması ilə əlaqədar olaraq fətva verəcək. Məlumatı SİA-ya QMİ-nin mətbuat xidmətinin rəhbəri Rəhimə Dadaşova verdi. R. Dadaşova bildirdi ki, bu il Ramazan ayının hilalı Bakı vaxtilə iyul ayının 30-u saat 23.40 görünəcək: "Müqəddəs Ramazan avqust ayının 1-də başlanacaq, avqustun 30-da yekunlaşacaq. Avqust ayının 31-i isə müsəlmanlar Ramazan bayramını qeyd edəcəklər. Bu il Qədr gecələri avqust ayının 18-dən 19-na, 20-21-ə, 22-dən 23-ə, 24-dən 25-ə, 26-dan 27-ə gecən gecələrə təsadüf edir. Oruc tutanlara kömək məqsədi ilə xüsusi oruc, namaz cədvəli və yaddaş kitabçası tərtib olunub".
Dünya müsəlmanları səbirsizliklə Ramazan ayının gəlişini gözləyir. \"Ramazan\" sözü ərəb dilində müxtəlif mənalarda işlənir. Bu sözün kökü \"ramazan\" kəlməsidir, mənası \"yandıran\", \"yox edən\" deməkdir. Yəni insanın etdiyi günah və pislikləri Ramazan ayı yandırıb puç edir. Ramazan ayının orucu insanın daxili, mənəvi çirkablarının təmizlənməsi üçün nəzərdə tutulur. Ramazan ayının ən mühüm hadisəsi isə islamın əbədi möcüzəsi olan \"Qurani-Kərim"in nazil olmasıdır.
Hər bir müsəlman bu müqəddəs ayda oruc tutub, namaz qılaraq Allaha ibadət etməlidir.
İnsan üçün orucun faydaları isə müxtəlif və genişdir. Belə ki, oruc insanın mənəviyyatında əvəzolunmaz yüksəliş yaradır, qəlbə xoş bir rahatlıq nəsib edir, günahlardan çəkinmə xüsusiyyətini formalaşdırır. Oruc tutarkən müəyyən olunan vaxtlarda yemək və içməkdən çəkinib, bütün vücudu Allahın haram bildiklərindən qoruyaraq təqvanın elə bir dərəcəsinə yüksəlmək olar ki, günah etmək haqda heç düşünülməsin. Bu isə orucun yaratdığı ən yüksək zirvə hesab edilir. Oruc tutan insan ən başlıcası öz nəfsi ilə mübarizə aparır. Peyğəmbər buyurub ki, insanın ən üstünü öz nəfsi ilə mübarizə aparan və ən güclüsü öz nəfsinə qalib gələnidir. Orucun daha bir tərbiyəvi cəhəti bu ayın bərabərlik ayı olmasıdır. Belə ki, bu ay insanda yoxsullarla, aclarla həmdərdlik duyğusu oyanır\".
Qeyd edək ki, oruc təkcə Allaha ibadət etmək deyil, həmçinin böyük fəzilətləri və tibbi baxımdan insana əvəzsiz faydaları var. Oruc ibadətlərin ən şərəflilərindən sayılır. Ramazanın hər günü üçün ayrı-ayrılıqda, həm də ay üçün bütövlükdə oruc niyyəti etmək olar. Ayrı-ayrılıqda hər günün niyyəti həmin günə keçən gecə ərzində sübh namazına kimi edilməlidir. Bütövlükdə Ramazan ayı üçünsə ayın ilk gününə keçən gecə oruc niyyəti edilməlidir. Bəziləri düşünür ki, oruc tutarkən orqanizm arıqlayaraq zəifləyər. Şübhəsiz, insan orqanizminin ən mühüm tələbatlarından biri də yeməkdir. Lakin nəzərə almaq lazımdır ki, yeməyə çox aludə olmaq ziyanlıdır. Hədislərdə buyurulur ki, normadan çox yemək qəlbi daşlaşdırır, şəhvət hissini gücləndirir və insanı Allaha ibadətdən uzaqlaşdırır. Məhəmməd peyğəmbər çox yeməyin dərdlərin evi, az yeməyin isə dərmanların ən əsası olduğunu buyurub. Ramazanı müsəlmanın 1 aylıq müalicə kursu saymaq olar.
Oruc tuta bilməyən xəstə şəxslər bundan azaddırlar. Allah elə mərhəmətlidir ki, xəstə adamları oruc tutmaq borcundan azad edir. Hər kim orucun öz səhhəti üçün zərərli olduğunu bilsə, oruc tutmaya bilər, amma sağaldıqdan sonra mütləq qəza orucu tutmalıdır.
Orucluq batil edən insan orucluqdan sonra həmin günün əvəzində 1 gün qəza orucu tutmalı, üstəlik, kəffarə ödəməlidir. Yəni itirilmiş günün əvəzində 2 ay oruc tutmalı, ya da hər günün əvəzində 60 nəfər ehtiyac olan insanlara yemək verməlidir. Lakin bilmədən oruc pozularsa, kəffarə vermək lazım deyil, yalnız hər günün əvəzində 1 gün qəza orucu kifayət edir.
Ramazanın vacib amillərindən olan Qədir gecəsi Quranın nazil olduğu gündür. Ramazan ayının hansı gecəsinin Qədr gecəsi olması dəqiq məlum deyil. Müxtəlif hədislərdə Ramazanın 17-ci, 19-cu, 21-ci, 23-cü, 27-ci, yaxud 29-cu gecəsinin Qədir gecəsi olduğu bildirilir. Qədir gecəsinin dəqiq məlum olmamasının incə bir səbəbi var. Məşhur müsəlman alimi Əllamə Bəğəvi bunu belə izah edib. Allah Qədir gecəsini müsəlman ümmətindən gizli saxlayır ki, müsəlmanlar Ramazan ayının bütün gecələrində Qədir gecəsini görmək ümidi ilə ibadət etsinlər. Qədir gecəsində ibadət edən şəxsin savabı 1000 ay (80 il) ibadət edənin savabı qədərdir. Qədir gecəsində qüsl edib paklanmaq, səliqəli və yeni libaslar geyinmək savabdır. Həmçinin bütün gecə ərzində çoxlu namaz qılmaq, dua etmək, Quran oxumaq lazımdır. Xüsusilə Quranın \"Ənkəbut\", \"Rum\", \"Duxan\" və \"Qədir\" surələrinin oxunması təkid edilir. Qədir gecəsində edilən dualar müstəcab olduğundan həmin gecə çoxlu dua oxumağın faydası böyükdür\".
Əziz müsəlmanlar! Gəlin Qədir gecəsində müsəlman ümmətinin salamatlığı və rifahı üçün dua edək. Xüsusilə həyatımızın bu çətin dövründə işğal edilmiş torpaqlarımızın azad olunmasını, xalqımızın yaşayış vəziyyətinin yaxşılaşmasını Allahdan diləyək.
USD
EUR
GBP
RUB