"Demokratik hüquqi dövlətin qurluşunun, inkişafının əsas prinsipləri məhz Konstitusiyada təsbit olunur. Konstitusiyamız öz fundamental mahiyyətinə görə dövlət idarəetmə mexanizmləri ilə cəmiyyət arasındakı münasibətləri müəyyən edən başlıca hüquqi bazadır". Bu fikirləri SİA-ya Yeni Azərbaycan Partiyası Gənclər Birliyinin (YAP GB) fəalı Cəbrail Fərzəliyev sentyabrın 26-da keçiriləcək Referendum – ümumxalq seçkiləri ilə bağlı münasibətini bildirərkən deyib.
"Dövlətin dayağını təşkil edən hüquqi sistemlə sosial sistemin qarşılıqlı harmonik münasibətlərinin təmin edilməsi Konstitusiyanın və onun təsbit etdiyi qanunların işləkliyindən, daim təkmilləşən funksionallığından əhəmiyyətli dərəcədə asılıdır"-deyə qeyd edən gənc fəal bildirib ki, artıq, müasir inkişaf tendensiyası ilə ayaqlaşmayan bir sıra qanunvericilik aktları çoxşaxəli münasibətləri səmərəli şəkildə təmin edə bilmir: "Müasir dünyada baş verən modernləşmə də məhz bu amili ehtiva edir. Bu baxımdan, adekvat hüquqi tənzimləmə mövcud olmadığı halda, əlbəttə ki, dinamik inkişafdan, davamlı sabitlikdən də söhbət gedə bilməz. Ölkə başçısı cənab İlham Əliyevin məhz bu zərurətdən çıxış edərək irəli sürdüyü "Azərbaycan Respublikasının Konstitusiyasında dəyişikliklər edilməsi haqqında" Azərbaycan Respublikasının Referendum Aktı layihəsi mahiyyətcə yeni inkişaf mərhələsinə qədəm qoymuş dövlətimizin yeni siyasi, iqtisadi, sosial, hüquqi gerçəkliklərlə tam uyğunlaşdırılması iradəsini nümayiş etdirir".
Cəbrail Fərzəliyev həmçinin qeyd edib ki, layihə Azərbaycanda dövlət quruculuğunun yeni mərhələsində ölkəmizin yeni inkişaf fəlsəfəsinin mahiyyətini özündə ehtiva edir: "Əminliklə söyləmək olar ki, zamanın tələbi və xalqın iradəsini əks etdirən siyasi hakimiyyətin təşəbbüsü ilə Azərbaycan Respublikası Konstitusiyasının yeniləşməsi ölkəmizin siyasi-iqtisadi, sosial-mədəni inkişafında yeni səhifə açacaqdır. Milli yüksəliş, siyasi sabitlik və davamlı inkişaf naminə sözügedən referendumda iştirak etmək və təklif olunan əlavə və dəyişiklikləri dəstəkləmək isə hər birimizin, xüsusilə də gənc nəslin vətəndaşlıq borcudur. Biz də gənc nəslin nümayəndələri olaraq səsvermə günü öz fəallığımızla Azərbaycanın daha mütərəqqi inkişafına "HƏ" deyəcəyik".
Rövşən Nurəddinoğlu
Bütün xəbərlər Facebook səhifəmizdə
USD
EUR
GBP
RUB