Tariyel Qurbanov: “Peşə bayramının təsis edilməsi prokurorluq işçilərinin əməyinə verilən ən böyük qiymətdir” - MÜSAHİBƏ
1 oktyabr hər il ölkəmizdə prokurorluq orqanlarında çalışanların peşə bayramı kimi qeyd olunur. Baş Prokurorluqda olduğu kimi yerlərdə də əlamətdar günlə bağlı silsilə tədbirlər keçirilir. Bu məqsədlə Hacıqabul rayon prokurorluğunda olub, iş prinsipləri və fəaliyyətləri ilə maraqlandıq.
Hacıqabul rayon prokuroru Tariyel Qurbanovun SİA-ya müsahibəsi:
- Tariyel müəllim, prokurorların peşə bayramının təsis edilməsinin tarixi barədə məlumat verərdiniz.
- Bu, əbədiyaşar liderimiz Heydər Əliyevin təşəbbüsündən irəli gəlib. Ümummilli liderimiz bu günün təsis edilməsi barədə imzaladığı sərəncamla bugünkü prokurorluq işçilərinin və gələcəkdə bu peşənin məsuliyyətini üzərinə götürəcək vətəndaşlarımız üçün fəaliyyət proqramını hüquqşünaslarımıza ərməğan etdi. Bildiyiniz kimi Ulu öndərimiz Heydər Əliyev o zaman Azərbaycan Xalq Cümhuriyyətinin Nazirlər Şurasının 1 oktyabr 1918-ci il tarixli qərarı ilə Bakı Dairə Məhkəməsinin tərkibində prokurorluq orqanlarının fəaliyyətə başlaması tarixini əsas tutaraq hər il oktyabr ayının 1-nin Prokurorluq orqanlarında çalışanların peşə bayramı kimi qeyd edilməsi barədə 17 iyul 1998-ci il tarixdə sərəncam imzalayıb. Bu sərəncam bir daha onu sübut etdi ki, yenicə müstəqillik əldə etmiş dövlətimiz və xalqımız öz tarixi keçmişinə sadiqdir və illərdir həsrətində olduğu istiqlalına qovuşduqdan sonra güclü dövlət olaraq demokratik inkişaf yolu seçib sabaha doğru inamla addımlaya bilər. Bu çətin və keşməkeşli yolda təbii ki, ən əsas amil sabitliyin bərqərar olunması və hüquqi islahatlar həyata keçirərək qanun aliliyinin bərpası idi.
Yəqin ki, müstəqilliyimizin ilk illərində ölkəmizdə baş vermiş hadisələr, yaranmış vəziyyət o dövrün insanlarının yaddaşına əbədi həkk olub. Cinayətkar dəstələrin zərərsizləşdirilməsində və onların çirkin, xəyanətkar əməllərinin qarşısının alınmasında prokuroluq əməkdaşlarının xidmətləri böyük olub. Təbii ki, o zaman ölkə rəhbəri, ulu öndər Heydər Əliyevin siyasi iradəsi və tələbkarlığı hüquq-mühafizə orqanları əməkdaşları ilə yanaşı prokurorluq işçilərində də Azərbaycan xalqının xoşbəxt gələcəyi naminə vicdanla, cəsarətlə, qorxmadan çalışmağa həvəs yaratmışdı. Vətənimizin üzərindən qara buludların çəkilməsi və inkişaf yoluna qədəm qoyması Azərbaycan vətəndaşı olaraq bizlərin də məsuliyyətlə çalışmasına yol açdı. Bu günün təsis edilməsi, eyni zamanda prokurorluq işçilərinin əməyinə ümummilli liderimiz Heydər Əliyev tərəfindən verilən ən böyük qiymət idi.
- Bu gün bütün strukturlarda islahatlar uğurla həyata keçirilir. Prokurorluq orqanında aparılan islahatlar özünü hansı əlamətləri ilə biruzə verir?
- Prokurorluqda son dərəcə peşəkar, intellektual səviyyəli, təcrübəli, müasir hüquqi elmi biliklərə yiyələnmiş, baş verən cinayətləri təhlil edib açılmasını təmin edərək cinayətkarın üzə çıxarılmasını və əməlini sübuta yetirilməsini bacaran hüquqşunaslar fəaliyyət göstərir. Qeyd etdiyim parametrləri öz əməli fəaliyyətində nümayiş etdirən kadrların hazırlanmasında və sıralarımıza cəlb olunmasında rəhbərliyin danılmaz xidmətləri vardır.
- Yaradılan şərait əməkdaşlarınızı qane edirmi?
- Bütün sahələrdə olduğu kimi bizdə də əməkdaşların normal fəaliyyəti üçün Baş Prokurorluğun xətti ilə ən müasir üslubda inzibati binalar tikilərək, texniki avadanlıq və lazımı əşyalarla təmin edilib. Bizim Hacıqabul rayon prokurorluğunun binasında gördükləriniz dediklərimə əyani sübutdur.
- Tariyel müəllim, bilirik ki, siz Hacıqabul rayonuna yeni təyin olunmusunuz. Sakinlərlə əlaqəniz hansı səviyyədə təşkil olunub?
- Azərbaycan bu gün prezident İlham Əliyevin demokratik dəyərlərə söykənərək yürütdüyü siyasət nəticəsində bir çox beynəlxalq təşkilatlara üzv qəbul edilib, konvensiyalara qoşulub. Dövlətimiz həmin təşkilatların qarşısında üzərinə insan hüquq və azadlıqlarının qorunması öhdəliklərini götürüb. Bu prinsip əməkdaşlarımızın fəaliyyət meyarına çevrilib. Ona görə də Hacıqbul prokurorluğunda vətəndaşların qəbulu, şikayət və irəli sürdüyü təkliflərə hər zaman olduğu kimi bu gün də həssaslıqla yanaşılır. Lazım olan qərarlar qəbul edilir.
- Hacıqabulda baş verən hadisələrin xarakteristikası necədir?
- Üç aydır Hacıqabul rayonuna prokuror təyin olunmuşam. İlk gündən prokurorluğa daxil olan cinayət işləri və materiallarla tanış olanda bir azərbaycanlı kimi ürək ağrısı yaşamışam. Çünki təhlil etdiyim cinayət işlərinin əksəriyyətini narkotik vasitələrin vətəndaşlar tərəfindən qəbulu, satışı, saxlanılması təşkil edir. İndiyə qədər polis şöbəsinin istintaq bölməsindən prokurorluğa verilən məlumata görə, 17 cinayət işi başlanılıb. Prokurorluğun özündə 3 cinayət faktı və 4 material araşdırılır. Bu rayonda narkomaniyanın yayılmasının qarşısını almaq məqsədi ilə proflaktik tədbirlər planı hazırlayırıq. Əlaqədar təşkilatların iştirakı ilə gəncələr arasında geniş şəkildə təbliğat işinə başlayacağıq.
Bütün xəbərlər Facebook səhifəmizdə
USD
EUR
GBP
RUB