Nura Suri növbəti məhkəməyə hazırlaşır

24 Sentyabr 2011 11:40 | 1 631

SIA artıq xəbər vermişdi ki, müğənni Nura Surinin keçmiş əri İran vətəndaşı Əlirza Suri ilə soyad davasına çıxıb.

Bütün bu söz-söhbətlərdə günahkar olaraq müğənni keçmiş ərinin Azərbaycandakı vəkili Telman Qasımovu və "Olaylar" İnformasiya Agentliyini hesab edir. Bununla bağlı Nura redaksiyamıza açıq məktub yollayıb. Məktubu olduğu kimi SİA oxucularına təqdim edirik:

"07 sentyabr 2011-ci il tarixdə "Olaylar" İnformasiya Agentliyinə məxsus olan "olaylar.az" saytında mənim barəmdə həqiqətə uyğun olmayan, şəxsi və ailə həyatımın sirrini pozan informasiya dərc edilmişdir. Redaksiyaya ünvanlanan məktubun müəllifinin məhz Əlirza Suri olması məndə şübhə doğururdu. Axı, Azərbaycan dilini, onun qrammatikasını bilməyən İran İslam Respublikası vətəndaşı elmi-publisist üslubda, heç bir qrammatik səhvə yol vermədən doğma dilimizdə necə məktub yaza bilər?

Üstəlik barəmdə yayımlanan məqalənin 15 mart 2003-cü il tarixli Azərbaycan jurnalistlərinin birinci qurultayında qəbul edilmiş Azərbaycan Jurnalistlərinin Peşə Davranışı Qaydalarının 3.2-ci (jurnalist görüşdüyü, haqqında yazdığı hər bir şəxsin şərəf və ləyaqətinə, şəxsi həyatının toxunulmazlığı prinsipinə hörmətlə yanaşmalıdır) və 3.3-cü bəndini (jurnalist vətəndaşların şəxsi həyatına aid faktları, onlar cəmiyyətin maraqlarına toxunmursa, hüquqa zidd deyilsə və ya ictimai əhəmiyyət kəsb etmirsə, özlərinin razılığı olmadan yaya bilməz) pozması faktı da nəzərə alınsa, əslində məqalənin yayımlanmasında kimlərinsə maraqlı olması açıq surətdə bəlli idi.

Məhz bu səbəbdən məlumatı ilkin olaraq dərc etmiş "Olaylar.az" saytının rəhbər şəxsi Yunus Oğuza "İnformasiya əldə etmək haqqında" Azərbaycan Respublikası Qanunun 13.1.1-ci maddəsini əsas tutaraq 08.09.2011 tarixində şifahi müraciət edib istinad olunmuş məktubun surətinin bizə təqdim edilməsini xahiş etdim. Lakin mənə "daxili qaydalar əsasında bunun mümkün olmadığı" bildirildi.

"İnformasiya əldə etmək haqqında" Azərbaycan Respublikası Qanunun 2.4.-cü maddəsini (fiziki şəxslərin özləri barəsindəki sənədləşdirilmiş informasiya, informasiyadan kimlərin və hansı məqsədlə istifadə etdiyini öyrənmək hüququ vardır) əsas tutaraq agentliyə həm elektron, həm də 12.09.2011 tarixində yazılı surətdə müraciət etdik.

Çox təəssüflər ki, həmin Qanunun 24.1-ci maddəsində sorğunun ən qısa müddətdə, lakin 7 iş günündən gec olmayaraq icra edilməli olmasının müəyyən edilməsinə baxmayaraq, bu günədək dərc olunmuş məktubun əsli və ya surəti bizə təqdim edilməyib. Agentlikdən icranın gecikdirilməsi halına son verilməsini tələb etdikdə isə hüquqlarımı pozduqları üçün barələrində ərizə ilə məhkəməyə müraciət etməmizə dair israrın şahidi olduq.

Ümid edirəm ki, qarşılaşdığım bütün bu anlaşılmazlıqlara qanuni tələblər nəzərə alınmaqla tez bir zamanda son veriləcək.