Son iki gündə havanın temperaturu xeyli yüksəlib. Ekologiya və Təbii Sərvətlər Nazirliyi Milli Hidrometeorologiya Departamentinin SİA-ya verdiyi məlumata görə, bu gün zəif gilavar küləyi, bəzi saatlarda havada durğunluq, oksigen sıxlığının azalması ilə müşayiət olunan xəzriqabağı şəraiti və günorta saatlarında qızmar isti temperatur diskomfortu meteohəssas, xüsusilə ürək-damar və tənəffüs orqanı xəstəlikləri olan meteohəssas insanlar üçün əlverişsizdir: "Sonrakı iki gün ərzində arabir güclənən xəzri küləyinin müdaxiləsi ilə meteohəssas insanlar üçün yaranmış gərgin vəziyyət aradan qalxacaq. Sabah havanın temperaturu 35-38 dərəcə isti təşkil edəcək".
Ancaq əhali arasında belə bir fikir formalaşıb ki, hidrometeoroloqların verdikləri proqnoz reallığı əks etdirmir. Havanın temperaturu verilən proqnozlardan xeyli yüksəkdir. Bəs bu cür hava şəraitində necə davranmalı?
Bakı Şəhər Təcili və Təxirə Salınmaz Tibbi Yardım Stansiyasının baş həkiminin müalicə, metodik işlər üzrə müavini Suğra Bəşirova SİA-ya bildirdi ki, saat 11:00-dən 18:00 - dək açıq havada, günəş şüaları altında gəzmək məsləhət görmür: "İsti hava şəraitində acıq havada mümkün qədər az olmaq, orqanizmin su-duz mübadiləsini tənzimləmək məqsədi ilə maye qəbulunu artırmaq, çimərliklərə səhər (11:00-a qədər) və axşam saatlarında (19:00-dan sonra) getmək tövsiyə olunur. Ürək-damar, endikrinoloji, sinir sistemi xəstəlikləri olanlara, həmçinin hamilə qadınlara, azyaşlı uşaqlara, ahıllara isə isti hava şəraitində vaxtlarını ev şəraitində keçirmək məsləhət görülür. Qeyd edim ki, son günlər əhali tərəfindən mərkəzə edilən müraciətlərin sayı artıb. İnsanlar əsasən qan təzyiqinin yüksəlməsindən, ürək və baş ağrılarından şikayətlənirlər. Konkret olaraq günvurmadan müraciət edənlərin sayında da artım müşahidə olunur".
Mirvari
Bütün xəbərlər Facebook səhifəmizdə
USD
EUR
GBP
RUB