ABŞ Prezidenti Cozef Bayden ilə Rusiya prezidenti Vladimir Putin arasında baş tutan telefon danışığında iki ölkə, xüsusən də Ukrayna münasibətlərində gərginliyə səbəb olan məsələlər müzakirə edilib.
SİA xəbər verir ki, Ağ Evin sözçüsü Cen Psaki 50 dəqiqəlik telefon danışığı ilə bağlı yazılı açıqlama verib.
Bəyanata görə, Bayden Putini Ukrayna ilə bağlı gərginliyi azaltmağa çağırıb.
Rusiyanın Ukraynaya qarşı mümkün hərbi addımı mövzusunda “Prezident Bayden açıq şəkildə bildirdi ki, Rusiya Ukraynaya daha çox müdaxilə edərsə, ABŞ və müttəfiqləri qətiyyətlə cavab verəcəklər” ifadəsinin yer aldığı bəyanatda Baydenin yanvarın 10-da başlayacaq ABŞ-Rusiya təhlükəsizlik danışıqlarına və yenə NATO ilə Rusiya arasında keçiriləcək dialoq prosesinə əhəmiyyət verdiyi vurğulanıb.
Putin və Bayden arasında baş tutan telefon danışığından sonra Kremlindən də açıqlama verilib.
Açıqlamada görüşün əsas mövzusunun iki liderin dekabrın 7-də onlayn təmaslarında müzakirə etdikləri Rusiya üçün təhlükəsizlik zəmanətləri olduğu qeyd edilib və Putinin NATO və ABŞ-a çatdırılan bu layihədəki “prinsipial yanaşmalara dair ətraflı izahatlarını” verdiyi vurğulanıb.
“Cozef Bayden Rusiya və ABŞ-ın Avropada və bütövlükdə dünyada sabitliyin təmin edilməsində xüsusi məsuliyyətini vurğuladı, ayrıca Vaşinqtonun Ukrayna torpaqlarına hücum silahları yerləşdirmək niyyətində olmadığını vurğuladı” ifadələri də açıqlamada yer alıb.
Açıqlamada Baydenin Ukraynadakı gərginlik artacağı təqdirdə Rusiyaya qarşı “genişmiqyaslı” sanksiyalar tətbiq etmək variantına Rusiya tərəfinin “bunun çox ciddi səhv olacağı, hətta Rusiya-Amerika münasibətlərinin tamamilə dayanma təhdidilə üzləşəcəyi” cavabını verdiyi qeyd edilib.
Liderlərin yeni il arzularını bir-birlərinə çatdırdıqları bildirilən açıqlamada “Ümumilikdə görüş səmimi və işgüzar xarakter daşıdı, təbii ki, hər iki tərəf üçün faydalı oldu. Ən yüksək səviyyədə müntəzəm təmasların davam etdirilməsi qərara alındı” deyilib.
Bütün xəbərlər Facebook səhifəmizdə
USD
EUR
GBP
RUB