İyulun 9-da tanınmış iş adamı Araz Ağalarovun Nardarandakı "Sea Breeze Resort" butik otelinin təntənəli açılış mərasimi keçirilib. SİA-nın məlumatına görə, mərasimin Rusiyada yaşayan azərbaycanlı müğənni Emin Ağalarovun təşkil etdiyi konsert proqramı ilə yadda qalıb.
Mərasimdə 4 ildir Azərbycanı mötəbər mahnı yarışması "Eurovision"da təmsil edən iştirakçılar Eminlə eyni səhnəni bölüşdülər.
Şoumen Murad Dadaşovun aparıcılıq etdiyi mərasimdə ilk olaraq səhnəyə "Eurovision-2008" mahnı müsabiqəsində Azərbaycan təmsil etmiş Elnur Hüseynov və Samir Cavadzadə çıxıbləar, onlar "Day after day" mahnısını ifa ediblər. Elnur və Samirin çıxışı əvvəlcədən nəzərdə tutulmadığından onların ifası sürpriz kimi qarşılanıb. Daha sonra 2010-cu ildə Azərbaycanı sözügedən müsabiqədə təmsil edən Səfurə Əlizadə rəqs qrupunun müşayiəti ilə "Drip drop" və digər iki mahnısını ifa edib.
Müsabiqədə Azərbaycana üçüncülük gətirən Aysel Teymurzadə səhnəyə də üçüncü çıxıb. Aysel "Always"lə yanaşı, "Falling" və bu yayın hiti olan "Tonight"ı ifa edib. Aysel tədbirdə iştirakından məmnunluq duyduğunu bildirib, otelin açılışı münasibətilə hamını təbrik edib.
"Eurovision" müsabiqəsində Azərbaycana qələbə sevinci yaşadan Eldar Qasımov və Nigar Camal isə mərasimdə bütün Avropada dillər əzbərinə çevrilmiş "Running Scared" mahnısını ifa ediblər. Hər bir "Eurovision" təmsilçimizin ifası zamanı müsabiqədə istifadə olunmuş səhnə effektləri nümayiş etdirilib.
Sonuncu ifaçı olaraq isə səhnəyə Rusiyada yaşayan azərbaycanlı iş adamı və müğənni Emin Ağalarov çıxıb. Emin səhnədə öz musiqiçiləri və bek-vokalçıları ilə çıxış edib. Emin həyatında ən önəmli insan kimi atasının adını çəkib, Araz Ağalarova sonsuz hörmət bəslədiyini deyib. Həyatında növbəti önəmli şəxs kimi isə o, dahi sənətkar Müslüm Maqomayevin adını çəkib, ifa etdiyi "My way" mahnısını ustadına həsr edib. Emin Ağalarov "Eurovision" iştirakçılarına da təşəkkür bildirib, Eldar və Nigarı qələbə münasibəti ilə bir daha təbrik edib: "Bu müsabiqədə Azərbaycan hər zaman seçilib. Bu gün siz bu səhnədə onların hər birini izlədiniz. Qalibiyyət isə möhtəşəm idi. Eldar və Nigara bu sevinci bizə yaşatdıqlarına görə bir daha təşəkkür edirəm. Ən sevindirici hal odur ki, Azərbaycan gələn il bu müsabiqəyə ev sahibliyi edəcək. Hər şeyin möhtəşəm olacağına əminəm. Çünki Azərbaycan möhtəşəm diyardır".
Emin Ağalarov konsertdə daha bir neçə mahnı ifa edib.
Bir saata yaxın səhnədə olan Emin çıxışının sonunda yenə də Müslüm Maqomayevi xatırlayıb. O, konsertə sənətkarın ifasında "Ey əziz anam Azərbaycan" mahnısı ilə yekun vurub. Müslüm Maqomayevin ifası altında isə otelin açılışı münasibətilə möhtəşəm atəşfəşanlıq olub.
Bütün xəbərlər Facebook səhifəmizdə
USD
EUR
GBP
RUB