Daxili İşlər Nazirliyi (DİN) Baş Narkotiklərlə Mübarizə İdarəsinin əməkdaşları külli miqdarda narkotik maddəni - 20 kiloqramdan çox tiryək və həşişi qanunsuz dövriyyədən çıxarıb. DİN-dən SİA-ya verilən məlumata görə, keçirilmiş əməliyyat-axtarış tədbirləri ilə Cəlilabad rayon sakini, 52 yaşlı Mirməmməd Həsənov 5 kiloqram narkotik maddə olan tiryəki 12 min ABŞ dollarına satarkən əməliyyatçılar tərəfindən yaxalanıb. Saxlanılan şəxsin Göytəpə kənindəki yaşadığı evə baxış zamanı əlavə olaraq 15 kiloqramdan çox tiryək və həşiş aşkarlanaraq götürülüb. Mirməmməd Həsənov narkotik maddələri İran İslam Respublikasının Yusif adlı vətəndaşından aldığını bildirib. Bir neçə il əvvəl İranda Yusiflə tanış olan Mirməmməd narkotik maddə alveri etmək təklifini alıb.
Qeyd olunub ki, bir müddət əvvəl İran İslam Respublikasının vətəndaşı Yusif müxtəlif tərkibli narkotik maddələri qaçaqmalçılıq yolu ilə Azərbaycana gətirərək Mirməmməd Həsənova verib. M. Həsənov tiryəklə həşişi yaşadığı evin həyətində gizlədib və satmaq üçün Yusifdən xəbər gözləyib.
Sonradan Yusif İrandan M. Həsənova zəng vurub və malın 5 kiloqramını satmağı tapşırıb. M. Həsənov alıcı ilə üz-üzə gəlməmək üçün idman çantasındakı tiryəki deyilən yerə qoyub bir qədər kənarda pulun verilməsini gözləyib. Bu zaman polis əməkdaşları onu yaxalayıb. Saxlanılan şəxs narkotik maddənin böyük hissəsini yaşadığı evin həyətindəki tövlədə bel çantasında gizlətdiyini etiraf edib. Həyətdə axtarış aparılıb və narkotik maddələr maddi sübut kimi götürülüb.
İstintaqla müəyyən olunub ki, saxlanılan şəxs əvvəllər də bir neçə dəfə İrandan göndərilən müxtəlif tərkibli külli miqdarda narkotik maddələri sataraq dövriyyə daxil edib. Faktla bağlı başlanmış cinayət işinin istintaqı davam etdirilir.
Bütün xəbərlər Facebook səhifəmizdə
USD
EUR
GBP
RUB