Azərbaycan Respublikasının Gənclər və İdman Nazirliyinin dəstəyi, “Vətəndaş Cəmiyyətində Debat” (DVC) İctimai Birliyinin təşkilatçılığı, Bakı Ali Neft Məktəbinin ev sahibliyi ilə keçirilən “Bakı Gənclər Debat Forumu: Yaz, 2023”-ün qrup və seçmə mərhələsi 25 ali təhsil müəssisəsi və təşkilatı təmsil edən edən ən yaxşı 50 komandanın iştirakı ilə baş tutub. SİA xəbər verir ki, tədbirin açılış mərasimində Bakı Ali Neft Məktəbinin rektoru Elmar Qasımov, “Vətəndaş Cəmiyyətində Debat” (DVC) İB-nin sədri Ülviyyə Axundova, debat hakimləri, müxtəlif qurumların nümayəndələri və debatçı gənclər iştirak edib.
Ümummilli Lider Heydər Əliyevin 100 illiyinə həsr olunan Debat Forumun məqsədi gənclər arasında “Heydər Əliyev” irsinin təbliğ olunması, debat və natiqlik mədəniyyətinin inkişaf etdirilməsi vasitəsi ilə onların qərar vermə proseslərində, ictimai aktuallıq kəsb edən məsələlərdə, dövlət gənclər siyasətinin həyata keçirilməsində iştirakını təmin etməkdir.
İlin ən böyük Debat Forumu olan layihədə ümumilikdə 2 gün ərzində 50 komanda, 187 saat debat, 1000-dən çox gəncin spiker, hakim və auditoriya kimi iştirakı qeydə alınıb.Forumda “Bilik iqtisadiyyatına keçid edən ölkələrdə rəqabətə davamlı bazarın formalaşması üçüm süni intellektin tətbiqi şərtdir” mövzusunda debatlar aparılıb.
Forumun final mərhələsinə Azərbaycan bölməsi üzrə Azərbaycan Tibb Universitetinin komandası “TGF-Beta” və Bakı Dövlət Universitetinin komandası “Qeyd-Şərtsiz”, Rus bölməsi üzrə isə, Azərbaycan Dövlət İqtisad Universitetinin komandası “TTM” və Bakı Dövlət Universitetinin komandası “Катюша BDU” vəsiqə qazanıb.
“Bakı Gənclər Debat Forumu: Yaz, 2023” layihəsinin əsasnaməsinə uyğun olaraq fevral-aprel ayları ərzində ali təhsil müəssisələrdə debat klubların təqdimatları, təlimlər, görüşlər və seçim turnirləri olmaqla ümumilikdə 100-dən artıq fəaliyyət həyata keçirilmişdir. Bu mərhələləri uğurla keçən komandalar əsas Forumda iştirak haqqı qazanmışdır.
Qeyd edək ki, “Vətəndaş Cəmiyyətində Debat” (DVC) İctimai Birliyi 25 ildir ki, müxtəlif proqram və layihələri vasitəsilə gənclərin debat, natiqlik bacarıqlarını inkişaf etdirmək, sahibkarlığa olan marağı artırmaq, karyera imkanları qazandırmaq, gənclərin təşəbbüslərini dəstəkləməklə Azərbaycan Gənclər Siyasətinin həyata keçirilməsində rol oynayır. Təşkilat 25 illik fəaliyyəti çərçivəsində müxtəlif layihələr sayəsində 50.000-dən artıq gəncin həyatına toxunmuş, fərdi və karyera inkişafına şərait yaratmışdır.
Bütün xəbərlər Facebook səhifəmizdə
USD
EUR
GBP
RUB