\"Kazan görüşünün nəticəsiz başa çatması o deməkdir ki, ermənilər Qarabağı dinc yolla geri qaytarmayacaqlar\"
Siyasi İnnovasiya və Texnologiyalar Mərkəzi "Qarabağ saatı" adlı növbəti mətbuat konfransı keçirib. Bu dəfə konfransın müzakirə predmeti Ermənistan-Azərbaycan, Dağlıq Qarabağ münaqişəsi, ATƏT-in fəaliyyəti və Kazan görüşü olub.
Mərkəzin rəhbəri, politoloq Mübariz Əhmədoğlu bildirib ki, Kazan görüşü Dağlıq Qarabağ münaqişəsinin tənzimlənməsində ən son mərhələ idi: "Bu görüşün nəticəsiz başa çatması, o deməkdir ki, ermənilər Qarabağı dinc yolla geri qaytarmayacaq və ermənilər Dağlıq Qarabağ münaqişəsinin dinc yolla həll olunmasını istəmirlər. Biz artıq bunu dərk etmişik. Bəs, görəsən ATƏT-in Minsk Qrupu və dünya bunu dərk edirmi? Hesab edirəm ki, bunu onlar da anlayırlar, sadəcə süründürməçiliklə məşğuldurlar".
M. Əhmədoğlu bu görüşü ATƏT-in Minsk Qrupunun fəaliyyətinin nəticəsiz yekunu adlandırıb: "18 ildir ATƏT-in Minsk Qrupu vasitəçiliklə məşğul olsa da, ortaya heç bir şey qoya bilməyib. İndən sonra bu fəaliyyət davam etsə də heç bir nəticəsi olmayacaq. Hazırda Azərbaycan sürətlə silahlanır. Gələn il Azərbaycanın hərbi büdcəsinin 3,5 milyard manata qədər artırılacağı gözlənilir. Bu isə təqribən 4,3 milyard dollar deməkdir. Bu silahlanma əvvəl-axır öz sözünü deyəcək. Bundan qaçmaq mümkün deyil. Birmənalı olaraq demək olar ki, ATƏT-in Minsk Qrupunun həmsədrləri Kazan görüşünün uğursuz alınmasının əsas səbəbkarıdır. Ona gərə də rəsmi Bakı ATƏT-in Minsk Qrupunu neytrallaşdırmalıdır".
M. Əhmədoğlu Ermənistanın Kazanda ortaq məxrəcə gəlməməklə özünü beynəlxalq aləmdə pis vəziyyətdə qoyduğunu da dedi: "Ermənistan Kazanda hər hansı sənədə imza atmaqla danışıqlar prosesində özünə yenı resurlar əldə edəcəkdi. Amma belə bir mövqe nümayiş etdirməklə bu imkanlardan məhrum oldu. Əgər Ermənistan növbəti dəfə BMT Təhlükəsizlik Şurasının qərarlarına riayət etməyəcəksə və ya qulaq ardına vuracaqsa, təbii ki, o zaman müharibənin qarşısını heç kim ala bilməyəcək".
Politoloq Kazan görüşünün nəticəsiz başa çatmasını Rusiya üçün də mənfi hal kimi dəyərləndirdi: "Ermənistanın qeyri-konstruktiv mövqe sərgiləməsi münaqişənin hərb yolu ilə həll olunmasını labüd edir".
Politoloq hesab edir ki, münaqişənin həll olunması istiqamətində Dağlıq Qarabağın azərbaycanlı və erməni icmaları arasında danışıqların aparılması vacibdir: "Ancaq nədənsə, ATƏT-in Minsk qrupu heç vaxt belə bir təkliflə çıxış etməyib. ATƏT-in Minsk qrupu Dağlıq Qarabağ münaqişəsinin həllindən başqa hər cür işlə məşğuldur. Bu zəmində Azərbaycan Dağlıq Qarabağ münaqişəsinin həll olunması istiqamətində radikal mövqe sərgiləməlidir".
Bütün xəbərlər Facebook səhifəmizdə
USD
EUR
GBP
RUB