Son 6 ayda üç azərbaycanlı qız uşağı xarici vətəndaşlara övladlığa verilib. Ailə, Qadın, Uşaq Problemləri üzrə Dövlət Komitəsindən SİA-ya verilən məlumata görə, uşaqlardan ikisi Rusiya, biri isə Fransa vətəndaşı tərəfindən övladlığa götürülüb: "Ötən il isə iki azərbaycanlı uşaq xarici vətəndaşlara övladlığa verilib. Uşaqların biri ABŞ, digəri isə Rusiya vətəndaşı tərəfindən götürülüb. Ümumiyyətlə indiyə kimi, xarici vətəndaşlara 18 uşaq övladlığa verilib. Onların 12-i qız, 6-sı isə oğlandır. Onu da deyək ki, xarici vətəndaşlara övladlığa verilən uşaqların əksəriyyəti əlil uşaqlar olub. Xarici vətəndaşlar əlil uşaqları böyük məmnuniyyətlə övladlığa götürür və hətta bundan qurur hiss keçirir. Həmin uşaqların gələcək taleyi haqda məlumat ala bilmək üçün isə əvvəlcədən övladlığa uşaq götürən ailə ilə razılaşma əldə olunur. Həmin razılaşmaya görə, uşaq götürən hər bir ailə üç il müddətində hər 6 aydan bir uşağın yaşam tərzi ilə bağlı komitəyə məlumat verilir.
Məlumatlar şəkil və video çəkiliş şəklində təqdim olunur. Bu üsulla uşaqların yaşam tərzi haqda real olaraq məlumat almaq mümkün olur".
Övladlığa vermək üçün uşaq yoxdur
Bu gün xarici övlada ehtiyacı olan azərbaycanlı ailələrin də sayı kifayət qədər çoxdur. Hazırda 300-ə yaxın ölkə vətəndaşı övladlığa uşaq götürmək üçün növbə gözləyir.Səhiyyə Nazirliyinin Bakı Baş Səhiyyə İdarəsinin övladlığa uşaq götürmə üzrə mütəxəssisi Lalə Ramazanova bildirdi ki, uşaq verilməsi prosesinin gecikdirilməsinin səbəbi atılmış uşaqların az olmasıdır: "Ölkədə atılan və imtina edilən uşaqların sayı minimuma enib. Hazırda uşaq evlərinə atılan uşaqların da sayı azalıb. Ona görə də övlad üçün növbəyə duranları təmin etmək çətinləşib. Ancaq bu cür uşaqlar olduqca onlar növbədə duran ailələrə verilir. Məsələn ötən gün 3 uşaq ailələrə övladlığa verildi. Onlardan ikisindən valideynləri imtina edib, biri isə atılıb".
60 yaşdan yuxarı şəxslərə uşaq verilmir
Mütəxəssis internatdakı uşaqların
əksəriyyətinin bioloji valideynləri olduğu üçün onların övladlığa verilmədiyini
dedi: "Övladlığa tamamilə valideynlər tərəfindən imtina edilmiş uşaqlar verilə
bilər. Bu proses qanunla tənzimlənir və uşaq vermə zamanı bütün proseduralara
mütləq şəkildə riayət olunur. Ona görə də uşaq götürən şəxs haqda bütün
məlumatlar toplanır, həmin ailənin durumu öyrənilir və yalnız bundan sonra uşaq
həmin şəxslərə etibar edilir. Məsələn, 60 yaşından yuxarı şəxslərə uşaq
himayəyə vermək qadağandır. Ömrünün sonu və maddi vəziyyəti aşağı olan şəxslərə
də uşaq verilmir. Həmçinin himayəyə verilən uşağın 18 yaşına qədər mülkiyyət
hüququnun qorunması nəzərdə tutulur. Uşaqla övladlığa götürən şəxs arasında 16
yaş fərq olmalıdır. I, II, III qrup dispanser qeydiyyatında olan, daxili
orqanları, sinir sistemi, bədxassəli onkoloji xəstəliyi, həmçinin narkoman,
toksikoman, alkoqol düşkünləri, infeksion və ruhi xəstəliklərdən əziyyət
çəkənlərə uşaq verilməsi qadağandır. Onu da deyim ki, övladlığagötürmə sirri
gizli saxlanılır. Ancaq icra hakimiyyətinin əməkdaşı 6 aydan bir monitorinq
apara bilər və uşağın gələcək taleyinin izlədilməsinə icazə var".
Mirvari
Bütün xəbərlər Facebook səhifəmizdə
USD
EUR
GBP
RUB