Əksər müğənnilər iddia edir ki, son illər Azərbaycan şou-biznesində irəliləyiş var. Avropaya, Türkiyə ilə ayaqlaşmasalar da, bir qədər yaxınlaşdıqlarını deyirlər. Azərbaycanın xalq artisti Brilliant Dadaşova isə həm yerli, həm də Türkiyənin şou-biznesindədir. SİA-ya açıqlama verən sənətçi bu barədə apardığı müşahidələrdən söz açdı: "Mən yeniliyi sənət adamının geyimlərində, klip çəkdirməyində görmürəm. Yenilik musiqidə, ərsəyə gələn mahnının aranjemanında olmalıdır. Hərdən yeni adda mahnılar eşidirəm və bu mənə köhnə musiqilərin prototipini xatırladır. Əsil yeniliyi mən musiqidə, mahnılarda görmək istəyirəm. Amma bu təkrarçılıqları mən yenilik olaraq qəbul etmirəm. Mənim üçün həmişə keyfiyyət amili önəmli olub. Bilirsiniz musiqini dinləyiciyə çatdırmaq üçün müğənni gərək sözün məcazi mənasında ac olsun. Tamaşaçı da onun mahnılarından qidalana bilsin.
Müğənni toy bazarına da toxundu: "Nə yaxşı ki bizdə xalq məclisləri, yəni, toylar var. Biz hələ ki, sovetin qalığını üzərimizdən yox edə, təzəni isə hələ yarada bilməmişik. Əslində müğənni çəkildiyi reklamdan, televiziya proqramından, konsertlər, diskllərin satışından pul qazanmalıdır. Bunların heç biri olmadığı üçün yeganə gəlir mənbəyi toylar qalır. Albomların aqibəti isə daha acınacaqlıdır. Külli miqdarda pul yatırılır, bir müddət sonra piratların buraxılışında satışa çıxarılır. Ünvanı təqdim edilən nömrəyə zəng vurursan telefon ömür boyu susur. Elə bil ki, disk qaranlıq bir dünyadan, naməlum bir obyektdən çıxıb gəlib. Bir də baxırsan ki, aylar, bəzən illərlə çəkdiyin zəhmət başının üstündən kiminsə mədəsinə yağlı tikə kimi ötürülür. Müğənni baxa-baxa qalır. Bir misal çəkim. Türk sənətçisi Seda Sayan son bir ildə 2 milyon dollar vergi ödəyib. O, sadalayır ki, reklam şirkətindən qazandığı puldan, televiziya kanalı ilə bağladığı bir illik müqavilədən, bir-iki filmdən, jurnallara müsahibəsindən - qeyd edim ki, bir jurnaldan 30 min, digərindən 50 min dollar alıb, müsahibə verib, fotoları çəkilib və bunların müqabilində də 2 milyon dollar vergi ödəyib. Görün nə qədər qazanıb ki, bu qədər vergi ödəyib! Biz nədən qazanırıq, sizin dediyiniz kimi toylardan. Bizim müğənnilər bu cür gəlirlə, ayaq üstə dayana bilirlər. Çünki sənətin tələbləri çoxdur. Əgər bir aranjemana 4-5 min manat pul ödəyirsənsə, bir klip çəkilişi üçün 15 min manat tələb olunursa, bir toydan qazandığın 8-10 min manat bunların hansına yetməlidir? Bu pul çox ehtiyaclara sərf olunur. Eyni zamanda da ailə dolandıranlar var. Adi bir mahnını meydana çıxarmaq üçün bir neçə proseslərdən keçir. Bunun hamısı pul deməkdir. 10 il əvvəl yeni mahnı bir sintezatorun imkanları çərçivəsində aranjeman olunurdusa, bu gün insanlar fərqli, yeni bir musiqilər eşitmək istəyirlər. İndiki sənətçilər istəyir ki, mahnı yazılarkən 20 skripkaçı çalsın, necə ki, mənim "Masal dünyam" albomumdakı kimi. Hələ digər alətləri demirəm. Hamısı pul tələb edir. Bir sözlə, burada yeni iş görmək üçün qazandığın pulları ancaq yaradıcılığına xərcləməlisən. Böyük işlər üçünsə daha böyük pullar lazımdır".
Bütün xəbərlər Facebook səhifəmizdə
USD
EUR
GBP
RUB
