Uşaqların tərbiyəsi və texnologiya asılılığı – planşet, telefon istifadəsinin artması və valideynlərin nəzarət problemləri - PSİXOLOQ AÇIQLADI
“Uşaqların təhsilində texnologiyanın sürətlə artan istifadəsi bir çox sosial və psixoloji narahatlıqlara səbəb olur. Bu vəziyyəti günah kimi qiymətləndirmək düzgün deyil, lakin bu proses ümumi ictimai pozuntulara gətirib çıxara bilər. Artıq demək olar ki, hər bir ailədə bu dəyişikliklərin mənfi təsirləri hiss olunmaqdadır”. Bu sözləri SİA-ya açıqlamasında psixoloq Aytən Ələkbərova deyib.
Aytən Ələkbərova sözlərinə belə davam edib: “Valideynlər haqlı olaraq narahatdırlar: “Uşağımı telefondan necə uzaqlaşdıra bilərəm?” Bu suala cavab, ilk növbədə, uşaqlara daha çox diqqət ayırmaq, onlarla ünsiyyət qurmaq, oyunlara cəlb etmək və müəyyən mövsümi dövrlərdə birgə fəaliyyətlər təşkil etməkdir. Lakin müşahidələr göstərir ki, hətta ailəvi ziyarətlər zamanı belə uşaqların telefonlardan asılılığı özünü açıq şəkildə büruzə verir.
Texnologiyanın həddindən artıq istifadəsi uşaqlarda həm fiziki, həm də psixoloji fəsadlara yol aça bilər. Məsələn, düzgün olmayan oturuş nəticəsində onurğa əyriliklərinin (skolioz) artması, uzunmüddətli ekran istifadəsi səbəbindən görmə qabiliyyətinin zəifləməsi, beyin fəaliyyətində müəyyən problemlərin yaranması müşahidə olunur. Bununla yanaşı, valideyn–övlad münasibətlərində də gərginlik yarana bilər.
Əgər texnologiyadan istifadəyə nəzarət edilməzsə, bu, uşaqlarda davamlı asılılıq formalaşdıra bilər. Daha təhlükəlisi isə texnoloji asılılığın digər asılılıqlara (məsələn, oyun və ya sosial media bağımlılığına) zəmin hazırlamasıdır. Buna görə də, balanslı yanaşma vacibdir: texnologiyanın faydaları qorunmalı, eyni zamanda uşaqların sosial münasibətləri və psixoloji sağlamlığı üçün risklər minimuma endirilməlidir”.
Ayşən Vəli
Bütün xəbərlər Facebook səhifəmizdə
.jpg)
USD
EUR
GBP
RUB