“Paşinyan cinayətkar Koçaryan və Sarkisyandan heç nə ilə fərqlənmir” MÜSAHİBƏ

Millət vəkili Eldəniz Səlimovun SİA-ya müsahibəsi

- Eldəniz müəllim Nikol Paşinyanın Dağlıq Qarabağa səfəri və orada mitinqçilər önündə separatçı çıxışlar etməsini daxili auditoriyaya hesablanan populist çıxışlar hesab etmək olar?

- Hesab edirəm ki, nəinki işğalçı və təcavüzkar ölkənin rəhbərinin, bütövlükdə heç kəsin Azərbaycanın rəsmi icazəsi və razılığı olmadan işğal altında olan Dağlıq Qarabağa səfəri, orada qondarma və separatçı rejimlə bir araya gəlməsi, işbirliyi qurması, yaxud, orada hansısa tədbirinin keçirilməsinə cəhd edilməsi yolverilməzdir, qəbulolunmazdır, bağışlanılmazdır, qanunsuzdur, beynəlxalq hüquq normalarının açıq və kobud şəkildə pozulmasıdır, cinayət əməlidir. Dağlıq Qarabağ və ona bitişik bir neçə rayon 26 ildən çoxdur ki, Ermənistan tərəfindən işğal altındadır, həmin ərazilərdə Azərbaycanın suveren hüquqları açıq və kobud şəkildə pozulub, tapdalanıb. İşğalçı Ermənistan və onun havadarlarının yaratdığı qondarma və separatçı rejim də bu illər ərzində irəliyə, konstruktivliyə, münaqişənin sülh və danışıqlar yolu ilə həllinə doğru bircə addım olsun belə atmayıblar, əksinə, münaqişənin həllinin uzadılmasına, status-kovunun qalmasına, ədalətin, sülhün bərpa olunmasına qarşı fəaliyyət göstərib, bu yöndə hər cür təxribatçılıq əməllərinə əl atıblar.

- Münaqişənin sülh yolu ilə həllində vasitəçilik missiyasını həyata keçirən ATƏT-in Minsk Qrupunun həmsədrlərinin Paşinyanın təxribatçı çıxışlarına susqunluqla yanaşması nədən irəli gəlir?

- Dünya ictimaiyyəti, beynəlxalq birlik, ATƏT-in Minsk Qrupu və həmsədrləri sadəcə, seyrçi, laqeyd, etinasız mövqe nümayiş etdirməklə məşğul olurlar. Onlar Ermənistanın, qondarma rejimin cəzalandırılması üçün heç bir əməli və tutarlı addım atmayıblar, əksinə, bir çox hallarda işğalçı və təcavüzkarı, qondarma rejimi növbəti fitnəkarlıqlara stimullaşdırıblar, işğalçı ilə işğala məruz qalanı eyniləşdiriblər. İşğal altında olan Azərbaycan torpaqlarına qanunsuz səfərlərə saymazyana münasibət göstəriblər, özlərini görməməzliyə, eşitməməzliyə vurublar. Dəfələrlə bu və digər ölkələrin, bəzi beynəlxalq qurumların, xarici şirkətlərin nümayəndələri, elə Minsk Qrupuna daxil olan dövlətlərin özlərinin bir sıra təmsilçiləri, siyasət, dövlət, iş, sənət adamları Azərbaycanın heç bir razılığı və icazəsi olmadan Dağlıq Qarabağa qanunsuz səfər ediblər, Azərbaycanın qanunlarını və beynəlxalq hüquq normalarını açıq-aşkar şəkildə tapdalayıblar. Bununla da bağlı Azərbaycan dövləti Xarici İşlər Nazirliyi səviyyəsində dəfələrlə öz kəskin etirazlarını, xəbərdarlıqlarını bəyan edib, Dağlıq Qarabağa qanunsuz səfər edən və orada işbirliyinə gedənləri “arzuolunmaz şəxslər” siyahısına-“qara siyahı”ya salıb. Əməllərindən səmimi şəkildə peşman olanları, səhvlərini rəsmi şəkildə etiraf edənləri isə bağışlayaraq, həmin siyahılardan çıxarıb. Amma çox təəssüflər olsun ki, Dağlıq Qarabağa qanunsuz səfərlər yenə də davam edir, yenə də orada qanunsuz görüşlər, mərasimlər, təbdirlər keçirilir, yenə də dünya birliyi, beynəlxalq qurumlar, ən əsası, Minsk Qrupu və həmsədrlər səssiz qalır, susur, görməzdən, eşitməzdən gəlirlər. Bu isə bir çoxlarını növbəti qanunsuzluğa, cinayət əməllərinə həvəsləndirir və şirnikləndirir. Odur ki, işğalçı və təcavüzkar Ermənistanın hərdəmxəyal, bir sözü ilə o biri sözü düz gəlməyən, gah “Qarabağ münaqişəsinin bizə aidiyyatı yoxdur, bu, Azərbaycanla Dağlıq Qarabağ erməniləri arasında baş verən münaqişədir, özləri münaqişəni tərəflər olaraq həll etsinlər”, gah da “Qarabağ Ermənistanındır, Ermənistana birləşdirilməlidir” və sair deyən, sərsəmləyən Nikol Paşinyanın Azərbaycanın işğal olunmuş ərazilərinə növbəti dəfə səfər, Xankəndidə mitinq keçirərək, münaqişənin alovlandırılmasına yönəlik çıxış etməsi, fikirlər söyləməsi, həmçinin, “ümumerməni oyunları” adlı cəfəng və bədnam tədbirin keçirilməsinə cəhd göstərilməsi həyasızlıqdır, boşboğazlıqdır, qanunsuzluqdur, ən əsası cinayət əməlidir. Paşinyan bu addımı ilə özündən əvvəlki cinayətkar Ermənistan rəhbərlərindən, Koçaryan və Sarkisyandan heç nə ilə fərqlənmədiyini göstərdi, bu səfəri ilə növbəti cinayət əməlinə əl atdı, növbəti dəfə beynəlxalq hüquq normalarına açıq-aşkar sayğısızlığını nümayiş etdirdi, beynəlxalq hüquqa meydan oxudu.

- Paşinyanın təxribatlarına sərt cavab verilməsinin məqamının yetişdiyini demək olarmı?

- Hesab edirəm ki, Paşinyanın bu əməlinin, bu təxribatının cavabı verilməlidir, özü də onun anladığı və anlayacağı bir dildə. Xüsusilə də, münaqişənin illərdir uzadılmasına, uzanmasına səbəb olan Minsk qrupu və həmsədrlər Ermənistan rəhbərinin bu qanunsuz, cinayət, təxribatçılıq əməllərinə, həyasızlığına ciddi şəkildə reaksiya göstərməli və öz cəza, təzyiq, təsir mexanizmlərini işə salmalıdırlar. Artıq onların yalançı vədlərindən, boşboğazlıqlarından bezmişik. Nəhayət, öz qəti sözlərini deməli, haqq, etiraz səslərini ucaltmalı, Ermənistanı, onun cinayətkar rəhbərliyini, siyasi elitasını növbəti cinayət əməllərindən birdəfəlik çəkindirməlidirlər. Azərbaycan xalqı və dövləti öz Ordusu ilə Ali Baş Komandanın istənilən əmrinə istənilən an hazırdır. Azərbaycan xalqı, Azərbaycan dövləti, Azərbaycan Ordusu Ali Baş Komandanın əmri ilə 2016-cı ilin Aprel hadisələrində olduğu kimi, yenə də günlərin birində və bir an içində öz gücünü, öz qətiyyətini göstərməyə qadirdir. unu Ermənistan da, ermənilər də, onların açıq-gizli havadarları da çox yaxşı bilirlər. Yaxşı bilirlər ki, Azərbaycan istənilən anda istənilən yolla öz torpaqlarını azad etmək qüdrətindədir və bir gün də bunu edəcək, bir daha öz qüdrətini nümayiş etdirəcək, Ermənistana, separatçılara gərəkən cavabını verəcək. Ancaq biz yenə də qan axıdılmasının, müharibə variantının əleyhinəyik, istəyirik ki, münaqişə sülh və danışıqlar yolu ilə ədalətli şəkildə həllini tapsın. Odur ki, avantürst erməni siyasətçiləri və rəhbərləri başda da Paşinyan olmaqla – bir an olmayan ağıllarını başlarına toplamalı, Azərbaycanın işğal olunmuş ərazilərinə qanunsuz səfərləri, qanunsuz tədbirləri durdurmalı, işğala və təcavüzə son qoymalıdılar. Etməsələr, özləri peşman olacaqlar.

GÜLYANƏ