Nadir Əzməmmədov: "Ən çox sərnişin sıxlığı dekabrın 29-30-da müşahidə olunacaq"

"Dəmiryolu nəqliyyatında ən çox sərnişin sıxlığı dekabr ayının 29-da və 30-da müşahidə olunacaq". Bunu SİA-ya açıqlamasında "Azərbaycan Dəmir Yolları" Qapalı Səhmdar Cəmiyyətinin Mətbuat Katibliyinin rəisi Nadir Əzməmmədov bildirib.

Onun sözlərinə görə, QSC-nin Sərnişin daşımaları Departamentinin kollektivi qarşıdan gələn 31 dekabr - Dünya Azərbaycanlılarının Həmrəyliyi günü və Yeni illə əlaqədar yaranacaq sərnişin sıxlığına xidmət üçün gücləndirilmiş iş rejiminə keçib: "Növbəti günlərdə, xüsusilə dekabr ayının 29-da və 30-da sıxlığı aradan qaldırmaq üçün sərnişin qatarlarına hər gün 10-15, lazım olduqda isə 20-25 ədəd əlavə vaqonun qoşulması nəzərdə tutulub. Ənənəvi olaraq hər ilin son günlərində ən çox sıxlıq Bakı-Tbilisi sərnişin qatarında yaşanır ki, bunun da qarşısını almaq üçün qatara əlavə olaraq 10-15 vaqon qoşulacaq".

Nadir Əzməmmədov sərnişin qatarlarına bilet satışının 10 gün öncədən həyata keçirildiyini də deyib: "Əlavə vaqonlara isə bilet satışı həmin vaqon qatara qoşulan gün tətbiq olunur. Sərnişinlər gediş sənədlərini İnternet şəbəkəsi vasitəsilə "Online" rejimində də əldə edə bilərlər".

Bütün xəbərlər Facebook səhifəmizdə

loading...