Məşhur britaniyalı siyasətçi, “Commonwealth” (Millətlər Birliyi) təşkilatının baş katibi Patrisia Skotland “Tahir Gözel İnkişafa Təşəbbüs” təşkilatının dəvəti ilə Azərbaycanı ziyarət edib. Keçmiş Böyük Britaniya İmperiyasının ərazisinə daxil olmuş 56 ölkənin təmsil olunduğu təşkilata rəhbərlik edən xanım diplomat Ümummilli Lider Heydər Əliyev və görkəmli oftalmoloq, akademik Zərifə Əliyevanın məzarını ziyarət edib. Fəxri xiyaban ziyarəti çərçivəsində Patrisia Skotlanda ölkəmizin tarixində iz buraxmış müxtəlif mütəfəkkirlər barədə də məlumat verilib.
Daha sonra media nümayəndələri ilə görüş keçirilib. Konfransda sosial əhəmiyyətli bir sıra məsələlər müzakirə edilib.
Jurnalistlərin suallarını cavablayan qonaq bu ilin ən aktual məsələsi olan COP29-un Azərbaycanda keçirilməsinin ölkəmiz üçün böyük əhəmiyyət kəsb etdiyini qeyd edib və digər qlobal layihələrdə olduğu kimi Azərbaycanın bu mötəbər tədbirin də öhdəsindən yüksək səviyyədə gələcəyindən əminliyini ifadə edib. “Commonwealth” (Millətlər Birliyi) təşkilatının iqlim dəyişikliyi ilə mübarizə çərçivəsində mühüm işlər gördüyünü bildirən diplomat bütün dünyanın bu məsələyə həssas yanaşmalı olduğunu söyləyib. O, qlobal istiləşmə nəticəsində yaranacaq risklərin təhlükəsi barədə danışaraq, okeanlarda yerləşən kiçik ada dövlətlərin faciə ilə rastlaşa biləcəyini qeyd edib.
Patrisia Skotland Azərbaycanın “yaşıl enerji”yə keçid istiqamətində atdığı addımları diqqətlə izlədiyini, ölkəmizin günəş, külək enerjisi kimi bərpaolunan enerji mənbələrinin araşdırılması və tətbiqinin çox doğru qərar olduğunu bildirib. O, süni intellektin və digər texnologiyaların bu qədər inkişaf etdiyi dövrdə yeni fürsətlərin yarandığını söyləyib və bütün dünyanı koronavirusla mübarizədə olduğu kimi birləşməli olduğunu qeyd edib.
Sonda Azərbaycanda olduğundan məmnunluğunu ifadə edən qonaq təmsil etdiyi təşkilatın bütün dünyaya sülh və dostluq arzuladığını, iqlim böhranının da öhdəsindən gəlinəcəyinə inandığını bildirib.
Bütün xəbərlər Facebook səhifəmizdə
USD
EUR
GBP
RUB