Rəsmi müqavilə ilə çalışan şəxslərin əmək haqqından, Dövlət Sosial Müdafiə Fonduna, Həmkarlar İttifaqına, İcbari tibbi sığortaya, o cümlədən, işsizliyə görə və gəlir vergisi çıxılır. Həmin məbləğlər isə maaşdan kifayət qədər vəsaitin silinməsinə səbəb olur. Bəs görəsən, şəxs öz istəyi ilə həmin vergiləri verməkdən imtina edə bilərmi?
Məsələ ilə bağlı iqtisadçı-ekspert, millət vəkili Vüqar Bayramov SİA-ya açıqlamasında bildirib ki, ödənişlərin bir qismi icbaridir və icbari ödənişlər təbii ki, məcburi xarakter daşıyır:
"İcbari ödənişlərə ilk növbədə vergilər və dövlət tərəfindən müəyyən olunmuş digər məcburi rüsumlar daxildir. Vergilər dövlətin əsas gəlir mənbələrindən biridir və onlar vasitəsilə dövlət büdcəsi formalaşır. Bu vəsaitlər sonradan sosial təminat, təhsil, səhiyyə, infrastruktur, müdafiə və digər ümummilli məqsədlərin həyata keçirilməsinə yönəldilir.
Bundan əlavə, vətəndaş çalışdığı müəssisədə həmkarlar ittifaqı mövcuddursa, həmin ittifaqa da müəyyən üzvlük haqqı ödəyir. Həmkarlar ittifaqları işçilərin hüquqlarını müdafiə edən, onların sosial və iqtisadi maraqlarını qoruyan təşkilatlardır. Belə qurumlara ödənilən məbləğlər işçilərin kollektiv hüquqlarının qorunması, sosial tədbirlərin təşkili və əmək münasibətlərinin tənzimlənməsi üçün istifadə olunur. Eyni zamanda, əgər şəxs əmək müqaviləsi və ya mülki-hüquqi müqavilə əsasında fəaliyyət göstərirsə, o halda icbari tibbi sığorta üçün də ödənişlər həyata keçirilir. İcbari tibbi sığorta sistemi vətəndaşlara dövlət tərəfindən müəyyən edilmiş səhiyyə xidmətlərindən istifadə etmək imkanı yaradır. Bu sistemin məqsədi insanların sağlamlıq hüququnun qorunması, tibbi xidmətlərin keyfiyyətinin yüksəldilməsi və səhiyyə sahəsində maliyyə sabitliyinin təmin olunmasıdır. Bütün bu ödənişlər – yəni vergilər, sığorta haqları, həmkarlar ittifaqı üzvlük ödənişləri və digər qanunla müəyyən olunmuş rüsumlar – icbari ödənişlər kateqoriyasına daxildir. Onların ödənilməsi qanunvericiliklə tənzimlənir və dövlət tərəfindən nəzarətdə saxlanılır. Bu ödənişlərin vaxtında və tam şəkildə yerinə yetirilməsi həm vətəndaşın, həm də cəmiyyətin rifahı üçün mühüm əhəmiyyət kəsb edir. Yalnız özəl fondlar və ya digər könüllü istiqamətlərdə edilən ödənişlərdə vətəndaşın seçimi imkanı var. Amma əgər ödəniş icbaridirsə və bu qanunla təsbit olunubsa, o zaman həmin ödənişlər vətəndaş tərəfindən mütləq şəkildə büdcəyə və ya müvafiq rəsmi qurumun hesabına ödənilməlidir".
Bütün xəbərlər Facebook səhifəmizdə
.jpg)
USD
EUR
GBP
RUB
