Fevralın 24-də Mərkəzi Seçki Komissiyasının (MSK) yeni tərkibdə ilk iclası keçirilib.
MSK-nın mətbuat xidmətindən SİA-ya verilən xəbərə görə, iclasda təşkilati məsələyə baxılmış, qurumun sədri, müavini və iki katibi seçilib. Azərbaycan Respublikası Prezidenti Administrasiyasının rəhbəri Ramiz Mehdiyev iclasda iştirak edib.
Mərkəzi Seçki Komissiyasının yeni tərkibinin Milli Məclis tərəfindən təsdiq edildiyini nəzərə çatdıran Ramiz Mehdiyev MSK-nın üzvü olan 18 nəfərin ölkənin ictimai-siyasi həyatında vacib rol oynayan şəxslər olduğunu bildirib. Son beş ildə MSK-nın yaxşı işlədiyini və qanunvericiliyə uyğun fəaliyyət göstərdiyini vurğulayan Prezident Administrasiyasının rəhbəri əmin olduğunu bildirib ki, komissiya qazandığı təcrübədən istifadə edərək gələcəkdə də yaxşı nəticələr əldə edəcəkdir.
Azərbaycan Prezidenti İlham Əliyevin MSK-ya göstərdiyi diqqətdən söhbət açan Ramiz Mehdiyev deyib ki, məhz dövlətimizin başçısının daimi qayğısı sayəsində mərkəzi və aşağı seçki komissiyalarına seçki qanunvericiliyinin tələblərinə uyğun fəaliyyət göstərmələri üçün hərtərəfli şərait yaradılmış, komissiya üzvlərinin əməkhaqqları artırılmış, MSK üçün ən müasir informasiya-kommunikasıya avadanlıqları ilə təchiz edilmiş gözəl, yaraşıqlı bina istifadəyə verilib. Bu diqqət və qayğının bundan sonra da davam etdiriləcəyini bildirən Administrasiya rəhbəri komissiya üzvlərinə gələcək fəaliyyətlərində uğurlar arzulayıb.
Sonra açıq səsvermə yolu ilə Mərkəzi Seçki Komissiyası sədrinin, sədr müavininin və katiblərinin seçkisi keçirilib. Məzahir Pənahov yekdilliklə Mərkəzi Seçki Komissiyasının sədri seçilib. Natiq Məmmədov MSK sədrinin müavini, Arifə Muxtarova Milli Məclisdə heç bir partiya mənsubiyyəti olmayan müstəqil deputatları, Mikayıl Rəhimov isə parlamentdə deputatları azlıq təşkil edən siyasi partiyaları təmsil edən MSK katibləri seçiliblər.
Bütün xəbərlər Facebook səhifəmizdə
USD
EUR
GBP
RUB