Bu gün Gürcüstan parlamentinin sədri Şalva Papuaşvili bir neçə gün əvvəl prezident Salome Zurabişvilinin veto hüququnu ləğv etdiyi “Xarici təsirin şəffaflığı haqqında” qanun layihəsini imzalayıb. SİA xəbər verir ki, bu barədə “Sputnik” agentliyinin Gürcüstan xidməti məlumat yayıb.
Bu qanunda nəzərdə tutulur ki, maliyyə vəsaitinin 20%-dən çoxunu xaricdən alan qeyri-hökumət təşkilatları və media qurumları “xarici gücün maraqlarını güdən” təşkilat kimi qeydiyyatdan keçməlidirlər. Hüquqi şəxs 2023-cü il gəlirinə əsasən bu tələblərə cavab verirsə, bir ay ərzində xüsusi reyestrdə qeydiyyatdan keçməli və illik maliyyə hesabatını doldurmalıdır.
Qeydiyyatdan imtina və ya bəyannamənin müəyyən edilmiş müddətdə doldurulmaması 25.000 lari məbləğində cərimə ilə nəticələnir.
Qanuna görə, Gürcüstan Ədliyyə Nazirliyinin səlahiyyətli şəxsi istənilən vaxt xarici dövlətin maraqlarını güdən təşkilatları müəyyən etmək və ya onun tələblərinə əməl olunmasını yoxlamaq üçün məsafədən monitorinq keçirmək (məsələnin düzgün öyrənilməsi) hüququna malikdir. Gürcüstan hakimiyyəti qanunun QHT-lərin maliyyələşdirilməsində şəffaflığı təmin etmək məqsədi daşıdığını bildirir.
Gürcüstanda qanunun qəbulu hüquq-mühafizə orqanları ilə toqquşmaya çevrilən minlərlə nümayişə səbəb oldu.
ABŞ və Aİ xəbərdarlıq edib ki, qanunun qəbulu Gürcüstanın Avro-Atlantik inteqrasiyasını təhlükə altına qoya bilər.
Bütün xəbərlər Facebook səhifəmizdə
USD
EUR
GBP
RUB