Üzgüçülüyə maraq niyə azdır: maddiyyat, yoxsa ...? - ARAŞDIRMA

Su insanı sakitləşdirir və bədən ağrılarını aradan qaldırır. Suyun idmanla birləşməsi isə daha yaxşıdır. Üzgüçülük də suda edilə bilən idman növlərindən biridir. Bu idman növü aktiv əzələləri, kalori sərfiyyatı və digər faydaları ilə hər mövsümün əvəzolunmaz hissəsidir.

Üzgüçülüyün fiziki sağlamlığımız üçün faydaları nələrdir?

SİA mövzu ilə bağlı araşdırma edib.

Kalori yandırır

Şübhəsiz ki, üzməyi ən cəlbedici edən faydalardan biri də onun kalori yandırmasıdır. Ona görə də bu idman növü kalori yandıraraq formada olmaq istəyənlər üçün idealdır. 40-60 dəqiqə orta sürətlə üzmək təxminən 500 kalori yandırmağa kömək edir.

Digər tərəfdən, üzgüçülük zamanı çox səy göstərildiyi üçün maddələr mübadiləsi həddindən artıq sürətlənəcək. Bu da o deməkdir ki, üzgüçülükdən sonra kalori yanması davam edir.

Bütün əzələ qruplarını işlədir

Üzgüçülük bütün əzələ qruplarını düzgün işlədir. Bu mənada digər idman növlərindən fərqlənir. Təbii ki, bir çox idman növlərində əsas və dəstəkləyici əzələ qrupları aktivləşir. Lakin üzgüçülükdə bütün əzələ qrupları bərabər və sağlam şəkildə aktivləşir. Bu, sümük və əzələ sisteminin sağlam olması deməkdir.

Bədənin tarazlığını və koordinasiyasını artırır

Üzgüçülüyün digər bir faydası da bədən koordinasiyasını və tarazlığı artırmasıdır. Bütün üzgüçülük üslublarında ayaqlar, qollar, baş və gövdə ahənglə işləyir. Proporsional olaraq aktivləşdirilmiş əzələlər tarazlıq və bədən koordinasiyası deməkdir.

Duruşunuz yaxşılaşır

Bütün əzələ qruplarının mütənasib işləməsi yuxarıda qeyd etdiyimizdən daha çox üstünlüklərə malikdir. Üzgüçülük bədəni həddindən artıq məcbur etmir. Başqa sözlə, əzələlər və sümüklər öz qabiliyyətlərinə uyğun olaraq güc istehsal edirlər. Bu, onurğanın sağlamlığını qorumaq deməkdir. Bu mənada bel ağrılarından əziyyət çəkənlər, stolüstü işçilər və duruş problemi olanlar üçün yaxşı seçimdir.

Psixi sağlamlığa müsbət təsir edir

Üzgüçülük hər şeydən əvvəl idmandır. Bir idman növü ilə bədəni hərəkət etdirmək də birdən çox fayda gətirir. Üzgüçülük zamanı serotonin və dopamin kimi psixi sağlamlığa faydalı hormonlar ifraz olunmağa başlayır. Digər tərəfdən, suyun təravəti və yumşaqlığı sizin sakit hiss etməyə kömək edir.

İmmunitet sistemini gücləndirir

Üzgüçülük zamanı, digər idman növlərində olduğu kimi, gərginlik səbəbiylə əzələlərinizdə mikro zədələnmələr meydana gəlir. Bu mikro-zərərlər bədən tərəfindən bərpa edilərkən, immunitet sistemi hüceyrələri aktivləşir. Digər tərəfdən, üzgüçülüklə hüceyrələrə qan və oksigenin bərabər axını orqanizmin toksinlərdən xilas olmasına kömək edir.

Eyni zamanda, üzgüçülük zamanı limfa sistemi tənzimlənir, ağ qan hüceyrələri qorunur və bədəndə balanslı bir paylama meydana gəlir.

Elastikliyi artırır

Əzələ inkişafından şikayət edirsinizsə üzgüçülük sizin üçün əla seçim ola bilər. Çünki suda oynaqlar və sümüklər möhtəşəm şəkildə rahatlaşır. Bu o deməkdir ki, əzaların elastikliyi artır.

Xolesterolu balanslaşdırır

Üzgüçülük zəhmətli bir məşq olduğundan, yağ ehtiyatlarının istifadəsini təşviq edir. Bu şəkildə daha çox kalori yandırılır. Beləliklə, arzuolunmaz pis xolesterin balansda saxlanıla bilər.

Daha çox oksigen beyinə gedir

Üzgüçülük sümüklərdən, oynaqlardan və əzələlərdən daha çox şeydir. Beyin performansı üzgüçülüklə artır. Bunun səbəbi qan axınının artması və oksigenin beyinə daha sağlam bir şəkildə çatmasıdır. Bu, yaxşı yaddaş, idrak funksiyası və ayıqlıq deməkdir.

Təbii ki, üzgüçülüyün faydaları bununla bitmir. Üzgüçülük bütün yaş qrupları üçün uyğun idman növüdür. Bundan əlavə, isti yay günlərində təravətləndirmək üçün yaxşı seçimdir. Üzgüçülük hər kəsin bacara biləcəyi bir idman olduğu üçün sosiallaşmanı da artırır.

Üzgüçülüklə hansı zaman aralığında məşğul olmalıyıq?

Üzgüçülüklə məşğul olmaq üçün həftədə iki və ya üç gün bir saat vaxt ayırmaq kifayətdir.

Əgər üzgüçülüklə ciddi maraqlanmağa qərar vermisinizsə, bir sıra elementləri nəzərdən qaçırmamalısınız.

- İlk növbədə həkim nəzarətindən keçdikdən sonra üzgüçülük idmanına başlanılmalıdır.
- Həqiqi və effektiv məqsədlər qoyun.
- Müvəffəqiyyət əldə etmək üçün lazımi məşq proqramları tətbiq edilməlidir. Ayaq və qol əzələlərini gücləndirən məşqlər üzgüçülükdə daha çox uğur qazanmağa imkan verir. Bundan əlavə, düzgün nəfəs alma texnikasını tətbiq etməklə üzgüçülük performansınızı effektiv şəkildə artıra bilərsiniz.
- Həftəlik təlim proqramı hazırlanmalıdır. Fiziki sağlamlığınıza və tutumunuza uyğun olaraq həftədə 2-3 gün 30 ilə 60 dəqiqə arasında tətbiq oluna bilən məşqlər tətbiq edilməlidir.
- Tətbiq ediləcək məşqlər və təlim proqramı mütəxəssis təlimçi tərəfindən müəyyən edilməlidir.
- İstifadə olunacaq aksesuarlar (eynək, kapot və s.) rahat olmalı və çimərlik geyimi bədən tipinizə ən uyğun model və ölçüdə olmalıdır. Əks halda yaşayacağınız narahatlıq uğurunuza mənfi təsir göstərə bilər.

Üzgüçülük zamanı nələrə diqqət edilməlidir?

Üzməyi bilməklə onu düzgün tətbiq etmək arasında fərq var. Mütəxəssislər bildirirlər ki, üzgüçülük kimi idman növünə diqqət yetirilmədikdə təhlükəli ola bilər. Mütəxəssislərin tövsiyələrinə əsasən,

- Yeməkdən dərhal sonra suya girməyin. Bu vəziyyətdə mədə sancıları ola bilər. Bundan əlavə, yediyiniz qida hələ həzm olunmadığı üçün nəfəs almağınızı çətinləşdirə bilər.

- Günorta saatlarında günəş birbaşa başımızın üstündə olduğu zaman suda çox qalmamalıyıq. Əks halda suda huşunu itirmə riski ilə üzləşə bilərsiniz.

- Spirtli içki qəbul edərkən əsla üzməyin. Temperatur faktoru spirt içərkən üzgüçülük zamanı sərf olunan səylə birləşdirildikdə beyin qanaması riski artır.

Kramplar baş verdikdə nə etməli?

Üzgüçülük əsnasında kramp dediyimiz əzələ daralmaları yaşanarkən diqqət etməmiz lazım olan ilk şey təşvişə düşməmək və sakit qalmaqdır. Sakitləşdikdən sonra suyun üzərində arxa üstə uzanmaq və gərginliklə ayaqlarınızı irəli uzatmaq lazımdır. Mümkünsə, ayaqlarınızı irəli və arxaya uzatmağa çalışın.

1 saat üzgüçülük üçün sərf olunan kalorilər:
Qadın: 400-600
Kişi: 600-800

Üzgüçülüyün faydaları haqqında danışdıq. Bəs, bu qədər faydası olmasına rəğmən niyə həvəskar üzgüçülüklə az insan məşğul olur? Onlara nə əngəldir?

Gəlin, ilk öncə üzgüçülük kurslarının qiymətlərinə nəzər yetirək.

"Edem" İdman Kompleksi: "Böyüklər üçün həftədə 2 dəfə -75, həftədə 8 dəfə - 85 AZN.

13 yaşadakək uşaqlar üçün həftədə 2 dəfə -55, 3 dəfə -65 AZN.

Məşqçi ilə dərs götürdükdə isə hər dərs əlavə 3 AZN-dır.

"Atrium" İdman Kompleksi: "Kişi: Uşaqlar üçün həftədə 4 dəfə 90 AZN, 15 gün-45 AZN, 12 giriş- 75 AZN, 8 giriş- 60 AZN, 1 giriş - 10 AZN. Böyüklər üçün həftədə 4 dəfə 110 AZN, 15 gün- 55 AZN, 12 giriş- 90 AZN, 8 giriş -80 AZN, 4 giriş- 40 AZN, 1 giriş- 12 AZN.

Qadın: Uşaqlar üçün 1 ay həftədə 3 dəfə -80 AZN, 15 gün -40 AZN, 8 giriş- 60 AZN, 1 giriş-10 AZN. Böyüklər üçün həftədə 3 dəfə 110 AZN, 15 gün 55 AZN, 8 giriş- 80 AZN, 1 giriş- 12 AZN.

Fərdi qiymətlər: Uşaqlar- 8 giriş -150 AZN, 12 giriş -200 AZN, 16 giriş- 300 AZN.

Kişilər: 160, 200, 300 AZN".

Qeyd edək ki, bunlar normal qiymətə olan üzgüçülük mərkəzləridir. Bunlardan qat-qat bahalı mərkəzlər də var.

Gənclər və İdman Nazirliyi İctimaiyyətlə əlaqələr şöbəsinin müdiri Qabil Mehdiyev: “Ölkəmizdə üzgüçülük üçün ən böyük idman qurğusu Bakı Su İdmanı Sarayıdır. Dünyada ən böyük və müasir idman mərkəzlərindən biri olan bu kompleksdə su idman növlərini peşəkar səviyyədə inkişaf etdirmək üçün hər bir şərait var. Eyni zamanda, olimpiya komplekslərinin hamısında üzgüçülük hovuzları var. Bu hovuzların hər biri son vaxtlar işlək vəziyyətə gətirilib və istifadə olunur.

Yalnız, üzgüçülük hovuzlarından istifadə ödənişlidir. Çünki komplekslər təsərrüfat hesablıdırlar və üzgüçülük hovuzlarının saxlanması böyük xərc tələb edir. Lakin, bir çox olimpiya komplekslərində ödənişsiz üzgüçülük bölmələri fəaliyyət göstərir. Həmin bölmələrə karyerasını peşəkar idmançı kimi davam etdirmək istəyən şəxslər, eləcə də yarışlarda kompleksi, həmçinin ölkəmizi təmsil edəcək idmançılar ödənişsiz məşğul olurlar. Vaxtaşırı üzgüçülük bölmələri olan komplekslərdə seleksiya işləri aparılır və bacarıqlı üzgüçülər həmin bölmələrə cəlb edilirlər”.

Ayşən Vəli