Tariximizə Vətən müharibəsi kimi həkk olunan savaşda od-alov püskürən cəbhələrdə ölümlə üz-üzə dayanan, qəhrəmanlıq göstərən vətənin mərd oğulları "ya qazi, ya da şəhid olub, bu torpağı işğaldan azad etməliyik", - deyib savaş meydanına atıldılar. Azərbaycan, sənin işıqlı gələcəyin, istiqlalın, azadlıq günəşinin doğması üçün torpağına qanlar axıdıldı. Canından, qanından keçən neçə-neçə igid oğul torpağın şirəsindən, qanla yoğrulmuş hər qarışından güc aldı. Vətən oğulları Azərbaycanın qoynunda Milli Qəhrəman oldular, qanları ilə torpağı suvararaq Şəhid oldular, Qazi oldular. Can fəda edib, əzəli torpaqlarımızda üç rəngli bayrağımızı dalğalandırdılar.
44 günlük Vətən müharibəsi. Qısa zaman və tarixi qələbə. Vətən müharibəsi qazisi Hüseyn İslam oğlu Mustafayev də bu məsləklə müharibənin amansız qoynuna atıldı. 29 yaşlı gənc heç nəyi gözə almadan düşməndən intiqam almaq üçün müharibənin ən qaynar nöqtələrində düşmənlə üz-üzə vuruşdu. Bu torpağın şah budaqları olan belə oğullarımız vətənin çətin günündə silaha sarılıb gecəli-gündüzlü Odlar diyarının müdafiəsində durdular. Vətən daşı onların isti yuvsına çevrildi.
1991-ci ilin iyulun 30-da Tovuz rayonunun Xatinli kəndində anadan olan Hüseyn ilk təhsilini Tovuz rayon Xatınlı kənd Firuddin Qasımov adına tam orta məktəbində alıb. Bizim qəhrəman Hüseyn 2011-ci ildən Xüsusi Təyinatlı Qüvvələrdə (XTQ) gizir kimi fəaliyyət göstərib. Hüseyn seçilmişlər arasında dünyanın bir çox ölkələrində, Türkiyənin İzmir şəhərində, Moskvada, Pakistanda və Bakıda təlimlərdə olub. Bu təlimlərdə yaxşı nəticə göstərdiyinə görə hər bir ölkədə medal və diplomlarla təltif edilib. 2016-ci ildə İzmirdə Efes yarışmasında ölkələr arasında keçirilən yarışda, eləcə də 2020-ci ildə Moskva şəhərində keçirilən Qələbənin 75 illiyinə həsr olunmuş Hərbi Paradda iştirak edib.
Hüseyn Mustafayev 27 sentyabr 2020-ci ildə Vətən müharibəsi başlayan gündən ön cəbhədə vuruşub. Döyüş meydanında ölümün gözünə dik baxaraq, son nəfəsinə qədər düşmənlə vuruşacağına söz verib. İlk öncə Murovdağ istiqamətində gedən döyüşlərdə kəllə-beyin travması alıb. Buna baxmayaraq, döyüş yolunun davam etdirib. Sonra Füzuli istiqamətində gedən döyüşlərdə ayağından yaralanıb, amma geri çəkilməyib, Mübariz ruhu onu sarsıda bilməyib. Daha sonra Xocavənd rayonunun Qırmızı Bazar qəsəbəsində düşmənin minamyotdan açdığı atəş nəticəsində ağır yaralanıb və geri təxris olunub. Hərbi xəstəxanada uzun müddət müalicə olunub. “Yaşat” Fondunun maddi dəstəyi ilə əməliyyat olunsada sağlamlığı tam bərpa olunmayıb. Yaxınlarının dediyinə görə, beynində yaddaş pozğunluğu var. Qazinin sağlamlığını tam bərpa etmək üçün xarici ölkələrdən birində müalicə kursu keçirməsinə ehtiyac var. Bunu üçün böyük məbləğdə pul tələb olunur. Qohumları müvafiq qurumlardan və xeyirxah insanlardan Vətən müharibəsi qazisi Hüseyn Mustafayevə kömək etmələrini xahiş edirlər. Onu da bildirilər ki, dövlət onların ailəsinə və H.Mustafayevə lazım olan bütün maddi və mənəvi dəstəyi göstərir. Onu da qeyd edək ki, qazinin Vətən uğurunda göstərdiyi şücaət və döyüş tapşırıqlarını qəhrəmanlıqla yerinə yetirdinə görə, dövlətimiz tərəfindən orden və medallarla təltif olunub.
Təbii ki, 44 günlük müharibəsində od-alov içində vuruşan Hüseyn kimi oğullarımız böyük qürur və dəyanət, şücaət və əzmkarlıq nümayiş etdirdilər. Əlbəttə ki, müharibə böyük itki, təlafatdır. Xalqımız savaşı - bu tarixi də yaşadı. Şəhidlərimiz də oldu, qazilərimiz də. Bu gün haqqında söz açdığımız qazilərimizdən olan Hüseyn Mustafayevin həyat və döyüş yolu bir hekayədir. Bir qəhrəman oğulun yaşadığı real döyüş səhnələrinin hekayəsi. Ermənilərin vəhşiliyini, vandallığını lap kiçik yaşlarından anlamış Hüseyn kiçik yaşlarından ermənilərin azərbaycanlılara verdiyi zülm nəticəsində doğma torpaqlarını tərk etmək məcburiyyətində qaldıqlarını görmüş və intiqam hissi onu tərk etməmişdir. Vətən belə oğulları ilə qürur duyur. Onların hər bir xalqımızın fəxarətlə adlarını çəkdiyi mərd oğullardır.
Baş verən hadisələrin, müharibənin şahidi və iştirakçısı olan qazimiz Hüseyn İslam oğlu Mustafayev fədakarlıq və ərənliklə torpaqlarımızın işğaldan azad olunması uğrunda vuruşub. Xalqımıza başucalığı gətirən bir tarixin yazılmasında onun da şücaəti var.
Əlbəttə ki, hər bir insan sülh, əmin-amanlıq içində yaşamaq, səmasının aydın, torpağının rahat nəfəsini duymaq istər. Bu gün səmamızın aydın olmasında belə oğulların qəhrəmanlığı var və onların ismi şərəf və vüqar lövhəmizə əbədi həkk olunub.
Nəzakət ƏLƏDDİNQIZI
Bütün xəbərlər Facebook səhifəmizdə
USD
EUR
GBP
RUB