Stolüstü tennisçilərimiz beynəlxalq turnirdə iki medal qazanıblar

Avqustun 20-də Macarıstanın Kişkunfeledhaza şəhərində Azərbaycanın yeniyetmə stolüstü tennisçilərinin də qatıldıqları mini kadetlər üçün təşkil olunmuş təlim-məşq toplanışı və beynəlxalq turnir başa çatıb. SİA-nın məlumatına görə, Avropa Stolüstü Tennis Birliyinin və Beynəlxalq Stolüstü Tennis Federasiyasının “Avrotalant” (İstedad axtarışı) layihəsi çərçivəsində keçirilən turnirdə Avropanın müxtəlif ölkələrindən 50-dən artıq idmançı beynəlxalq dərəcəli münsiflər heyəti qarşısında bilik və bacarıqlarını nümayiş etdiriblər.

Azərbaycanın yeniyetmələrdən ibarət yığma komandası turnirdə 6 idmançı (3 qız, 3 oğlan) ilə təmsil olunub. Qızlar arasında keçirilən yarışda Mərziyyə Nürmətova gümüş, Aylin Əsgərova isə bürünc medal qazanıblar. Komandamızın digər üzvü Arzu Aslanova isə turniri dördüncü yerdə başa vurub. Oğlanlar arasında mübarizə aparan Hüseyn Eylazov 5-ci, Adil Əhmədzadə isə 6-cı yerlə kifayətləniblər.

Qeyd edək ki, “Avrotalant” layihəsi çərçivəsində keçirilən turnir və təlim-məşq toplanışının məqsədi milli assosiasiyaların idmançıları arasında ən istedadlı gəncləri seçib onlara dəstək olmaqdır.

Bütün xəbərlər Facebook səhifəmizdə

loading...