"Görüşümüzün əsas mövzusu F-35 təyyarələri olacaq"

Prezident Rəcəb Tayyib Ərdoğan Azərbaycana bir günlük səfərindən qayıdarkən təyyarədə jurnalistlərə açıqlama verib.

"ABŞ Prezidenti Cozef Baydenlə Şotlandiyanın Qlazqo şəhərində görüşəcəyəm. Təbii ki, bu görüşdə bizim ən vacib məsələmiz F-35 (qırıcı təyyarələr) olacaq".

SİA xəbər verir ki, bunu Prezident Rəcəb Tayyib Ərdoğan Azərbaycana bir günlük səfərindən qayıdarkən təyyarədə jurnalistlərə açıqlamasında deyib.

Səfər zamanı Ərdoğan Azərbaycanın (30 ilə yaxın davam edən erməni) işğaldan azad edilmiş torpaqlarında apardığı yenidənqurma və abadlıq işlərilə yaxından tanış olduğunu, bölgədəki iqtisadi potensialın canlandırılmasına, nəqliyyat xəttlərinin islahatına və yenilərinin tikilməsinə dair işləri tədqiq etdiyini bildirib.

Azərbaycanın İsraillə ticari əməkdaşlığına İranın göstərdiyi reaksiyaları dəyərləndirən Ərdoğan ölkələrin bir-birlərinin qərar mexanizmlərinə təsir etməməsinin lazım olduğunu, İranın burada sağlam düşüncə ilə davranmasını istədiklərini vurğulayıb.

Prezident Ərdoğan məhbus Osman Kavalanın azadlığa buraxılması üçün 10 səfirin çağırış etməsi və daha sonra Türkiyənin reaksiyası ilə bağlı isə deyib ki, bizim atdığımız addım kiməsə güc nümayişi deyil, sadəcə olaraq, Türkiyədə çalışan səfirlərin Türkiyənin daxili işlərinə qarışmaması deməkdir. Hər hansı bir səfirin vəzifə icra etdiyi ölkənin daxili işlərinə müdaxilə etmək səlahiyyəti yoxdur.

Bu mövzuda ABŞ qəzetlərinin manşetlərini dəyərləndirən Ərdoğan deyib:

“Mənim kitabımda geri addım atmaq yoxdur”.

Ərdoğan ABŞ prezidenti Bayden ilə Qlazqoda keçirəcəyi görüşə toxunaraq deyib:

“Təbii ki, bu görüşdə bizim ən vacib məsələmiz; Bildiyiniz kimi, bizim F-35 məsələmiz var. F-35 üçün 1 milyard 400 milyon dollar vermişik. Bu ödənişlə bağlı təbii ki, biz onlarla onun bizə necə qaytarılacağını müzakirə etməliyik”.

Dövlət başçısı ABŞ-ın Türkiyəyə F-16-lar verməsi ilə bağlı bəzi məlumatlar əldə etdiyini ifadə edib.

Ərdoğan həmçinin bəyan edib ki, terrorla mübarizəni daxildə və sərhəddən kənarda qətiyyətlə davam etdirdiklərini söyləyib.

Müəllif: Ağasəf Babayev

Bütün xəbərlər Facebook səhifəmizdə

loading...