Mayın 7-də görkəmli alim, jurnalist və ictimai xadim Tofiq Rüstəmovun 75 illiyi ilə bağlı anım mərasimi keçiriləcək. Mətbuat Şurasından SİA-ya verilən xəbərə görə, mərhumun doğulduğu Quba rayonunda baş tutacaq toplantıda Azərbaycan Mətbuat Şurası İdarə Heyətinin üzvləri, Bakı Dövlət Universitetinin jurnalistika fakültəsinin müəllimləri, yerli icra hakimiyyətinin nümayəndələri və kütləvi informasiya vasitələrinin təmsilçiləri iştirak edəcəklər.
Qeyd edək ki, T. Rüstəmov 1953-cü ildə Azərbaycan Dövlət Universitetinin jurnalistika şöbəsinə daxil olub. Ali təhsilini başa vurandan sonra sovet dövrünün ən nüfuzlu qəzetlərindən sayılan "Uçitelskaya qazeta"nın respublikamızda xüsusi müxbiri işləyib. Mərhumun jurnalistik fəaliyyətinin 10 ili Azərbaycan Dövlət Televiziya və Radio Verilişləri Komitəsində keçib. Burada o, tərcüməçilikdən informasiya verilişləri baş redaksiyasının baş redaktoru vəzifəsinədək yüksəlib. Şəxsi təşəbbüsü və axtarışları sayəsində dönə-dönə xatırlanan "Ulduz" radio proqramı ərsəyə gəlib. Səmərəli fəaliyyətinə görə 1967-ci ildə Azərbaycan Jurnalistlər İttifaqının "Qızıl qələm" mükafatına layiq görülüb. Müxtəlif illərdə Azərbaycan Jurnalistlər İttifaqı İdarə Heyətinin katibi, ADU-nun partiya komitəsinin katibi, Azərbaycan KP MK-nın ideologiya şöbəsinin müdiri, Azərbaycan SSR Ali Sovetinin deputatı və Milli Məclisin üzvü olub. 1990-1995-ci illərdə "Kommunist" ("Xalq qəzeti") qəzetinin baş redaktoru vəzifəsində çalışıb.
Bütün xəbərlər Facebook səhifəmizdə
USD
EUR
GBP
RUB