Cavid Osmanov
YAP İdarə Heyətinin üzvü, Milli Məclisin deputatı
Azərbaycan və İtaliya uzun illərdir ki, strateji tərəfdaşlar kimi fəaliyyət göstərirlər. Bununla bağlı müvafiq Bəyannamə təqribən 10 il əvvəl qəbul edilib. Ölkələrimiz arasında əməkdaşlıq bir çox sahələri əhatə edir. Hər iki ölkənin müntəzəm siyasi təmasları mövcuddur. Yüksək səviyyəli təmaslar Azərbaycan və İtaliyanın yaxın siyasi tərəfdaş olduğunu nümayiş etdirir.
Sentyabrın 6-da “Dünya, Avropa və İtaliya haqqında bilgilər” mövzusuna həsr olunmuş Beynəlxalq Çernobbio Forumunda “Yeni geosiyasi şəraitdə Azərbaycanın rolu” adlı sessiyada çıxışı zamanı Prezident İlham Əliyev Azərbaycan-İtaliya münasibətlərindən geniş bəhs edib. Dövlət başçısı vurğulayıb ki, Azərbaycan İtaliyanın bir nömrəli neft və ikinci ən böyük qaz təchizatçısıdır. Həmçinin, İtaliya Azərbaycanın dünyada bir nömrəli ticarət tərəfdaşıdır. Ötən il ölkələrimizin ticarət dövriyyəsi 16 milyard ABŞ dollarına yaxın olub.
Forumda Prezident İlham Əliyev qeyd edib ki, müasir dövrdə
enerji təhlükəsizliyi milli təhlükəsizliyin ayrılmaz parçasıdır. Azərbaycandan İtaliyayadək uzanan, Cənub Qaz Dəhlizi adlanan 3500 kilometrlik inteqrasiya edilmiş boru kəməri sistemi bu gün 10 ölkənin enerji təhlükəsizliyini təmin edir. Həmin ölkələrin 7-si Avropa İttifaqının üzvüdür. Bu səbəbdən Avropa Komissiyası Azərbaycanı Ümumavropa qaz təchizatçısı və etibarlı tərəfdaş adlandırır.
Prezident İlham Əliyev bildirib ki, boru kəmərinin başlanğıcı Azərbaycandadır və İtaliyaya qədər uzanır. Ancaq marşrut boyu mövcud olan əlavələr və interkonnektorlar sayəsində bu kəmər geniş Avropa və Avrasiya coğrafiyasını əhatə edir. Burada artım üçün güclü potensial var.
İkitərəfli əlaqələrin enerji və ticarətlə məhdudlaşmadığını diqqətə çatdıran dövlət başçısı hazırda humanitar məsələlər üzərində də fəal şəkildə işlərin aparıldığını vurğulayıb. Artıq ölkəmizdə İtaliya-Azərbaycan Universiteti fəaliyyətə başlayıb və bu, əməkdaşlığın şaxələndirilməsinin gözəl nümunəsidir. İtaliyanın beş aparıcı ali təhsil ocağı – Luiss, Sapyensa, Bolonya, Milan və Turin universitetləri və onların Azərbaycandan olan tərəf müqabilləri bu müştərək təsisatı yaradıb. Bu, ölkələrimizin gələcək əməkdaşlığı üçün mühüm əhəmiyyət kəsb edəcək.
Azərbaycan və İtaliya arasında ikitərəfli münasibətlər qarşılıqlı etimad və hörmət, habelə qarşılıqlı maraqların nəzərə alınması üzərində qurulub. Bu münasibətlər bir-birindən uzaqda, fərqli qitələrdə yerləşən ölkələr arasında münasibətlərin necə qurulmalı olduğunun nümunəsidir.
Beynəlxalq Çernobbio Forumunda çıxışı zamanı Prezident İlham Əliyev Azərbaycan həqiqətlərinə də diqqət çəkib. Dövlət başçısı bildirib ki, təkcə Qafqazda deyil, daha geniş regionda baş vermiş ən böyük geosiyasi dəyişiklik Azərbaycanın ərazi bütövlüyünün və suverenliyinin bərpasıdır.
Beynəlxalq hüququn aliliyi o zaman təmin edilə bilər ki, burada hüquqi çərçivə ilə yanaşı, həmçinin cəsarət və real güc də var. Azərbaycanın beynəlxalq səviyyədə tanınmış əraziləri 30 il ərzində Ermənistanın işğalı altında idi. Beynəlxalq təşkilatların çoxsaylı qərar və qətnamələrinə, o cümlədən Ermənistan qoşunlarının torpaqlarımızdan dərhal çıxarılmasını tələb edən və hüquqi öhdəlik yaradan BMT Təhlükəsizlik Şurasının 4 qətnaməsinə baxmayaraq işğal davam etmişdir. ATƏT bu məsələ ilə məşğul olacaq xüsusi bir qrup da yaratmışdır və həmin qrup 28 il ərzində sıfır nəticə hasil etmişdir. Bu, onu nümayiş etdirir ki, ədaləti və sülhü təmin etmək üçün təkcə beynəlxalq hüquq kifayət deyil. Masa üzərində digər amillər də olmalıdır. Azərbaycanın işğal altında olan ərazilərinin böyük hissəsi 2020-ci ildə 44 günlük Vətən müharibəsi nəticəsində azad edildi. Lakin məsələ bununla bitmədi, çünki separatçılar Azərbaycanın suverenliyinə xələl gətirməyə davam edirdilər. Bu məsələdə sonuncu nöqtə ötən ilin sentyabr ayında qoyuldu və Azərbaycanın suverenliyi tam şəkildə bərpa edildi.
Prezident İlham Əliyev Çernobbio Forumunda onu da bəyan edib ki, Sovet İttifaqının süqutundan sonra ilk dəfə Cənubi Qafqazda sülhə nail olmaq mümkündür. Ölkəmiz öz nümunəsi ilə onu nümayiş etdirdi ki, beynəlxalq hüquq, güclü siyasi iradə, cəmiyyətin səfərbər olması və fiziki güc ciddi siyasi dəyişikliklə nəticələnə bilər. yap.org.az
Bütün xəbərlər Facebook səhifəmizdə
USD
EUR
GBP
RUB