Bu gün Gənclərin "Gənclərin Elmi Araşdırmalarına Dəstək" (GEAD) İctimai Birliyinin ofisində "Dünya azərbaycanlılarının həmrəyliyi: reallıqlar və perspektivlər" mövzusunda dəyirmi masa keçirilib. SİA-nın məlumatına görə, dəyirmi masanın qonaqları AMEA Ziya Bünyadov adına Şərqşünaslıq İnstitutunun əməkdaşı Əkrəm Rəhimli, Azərbaycan Respublikası Diasporla İş Üzrə DövlətKomitəsinin "Təbliğat, informasiya və analitik təhlil" şöbəsinin müdiri Elşad Miraləm və ASAİF-in Baş katibi Nəcibə Mustafayeva iştirak ediblər. Tədbiri giriş sözü ilə açan GEAD İctimai Birliyinin sədri, dosent Məmmədəli Babaşlı qonaqları salamlayaraq qarşıdan gələn dünya azərbaycanlılarının həmrəylik gününü təbrik edərək tədbir iştirakçılarına uğurlar arzu edib. Sonra qonaqlar mövzularını məruzə ediblər.
AMEA Ziya Bünyadov adına Şərqşünaslıq İnstitutunun əməkdaşı Əkrəm Rəhimli "Güney Azərbaycanda "21 Azər" hərəkatı" mövzusunda məruzə ilə çıxış edərək 1945-ci ildə Cənubi Azərbaycanda S. C. Pişəvərinin rəhbərliyi ilə qurulan Milli hökumətin fəaliyyəti ilə əlaqədar məlumatlar verib. Cənubi Azərbaycanın iki əsr boyunca yaşadığı olaylar nəticəsində düşdüyü sosial-iqtisadi və siyasi durumu üzərində dayanaraq, İran adlanan ölkədə sayı 35 milyon olan Azərbaycan türklərinin öncə şah, sonra da dini pərdə altında hakimiyyətə gələn şovinist fars rejimi tərəfindən milli və insani haqlarının əllərindən alınması, ana dilində təhsilə qadağa qoyulması, yer adlarının farslaşdırılması kimi gerçəkliklər də qeyd olunub. Ə. Rəhimli çıxışının sonunda Cənubi Azərbaycanda milli azadlıq hərəkatının bütün dünya azərbaycanlılarının tarixində böyük əhəmiyyətə malik olduğunu bildirib.
Elşad Miraləm "Azərbaycan Diasporunun müasir vəziyyəti və həyata keçirilən işlər" mövzusunda məlumat verərək xaricdə yaşayan azərbaycanlıların təşkilatlanma prosesindən söz açaraq, bu prosesin əsasən 1990-cı illərə yəni, ümummilli lider Heydər Əliyevin hakimiyyətə gəldiyi dövrlərə təsadüf etdiyini bildirib. Məhz bu dövrdən etibarən dünyanın müxtəlif ölkələrində yaşayan azərbaycanlılar təşkilatlanmağa başladığını və bu günə qədər də təşkilatlanma prosesinin davam etdiyini qeyd edib. Hazırda dünyanın bir çox ölkələrində 370-dən artıq Azərbaycan diaspora təşkilatı fəaliyyət göstərdiyini deyərək E.Miraləm məruzəsinin sonunda qeyd edib ki, Azərbaycanın diaspora təşkilatları dövlətimizin xarici siyasətinin uğurlu həyata keçirilməsində böyük rola malikdir.
ASAİF-in Baş katibi Nəcibə Mustafayeva "ASAİF təşkilatının diaspora fəaliyyətləri" mövzusunda çıxış edərək vurğulayıb ki, dünyanın dörd bir yanında ölkəmizin tanıdılması üçün keçirilən tədbirləri, diaspora və lobbiçilik fəaliyyətini hər zaman dəstəkləyən ASAİF, həmin tədbirlərin keyfiyyət və məhsuldarlığının artırılması üçün bu gün dünyanın 40 ölkəsində nümayəndələr vasitəsi ilə təmsil olunmaqdadır: "Dünyanın siyasi paytaxtlarında qlobal beynəlxalq forumlar təşkil edən ASAİF böyük bir beyin sərvəti olan azərbaycanlı gəncləri öz çətiri altında birləşdirmə məqsədi daşıyır. ASAİF hər hansı bir ixtisas və ya dar maraqlar çərçivəsinə xidmət edən təşkilat deyil, bütün gənclərin maraqlarını öz maraqları kimi qəbul edən, onlara bu sahədə dəstək göstərən, dövlət strukturları ilə gənclər arasında körpü rolunu məharətlə yerinə yetirən peşəkar bir təşkilatdır. ASAİF hər bir gəncin dilində danışa bilən və hər bir gənc azərbaycanlının özünü tapa biləcəyi bir təşkilatdır. Bu gün ASAİF sıralarında gənc həkimlər, politoloqlar, iqtisadçılar, psixoloqlar, hüquqşünaslar, genetiklər, mühəndislər, riyaziyyatçılar, bioloqlar, jurnalistlər və bir çox digər ixtisaslara malik peşəkar gənclər vardır. Bu gənclər təhsillərini dünyanın ən qabaqcıl ali təhsil ocaqlarında tamamlamış bir qismi isə hal hazırda davam etdirməkdədirlər".
Səmimi şəraitdə keçən görüşdə iştirakçıların suallarını cavablandıran məruzəçilər seminar iştirakçılarına mövzu ilə bağlı dəyərli tövsiyələr verərək hər bir Azərbaycan vətəndaşı üçün bu günün nə qədər əhəmiyyətli olduğunu bir daha bildiriblər.
GEAD İctimai Birliyinin sədri, dosent M. Babaşlı maraqlı məruzələrinə görə qonaqlara minnətdarlığını bildirib.
Bütün xəbərlər Facebook səhifəmizdə
USD
EUR
GBP
RUB
