Marneulidə “Lider Media" təşkilatı və 24News.ge xəbər portalının Gürcüstan azərbaycanlıları arasında təsis etdiyi ilin müxtəlif nominasiyaları üzrə mükafatların təltifetmə mərasimi keçirilib.
SİA xəbər verir ki, mükafat on nominasiya üzrə Gürcüstan azərbaycanlıları arasında il ərzində öz fəaliyyətləri ilə seçilən şəxslərə təqdim olunub.
Tədbirdə ictimaiyyət nümayəndələri, müəllimlər, bələdiyyə üzvləri, jurnalistlər, ziyalılar və gənclər, həmçinin Bolnisi məhkəməsinin sədri Giorgi Qratiaşvili, hakimlər Nino Jojua, Devi Devidze, Ketevan Sturua və Vladimir Tsitlauri, Marneuli, Bolnisi, Ağbulaq və Calka rayonları üzrə prokurorlar Giorgi Mekvabidze, Tornike Kapanadze və Aleksandr Andquladze də iştirak ediblər.
"Lider Media" təşkilatının və 24News.ge xəbər portalının təsisçisi Azər Məmmədov tədbiri açdıqdan sonra Azərbaycanda baş verən təyyarə qəzası ilə bağlı Azərbaycan xalqına baş sağlığı verib. Sonra qəza zamanı həyatını itirənlərin əziz xatirəsi bir dəqiqəlik sükutla yad olunub.
Azər Məmmədov daha sonra Dünya Azərbaycanlılarının Həmrəyliyi Günü və Yeni İl münasibəti ilə qonaqları təbrik edib və 2024-cü ilin Azərbaycan xalqı üçün mühüm il olduğunu qeyd edərək növbəti ilin də uğurlu olmasını arzu edib.
Bildirilib ki, il ərzində media öz müşahidələrini aparıb və Gürcüstan azərbaycanlıları arasında öz fəaliyyətləri ilə aktiv şəkildə seçilən şəxslərə sözügedən nominasiyaların təqdim edilməsi qərarı alınıb.
O qeyd edib ki, bütün sahələr üzrə aktiv icma üzvlərimiz olsa da, mükafata gürcü cəmiyyəti arasında, mərkəzi KİV-də, həmçinin beynəlxalq tədbirlərdə Gürcüstan azərbaycanlılarını təmsil edən şəxslər layiq görülüblər. Azər Məmmədov mükafatın təsis edilməsində əsas məqsədin icma üzvləri arasında aktivliyin təşviq edilməsi olduğunu qeyd edib.
Bolnisi məhkəməsinin sədri Giorgi Qratiaşvili də təyyarə qəzası ilə əlaqədar Azərbaycan xalqına və həlak olanların ailələrinə başsağlığı verib, yaralılara şəfa diləyib.
Digər çıxış edənlər bu kimi nominasiyanın Gürcüstan azərbaycanlılarının gürcü cəmiyyətinə inteqrasiyasında və öz sahələri üzrə aktiv fəaliyyət göstərməsində bir stimul olacağını qeyd ediblər.
Qonaqlar bölgədə geniş oxucu və tamaşaçı auditoriyasına malik olan 24News.ge xəbər portalının və 24News Tv internet televiziyasının 2018-ci ildən bu günədək müxtəlif sahələr üzrə təqdirə layiq fəaliyyətləri olduğunu qeyd ediblər.
Sonra on nominasiya üzrə Gürcüstan azərbaycanlıları arasında il ərzində öz fəaliyyətləri ilə aktiv şəkildə seçilən şəxslərə mükafatlar təqdim olunub.
Bütün xəbərlər Facebook səhifəmizdə
USD
EUR
GBP
RUB