Yay mövsümünün əvvəlindən yerli və xarici turistlər tərəfindən edilmiş çoxsaylı müraciətlər əsasında Dövlət Turizm Agentliyi tərəfindən Abşeron yarımadasında yerləşən çimərliklərdə monitorinqlər həyata keçirilib. Monitorinqlər nəticəsində bəzi çimərliklərdə sanitar-gigiyenik vəziyyətin və minimal infrastrukturun olmaması diqqət çəkib. Bununla əlaqədar pilot layihə hazırlanıb və işlərə başlanılıb. Şüvəlan ərazisində iki çimərlik birləşdirilərək bir çimərlik kimi, ümumilikdə isə bu ərazidə beş çimərlik əsasında yeni, daha böyük üç çimərlik yaradılıb. Bu çimərliklər tamamilə ictimai əhəmiyyət daşıyır. SİA xəbər verir ki, bunu jurnalistlərə açıqlamasında Dövlət Turizm Agentliyinin Qoruqları İdarəetmə Mərkəzinin İdarə Heyətinin sədri Murad Ağabəyli deyib.
M. Ağabəyli bildirib ki, bu çimərliklərdə fəaliyyət dövlət-özəl tərəfdaşlığı əsasında, yəni sahibkarlarla birgə həyata keçirilib: “İşin bir hissəsi sahibkarların maarifləndirilməsinə yönəlib. Ərazidə mövcud olan infrastruktur isə qarışıq və nizamsız tikililərdən ibarət idi. Bəziləri yarımçıq, bəziləri isə əsaslı formada inşa olunmuşdu ki, bu da həm ümumi görünüşü, həm də turistlərin rahat istifadəsini çətinləşdirirdi. Bundan əlavə, çimərliklərə girişdə müəyyən məhdudiyyətlər də mövcud idi”.
Göstərilən bu səbəblər nəzərə alınaraq həmin tikililər sökülərək yerində müasir çimərliklər yaradılıb: “Burada ümumi avtomobil dayanacağı, uşaq meydançası, əyləncə meydançası, futbol və voleybol meydançaları, sanitar qovşaqlar, soyunub-geyinmə otaqları, duşlar, çətirlər, şezlonglar və söhbətgahlar quraşdırılıb. Beləliklə, həm yerli, həm də xarici turistlər bu infrastrukturu tamamilə ödənişsiz şəkildə istifadə edə biləcəklər.
Agentlik rəsmisi bildirib ki, çimərliklərin davamlı fəaliyyətini təmin etmək üçün müəyyən xidmətlər də göstəriləcək: ”Sahibkarlar bu xidmətlərdən istifadə etməklə maliyyə gəlirləri əldə edəcək və çimərliklərin təmizliyi ilə baxımını həyata keçirəcəklər. Bununla yanaşı, ərazilərdə kiçik kafe və satış köşkləri də yerləşdiriləcək. Beləliklə, turistlər rahatlıqla məhsullar əldə edə biləcək, sahibkarlar isə qazanc əldə edəcəklər. Gələcəkdə ictimai sifariş olarsa bu kimi pilot layihələr davam etdirilə bilər”.
Bütün xəbərlər Facebook səhifəmizdə
USD
EUR
GBP
RUB