Qazaxıstanın Aktau şəhərində mitinq iştirakçıları çadırları söküb dağılışırlar. SİA xəbər verir ki, bu barədə Sputnik Qazaxıstan məlumat yayıb.
"Aktauda etirazçılar yurdları, çadırları sökərək dağılışırlar. "İntımak"ın mərkəzi meydanında etirazçılar çadırları sökür, dəmir konstruksiyaları, xalçaları daşıyıb aparırlar", deyə məlumatda bildirilir.
Etirazçıların çıxışları üçün səhnə kimi istifadə etdikləri ruporlu yük maşınının mərkəzi küçədən uzaqlaşdırıldığı da qeyd edilir. Meydanda 50-60 nəfər qalır. Onlardan yalnız üçü insanları “sona qədər dayanmağa” çağırır, qalanları mitinqlərdən sonra əraziləri bərpa edir, zibil yığır və tədricən dağılışırlar.
Xatırladaq ki, Qazaxıstanda kütləvi etirazlar 2022-ci ilin ilk günlərində başlayıb. Ölkənin qərbindəki Janaozen və Aktau şəhərlərinin sakinləri maye qazın qiymətinin iki dəfə artırılmasına qarşı çıxıblar. Daha sonra etirazlar digər şəhərlərə, o cümlədən köhnə paytaxt və respublikanın ən böyük şəhəri Alma-Ataya yayılıb. Orada qarətlər başlayıb, silahlılar dövlət qurumlarına hücum ediblər. Buna cavab olaraq hakimiyyət yanvarın 19-dək ölkə daxilində fövqəladə vəziyyət elan edib və terrorla mübarizə əməliyyatına başlayıb. BMT-nin məlumatına görə, Qazaxıstanda keçirilən etiraz aksiyaları zamanı 1000-ə yaxın insan xəsarət alıb. Respublikanın Daxili İşlər Nazirliyinin məlumatına görə, 18 təhlükəsizlik işçisi həlak olub.
Yanvarın 5-də səhər saatlarında Qazaxıstan prezidenti Kasım-Jomart Tokayev hökuməti istefaya göndərib və Təhlükəsizlik Şurasının rəhbəri olub. Onun rəhbərliyi altında keçirilən Təhlükəsizlik Şurasının ilk iclasında Tokayev Qazaxıstandakı vəziyyəti dövlətin bütövlüyünə zərbə vurmaq kimi qiymətləndirib və “terror təhlükəsinin aradan qaldırılmasında” KTMT-dən kömək istədiyini bildirib. KTMT-nin Kollektiv Təhlükəsizlik Şurası ölkədə vəziyyəti normallaşdırmaq üçün Qazaxıstana kollektiv sülhməramlı qüvvələrin göndərilməsi barədə qərar qəbul edib. Yanvarın 7-də Tokayev xaricdən gələnlər də daxil olmaqla terrorçuların müqaviməti davam etdirdiyini açıqlayıb və silahı yerə qoymayanları məhv edəcəyinə söz verib. Bundan əlavə, prezident qeyd edib ki, vətəndaşların dinc formada ifadə olunan bütün tələbləri dinlənilib.
Bütün xəbərlər Facebook səhifəmizdə
USD
EUR
GBP
RUB