Bu gün Quba şəhərində Azərbaycanın daxili işlər naziri general-polkovnik R.Usubovun və Rusiyanın daxili işlər naziri, ordu generalı R.Nurqalievin iştirakı ilə sərhədyanı regionlarda ictimai təhlükəsizliyin təmin edilməsi və transmilli mütəşəkkil cinayətkarlığa qarşı mübarizə işində razılaşdırılmış səylərin daha da fəallaşdırılması məsələlərinə həsr edilmiş müşavirə keçirilib.
Azərbaycan Respublikası Daxili İşlər Nazirliyinin mətbuat xidmətindən SİA-ya verilən məlumata görə, müşavirədə hər iki nazirliyin sahəvi operativ xidmətlərinin, ərazi üzrə polis və daxili işlər orqanlarının rəhbərləri iştirak ediblər.
Peşəkar qarşılıqlı əlaqələrin bir sıra prioritet məsələləri hərtərəfli müzakirə olunub, sərhədyanı ərazilərdə kriminogen vəziyyət təhlil edilib, bu istiqamətdə əməkdaşlığın vəziyyətinə prinsipial qiymət verilib, əlaqələrin inkişaf perspektivləri müəyyən edilib.
Nazirlər razılıq hissi ilə qeyd ediblər ki, sərhədyanı ərazilərdə ictimai təhlükəsizliyin təmin edilməsi üçün görülən praktiki təşkilati tədbirlərin səmərəliliyini artırmaq məqsədi ilə əvvəllər əldə edilmiş razılaşmaların həyata keçirilməsi istiqamətində xeyli iş görülüb. Müasir çağırışlara, beynəlxalq terrorizmin və transmilli mütəşəkkil cinayətkarlığın təhdidlərinə adekvat əks təsir təmin olunur. Bununla bərabər, asayişin mühafizəsi, insanın hüquq və azadlıqlarının qorunması, qanunun aliliyinin təmin edilməsi üzrə səyləri daha da fəallaşdırmağın zəruriliyi vurğulanıb.
Azərbaycan Respublikasının və Rusiya Federasiyasının Daxili İşlər nazirliklərinin sərhədyanı ərazilərdə polisin və daxili işlər orqanlarının qarşılıqlı fəaliyyətinin razılaşdırılması və əlaqələndirilməsi üzrə ixtisaslaşdırılmış işçi qrupunun işi və sentyabrın 19-dan 25-dək keçirilmiş "Sərhəd-Sipər" profilaktik əməliyyat tədbirlərinin nəticələri haqqında hesabat dinlənib.
Müzakirələrin yekunlarına əsasən, nazirlər müşavirənin Protokolunu imzalamış, sərhədyanı ərazilərdə həyata keçirilən məqsədyönlü antikriminal fəaliyyətin konkret praktik məzmun kəsb etməsi üçün hüquq mühafizə işinin yeni forma və metodlarından bundan sonra da istifadə etməyin zəruriliyini diqqətə çatdırıblar.
Müşavirə konstruktiv əməkdaşlıq və qarşılıqlı anlaşma ruhunda keçib.
Bütün xəbərlər Facebook səhifəmizdə
USD
EUR
GBP
RUB