"Fətəli Xan Xoyskinin yubileyinin qeyd edilməsi Azərbaycan tarixində önəmli hadisədir" - MÜNASİBƏT BİLDİRİLDİ
"Fətəli Xan Xoyskinin yubileyinin qeyd edilməsi barədə Prezidentin sərəncamı Azərbaycan tarixində çox mühüm bir hadisədir. Bu sərəncam təkcə bir dövlət xadiminin xatirəsinin yad edilməsi deyil, həm də müasir Azərbaycan dövlətçiliyinin tarixi köklərinə, milli müstəqillik ideallarına və milli mənəvi dəyərlərə diqqətin təzahürüdür". Bu sözləri SİA-ya açıqlamasında millət vəkili Jalə Əliyeva deyib.
Onun sözlərinə görə, Fətəli Xan Xoyski Azərbaycanın ilk müstəqil dövlət quruculuğu dövründə mühüm siyasi fəaliyyət göstərmiş, ölkəmizin dövlətçilik ənənələrinin formalaşmasında əsas rol oynamış bir şəxsiyyət olaraq tarixdə öz layiqli yerini almışdır: "Onun fəaliyyəti həm hüquqi, həm diplomatik, həm də siyasi baxımdan Azərbaycanın müstəqil bir dövlət kimi mövcud olmasını təmin edən strateji addımların atılmasına xidmət etmişdir. Prezidentin bu sərəncamı həm də gənc nəsillər üçün əhəmiyyətli mesajdır. Bu sərəncam vasitəsilə tariximizin mühüm şəxsiyyətlərinin xidmətləri yenidən gündəmə gətirilir və onların ideyaları, siyasi baxışları, dövlətçilik təcrübəsi bu günün reallıqları ilə əlaqələndirilir. Fətəli Xan Xoyskinin dövlət quruculuğu prinsipləri, xalqın hüquqlarına və dövlət müstəqilliyinə verdiyi dəyər müasir Azərbaycan siyasətində də aktuallığını qoruyur. Bu da onu göstərir ki, müasir dövrdə dövlət rəhbərliyi yalnız tarixi yaddaşı yaşatmaqla kifayətlənmir, eyni zamanda tarixdən çıxarılan dərsləri bugünkü və gələcək siyasi və sosial proseslərdə tətbiq edir.
Sərəncamın mahiyyəti həm də Azərbaycan dövlətinin milli tarixi şəxsiyyətlərə verdiyi yüksək qiymətin göstəricisidir. Fətəli Xan Xoyski yalnız siyasi lider deyildi, o, həm də milli şüurun, dövlətçilik mədəniyyətinin və dövlətçilik prinsiplərinin qorunub saxlanmasına xidmət edən bir simvol idi. Onun ideyaları, qərarları və fəaliyyət istiqamətləri bugünkü Azərbaycan diplomatiyası, dövlət idarəçiliyi və hüquq sistemində öz əksini tapmaqla ölkəmizin davamlı inkişafına dəstək verir. Eyni zamanda, bu sərəncamın beynəlxalq səviyyədə də önəmi vardır. Azərbaycan ilk müstəqilliyini əldə etdiyi dövrdə yaşanan çətinlikləri və əldə etdiyi uğurları Fətəli Xan Xoyskinin siyasi strategiyaları və diplomatik qabiliyyətləri ilə birləşdirərək dünya ictimaiyyətinə təqdim edir. Bu, ölkəmizin müstəqillik tarixini daha yaxşı anlamaq, həmçinin Azərbaycanın dövlətçilik ənənələrini beynəlxalq aləmdə düzgün şəkildə təqdim etmək baxımından önəmli bir addımdır.
Fətəli Xan Xoyskinin yubileyinin qeyd edilməsi barədə Prezidentin sərəncamı həm milli tariximizin öyrənilməsi və təbliği, həm də müasir Azərbaycan dövlətinin milli-mənəvi dəyərlərə verdiyi önəmin nümayişi kimi qiymətləndirilə bilər. Bu, eyni zamanda gənc nəsillərin tarixi şəxsiyyətləri tanıması, onların fəaliyyətini öyrənməsi və gələcəkdə milli dövlətçilik prinsiplərinə sadiq qalması üçün bir stimul mənbəyidir. Dövlətimizin bu cür addımları həm milli həmrəyliyin möhkəmlənməsinə, həm də Azərbaycan tarixi və dövlətçilik ənənələrinin qorunmasına xidmət edir".
Bütün xəbərlər Facebook səhifəmizdə
USD
EUR
GBP
RUB