Niderlandda “Xocalıya ədalət!” tələbinin əks olunduğu lövhə quraşdırılıb və aksiya keçirilib FOTOLAR

Diasporla İş üzrə Dövlət Komitəsinin dəstəyi ilə, Niderland-Belçika Azərbaycanlılarının Koordinasiya Şurasının əlaqələndiricisi Emil Əliyevin təşkilatçılığı ilə ilk dəfə "Xocalıya ədalət!" tələbinin əks olunduğu lövhə Niderland Krallığında quraşdırılıb. Diasporla İş üzrə Dövlət Komitəsindən SİA-ya bildirilib ki, lövhə Amsterdam-Den Bosch şəhərləri istiqamətində gedən avtomagistralda yerləşdirilib.

Erməni silahlı birləşmələrinin 1992-ci il fevralın 25-dən 26-na keçən gecə azərbaycanlılara qarşı törətdikləri soyqırımına diqqəti cəlb etmək məqsədilə lövhədə https://justiceforkhojaly.org/ portalı da göstərilib.

Eyni zamanda, Niderland-Belçika Azərbaycanlıları Koordinasiya Şurasının təşkilatçılığı ilə Niderland Krallığında fəaliyyət göstərən Azərbaycan diasporunun bir qrup nümayəndəsi Xocalı soyqırımının 29-cu ildönümü ilə əlaqədar Haaqa şəhərindəki Ermənistan səfirliyinin qarşısında "səssiz" etiraz aksiyası keçiriblər.

Aksiya zamanı "Xocalıya ədalət!" şüarı, erməni yazıçıları Zori Balayanın, David Xerdiyanın Xocalı soyqırımını ermənilərin törətməsi barədə etiraflarının yazıldığı plakatlar nümayiş etdirilib və səssiz etirazın rəmzi olan ağ rəngli şarlar havaya buraxılıb. Aksiya Xocalı soyqırımına etiraz bəyanatının səfirliyin poçt qutusuna atılması ilə yekunlaşıb. Konvertin üzərinə "Xocalıya ədalət!" tələbinin əks olunduğu marka yapışdırılıb.

Müəllif: Ceyhun Rasimoğlu

Bütün xəbərlər Facebook səhifəmizdə

loading...