Fransanın titullu cüdoçusu: "Bakıda yenidən dünya çempionu olmağa çalışacağam” - AÇIQLAMA - FOTOLAR

“Dünya çempionatına hazırlıq uzun müddətdir başlayıb. Yarış ilk dəfə olaraq sentyabrın sonlarına təsadüf edəcək. Ona görə də çox həyəcanlıyam”. SİA-nın məlumatına görə, bunu Fransanın qadın cüdoçulardan ibarət milli komandasının üzvü Klariss Aqbenyenu Bakıda keçiriləcək dünya çempionatına hazırlıq barədə danışarkən deyib.

63 kq çəki dərəcəsində çıxış edən titullu idmançı bildirib ki, yarışda əsas rəqibləri 2016-cı il Rio-de-Janeyro Yay Olimpiya Oyunlarının finalında uduzduğu sloveniyalı Tina Trstenyak və yaponiyalı Miku Tasiro olacaq: “Bütün rəqiblərimə hörmətlə yanaşıram. Amma Trstenyak və Tasiro ən güclüləridir. Bakıda yenidən dünya çempionu olmağa çalışacağam”.

Toqo əsilli Aqbenyenu Azərbaycan cüdoçuları haqda da fikirlərini bölüşüb: “Azərbaycanın kişi cüdoçulardan ibarət komandası həqiqətən çox güclüdür. Onların medal qazancaqlarını düşünürəm. Hamısına uğurlar arzulayıram”.

26 yaşlı Aqbenyenu 2014 və 2017-ci il dünya çempionatlarının qalibidir. Bu il İsrailin paytaxtı Təl-Əvivdə keçirilmiş Avropa çempionatının qızıl medalını qazanan xanım idmançı əvvələr də 2 dəfə qitənin ən güclüsü olub. O, “Bakı 2015” I Avropa Oyunlarında fərdi mübarizədə bürünc, qarşıq komanda yarışında qızıl medal qazanıb.

Qeyd edək ki, cüdo üzrə dünya çempionatı 20 - 27 sentyabrda Milli Gimnastika Arenasında təşkil olunacaq.

Müəllif: Elgün Vidadioğlu

Bütün xəbərlər Facebook səhifəmizdə

loading...