Bu gün Qarabağ Azadlıq Təşkilatının üzvləri BMT-nin Azərbaycandakı nümayəndəliyi və Prezident Administrasiyası qarşısında etiraz aksiyaları keçiriblər. Təşkilatdan SİA-ya verilən xəbərə görə, aksiya saat 12.00 radələrində BMT nümayəndəliyi qarşısında başlayıb, aksiya iştirakçıları "Ermənistana qarşı sanksiyalar tələb edirik!", "Hərbi canilər cəzalandırılsın!", "BMT qətnamələri yerinə yetirilsin!" və digər şüarları səsləndirib və yazılı plakatları qaldırıblar.
BMT nümayəndəliyi aksiya iştirakçılarından QAT sədrinin müavini Fəridə Əsgərova, İdarə heyətinin üzvləri Arzu Qasımova və Şahmar İbrahimovu qəbul edib. QAT nümayəndələri aksiyanın bəyanatını təqdim edib və mövqelərini çatdırıblar. Aksiya iştirakçılarının bəyanatında göstərilir: "Ermənistan Azərbaycanın ərazilərinin 20 faizini zəbt edərək işğal altında saxlayır, beynəlxalq təşkilatların qərar və qətnamələrinə məhəl qoymur və əsassız ərazi iddialarından geri çəkilmək istəmir. Ermənistanın özünü bu cür aparmasının məsuliyyəti beynəlxalq təşkilatların və birinci növbədə Birləşmiş Millətlər Təşkilatının üzərinə düşür.
Dünyanın ən mötəbər təşkilatı artıq 20 ildir ki, işğalçı Ermənistanın qarşısında aciz qalıb, nə tutarlı qərarlar qəbul edə, nə də qəbul etdiyi qətnamələri yerinə yetirə bilir. Biz başa düşmürük ki, BMT Təhlükəsizlik Şurası nə üçün digər işğalçı, terrorçu, avtoritar ölkələrə qarşı dərhal kəskin qətnamələr qəbul edir, sanksiyalar həyata keçirir, amma işğalçı terrorçu hərəkətləri göz qabağında olan Ermənistana qarşı eyni addımlar atılmır?
Biz hesab edirik ki, BMT Təhlükəsizlik Şurası ikili standartlar siyasətinə son qoymalı, Ermənistanın işğalçı və terrorçu hərəkətləri ilə bağlı xüsusi yığıncağını keçirməli, Ermənistana qarşı təcili olaraq siyasi və iqtisadi sanksiyalar tətbiq etməlidir. Beynəlxalq təşkilatlar həqiqətən münaqişənin dinc vasitələrlə, sülh yolu ilə həllini istəyirlərsə, Ermənistana qarşı sanksiyalar tətbiq etməlidirlər. Sanksiyalar münaqişəni dinc vasitələrlə nizama salmanın yeganə yoludur. BMT Ermənistana qarşı ya sanksiyalar tətbiq etməli, ya da digər beynəlxalq təşkilatlarla birlikdə vasitəçilik missiyasından kənara çəkilməli, Azərbaycanın öz problemini öz imkanları ilə həll etməsinə mane olmamalıdırlar". Sonra aksiya Prezident Administrasiyasının qarşısında davam etdirilib. Aksiya iştirakçıları "Müharibənin başlanmasını tələb edirik!", "Ümid sənədir Azərbaycan əsgəri", "Hərb, Hərb, Hərb!" və digər şüarları səsləndirmiş, plakat və Azərbaycan bayraqlarını qaldırıblar. Aksiya iştirakçılarının qəbul etdikləri qətnamədə bildirilir: "Azərbaycan 20 ildir ki, Qarabağ Münaqişəsinin həllinə dair danışıqları davam etdirir. Lakin hələ də heç bir nəticə yoxdur. İşğalçı Ermənistan əsassız iddialarından geri çəkilmək istəmir. Beynəlxalq təşkilatlar, vasitəçilər Ermənistana heç bir təzyiq göstərmir, ədalətsiz mövqelərində qalırlar. Minsk qrupunun həmsədrləri mənasız danışıqları uzadır, hər dəfə yalançı tezisləri ortaya atmaqla Ermənistanın maraqlarına xidmət göstərirlər. Beynəlxalq təşkilatların, vasitəçilərin məqsədi münaqişənin ədalətli həllini tapmaq deyil, onlar status-kvonun saxlanılmasına çalışır, bununla da Ermənistanın işğal olunmuş Azərbaycan ərazilərində möhkəmlənməsinə şərait yaradırlar. Bu vəziyyət artıq davam edə bilməz, status-kvo dəyişdirilməli, Dağlıq Qarabağ və digər ərazilərimiz işğalçı Ermənistan qüvvələrindən təmizlənməlidir. Beynəlxalq təşkilatlar bu istiqamətdə addım atmamış və bundan sonra da atmayacaqlar. Bunu Azərbaycan Xalqı, Dövləti və Ordusu etməlidir. Bunu etmək üçün Dövlətimizin kifayət qədər gücü var. Gücümüz var, ona görə də artıq gözləməməli, hərəkətə keçməliyik. Bütün bunları nəzərə alaraq hesab edirik:
Azərbaycan Ermənistanla danışıqları dərhal dayandırmalıdır.
Azərbaycan ləngimədən işğalçı Ermənistana qarşı hərbi əməliyyatlara başlamalıdır. İqtidar müharibəni başlamaq üçün özündə cəsarət və qətiyyət tapmalıdır. Hər kəs bilməlidir ki, müharibə o qədər də qorxulu, təhlükəli yol deyil, əksinə nicat və azadlıq yoludur.
Cəmiyyətin bütün siyasi, ictimai təbəqələri, hər bir vətəndaş birmənalı şəkildə müharibə yolunu dəstəkləməli, hakimiyyətin hərbi yöndə addımlarını müdafiə etməlidir".
Bütün xəbərlər Facebook səhifəmizdə
USD
EUR
GBP
RUB