Azərbaycan Respublikası Milli Məclisinə keçiriləcək seçkilərlə əlaqədar Yeni Azərbaycan Partiyası (YAP) Mərkəzi Seçki Qərargahının şəhər və rayon şöbələri tərtib olunmuş plana və partiya rəhbərliyinin tövsiyələrinə uyğun olaraq hazırlıq işlərini uğurla davam etdirir. SİA-nın xəbərinə görə, bu gün YAP Mərkəzi Seçki Qərargahının Səbail rayon şöbəsində seçki qərargahı üzvlərinin seçkilərə hazırlıq işləri ilə əlaqədar toplantısı keçirilib.
Toplantıda YAP Mərkəzi Seçki Qərargahının Səbail rayon şöbəsinin sədri Şəmsəddin Hacıyev çıxış edərək qeyd edib ki, Azərbaycan Ulu Öndər Heydər Əliyevin siyasi kursunun layiqli davamçısı Prezident İlham Əliyevin rəhbərliyi ilə yeni inkişaf mərhələsinə qədəm qoyub: "Məhz bu inkişafın da təməlində partiyamızın böyük rolu var. YAP bu gün ölkənin həyatında olduqca böyük əhəmiyyət kəsb edən bir seçki kampaniyasına ciddi şəkildə hazırlaşır. YAP iqtidar partiyası olaraq öz işini daha fəal və güclü şəkildə qurmaqdadır. Çünki bizlər Prezident İlham Əliyevin siyasətini dəstəkləməklə dövlətimizin başçısının ətrafında sıx birləşmişik. Bu birlik, bu həmrəylik siyasi kampaniyalarda da özünü açıq şəkildə biruzə verir. İnanırıq ki, bütün seçkilərdə olduğu kimi parlament seçkilərində də Səbail rayon seçiciləri yekdilliklə iqtidar partiyasının namizədlərinə etimad göstərəcəklər. Qarşıdan gələn seçkilərdə hər birimizin üzərinə həm məsuliyyətli, həm də şərəfli vəzifələr düşür".
Ş. Hacıyev vurğulayıb ki, 31 nəfərdən ibarət seçki qərargahının tərkibinə Səbail rayonunda kifayət qədər nüfuzu olan rayon ziyalıları və ötən illərdə seçki sahəsində təcrübə toplamış insanlar, partiya fəalları daxildir: "Bu bizə olan etimadı doğruldacağımıza zəmin yaradır. Ona görə də düşünürəm ki, qarşıdakı dövrdə də seçki mərhələlərinin tələblərinə uyğun olaraq ardıcıl işlər görəcəyik".
Seçki qərargahının üzvləri də öz növbələrində YAP-ın bu seçkilərdə də qələbə qazanacağına əmin olduqlarını dilə gətiriblər.
Daha sonra iclasda seçki qərargahı üzvlərinə bundan sonra görüləcək işlər haqqında məlumat verilib.
İntizarə Məmmədova
Bütün xəbərlər Facebook səhifəmizdə
USD
EUR
GBP
RUB