ATƏT-in Demokratik Təsisatlar və İnsan Haqları Bürosunun parlament seçkilərini müşahidə missiyası növbəti aralıq hesabatını açıqlayıb
Azərbaycanda noyabrın 7-də keçiriləcək parlament seçkilərinin gedişini müşahidə edən ATƏT-in Demokratik Təsisatlar və İnsan Haqları Bürosunun müşahidə missiyası ikinci aralıq hesabatını açıqlayıb. SİA-nın məlumatına görə, hesabatda Mərkəzi Seçki Komissiyası seçkilərə hazırlıq prosesini aktiv şəkildə davam etdirildiyi bildirilir. Eyni zamanda hesabatda göstərilib ki: "MSK-nın iclasları kütləvi informasiya vasitələrinin nümayəndələri və müşahidəçilər üçün açıqdır. MSK seçicilər, aşağı səviyyəli seçki qurumları və polis əməkdaşları üçün maarifləndirmə işlərini davam etdirir. Mərkəzi Seçki Komissiyası həmçinin seçici siyahılarının təkmilləşdirilməsi istiqamətində ciddi səylər göstərir. Seçici siyahıları seçicilər üçün açıqdır və seçki məntəqələrində seçicilərin sərbəst şəkildə tanış ola biləcəyi yerlərdə asılıb. Seçicilərə siyahıda özləri ilə bağlı yanlış məlumatları düzəltmək imkanı yaradılıb".
Hesabatda namizədliyin qeydə alınması ilə bağlı problemlərdə əksə olunub: "Namizədliyin qeydə alınmasından imtinaya dair qərarların əksəriyyəti Seçki Məcəlləsinin müddəalarının düzgün interpretasiya olunmaması ilə əlaqədardır. Dairə Seçki Komissiyalarının namizədi qeydə almaqdan imtina qərarlarını əsasən namizədlərin lehinə toplanmış imzaların yoxlanması nəticəsində veriblər. Bir çox imzalar şəxsiyyət vəsiqəsinin müddəti keçdiyinə görə etibarsız sayılıb. Missiya hesab edir ki, bu yanaşma namizədin qeydə alınmasından imtina üçün əsas sayıla bilməz. Çünki namizədlərin əksəriyyətinə hansı imzaların qanuni qüvvə daşıdığı barədə məlumat verilməyib".
Müşahidə missiyası seçki prosesinin sakit məcrada keçdiyini bildirir. Bundan başqa, missiyaya namizədlərə imza vermiş vətəndaşlara və onların qohumlarına təsir edilməsi ilə bağlı məlumatlar daxil olub. Müşahidəçilər həmçinin bəzi hallarda namizədlərin seçki kampaniyalarına polis və yerli orqanlar tərəfindən müdaxilə edilməsi barədə də məlumat verirlər. Hesabatda qeyd olunur ki, seçki kampaniyasının kütləvi informasiya vasitələrində işıqlandırılması yenə də məhdud xarakter daşıyır.
Aralıq hesabatda həmçinin bildirilir ki, oktyabrın 25-dən başlayaraq Mərkəzi Seçki Komissiyası daxil olan 224 şikayəti araşdırıb: "MSK 42 şikayəti təmin edib, şikayətlərə baxılması prosesi sürətlə və heç bir müzakirə aparılmadan həyata keçirilir. Seçki qurumları namizədləri çox nadir hallarda komissiyaların iclaslarına çağırırlar. Bakı Apellyasiya Məhkəməsi bu günə kimi namizədliyin qeydə alınmaması ilə bağlı 50-dən artıq şikayətə baxıb və onların hamısını rədd edib".
Bütün xəbərlər Facebook səhifəmizdə
USD
EUR
GBP
RUB