"Üçtərəfli görüş regionda stabilliyi təmin edə biləcəkmi?" - SORĞU

17:15 | 719

Hər bir ölkənin vətəndaşı üçün sülh və təhlükəsizlik hər zaman prioritetdir. Bəzən uzun illər davam edən münaqişələrin həlli üçün yalnız diplomatik addımlar kifayət edir. 2025-ci il avqustun 8-də Vaşinqtonda Azərbaycan Prezidenti İlham Əliyev, Ermənistanın Baş naziri Nikol Paşinyan və ABŞ Prezidenti Donald Tramp arasında keçirilən üçtərəfli görüş, məhz belə bir tarixi an oldu. Bu görüş nəticəsində imzalanan sülh müqaviləsi və açılan Zəngəzur Dəhlizi regionda yeni imkanlar yaratdı. Maraqlıdır, şəhər sakinləri bu tarixi görüş və sülh prosesinə necə baxır, gələcəyə dair ümidləri nədir? SİA bu mövzu ilə bağlı vətəndaşlar arasında sorğu keçirib.

Şəhər sakini Çingiz İbrahimov:"Bu görüş mənim üçün həqiqətən inanılmaz və ürəyimcə oldu. Həmişə bəlkə də bu anın baş verməsini arzulayırdım. Gələcək üçün böyük ümidlərim var. Əgər kənardan bizə mane olmasalar, gənc nəsil daha gözəl və sülh içində yaşaya bilər. Bu uğurlu siyasətə görə cənab Prezident İlham Əliyevə təşəkkürümü bildirirəm."

Şəhər sakini Şəhla Atakişiyeva: "Bu görüş və sülh müqaviləsinin imzalanması mənim üçün çox ümidverici bir xəbərdir. Biz illərlə qonşularla gərginlik içində yaşamışıq, indi isə belə bir tarixi addım atılması gələcək nəsillər üçün sülh və əməkdaşlıq ümidini artırır. Zəngəzur dəhlizinin açılması iqtisadiyyat üçün də böyük fürsətlər yaradacaq, ticarət və turizm sahəsində yeni imkanlar açılacaq. Mənim fikrimcə, bu, həm də regionda stabil və dayanıqlı inkişaf üçün əhəmiyyətli bir addımdır."

Şəhər sakini Emil Əliyev: "Bu xəbəri eşidəndə sevindim. Sülh müqaviləsi yalnız siyasətçilər üçün deyil, hər bir vətəndaş üçün əhəmiyyətlidir. İnsanlar azad səyahət edə biləcək, ticarət və əməkdaşlıq imkanları genişlənəcək. Zəngəzur dəhlizinin açılması həm də bölgədə insanlar arasında əlaqələrin güclənməsinə xidmət edəcək. Mən ümid edirəm ki, bu, uzunmüddətli və dayanıqlı sülh üçün başlanğıc olacaq."

Şəhər sakini Məmməd Ağayev:"Bu görüş mənim üçün böyük sevinc və ümid mənbəyidir. Uzun illər ərzində arzuladığımız sülhün bu gün gerçəkləşdiyini görmək ürəyimi isindirir. Şəhidlərimizin qanı, torpaqlarımızın qorunması və Prezident İlham Əliyevin uzaqgörən siyasəti sayəsində belə bir tarixi an yaşadıq. İnanıram ki, gənc nəsil bundan sonra daha təhlükəsiz, sülh və firavan bir mühitdə yaşayacaq. Bu uğur üçün dövlət başçısına minnətdarlığımı bildirirəm."

Şəhər sakini Tural Məmmədov: "Mən iqtisadi perspektivdən bu xəbəri çox müsbət qiymətləndirirəm. Zəngəzur dəhlizinin açılması yükdaşımaların sürətlənməsinə və ixrac-idxal imkanlarının artmasına səbəb olacaq. Eyni zamanda, sülh müqaviləsi iqtisadi investisiyaların cəlb olunmasına da töhfə verə bilər. Təbii ki, siyasi tərəflərin və tərəfdaş ölkələrin bu razılaşmaya sadiq qalması vacibdir, amma mən ümid edirəm ki, bu həm region, həm də ölkəmiz üçün yeni imkanlar yaradacaq."

Şəhər sakini Fuad Qurbanoğlu: "Bu görüş və sülh müqaviləsi mənim üçün çox ümidvericidir. Şəhidlərimizin canları bahasına qorunan torpaqlarımızın sülh yolu ilə inkişafına gətirdiyi imkanları görmək qürurvericidir. Prezident İlham Əliyevin liderliyi və diplomatik bacarığı olmadan belə bir nəticəyə gəlmək mümkün olmazdı. Zəngəzur dəhlizinin açılması həm iqtisadiyyat, həm də regionlararası əməkdaşlıq üçün böyük fürsət yaradacaq. Mənim fikrimcə, bu, həm də gələcək nəsillər üçün sülh və stabilliyin təminatıdır."

Müəllif: Günel Fərzəliyeva

WhatsApp-da Səs Media Qrupu kanalını izləyin