“Ən ağır yan təsir allergiyadır ki, bu da 50 mindən bir insanda təsadüf edilib” - “BioNTech” şirkətinin rəhbəri
Türkiyə yeni növ koronavirusa (COVID-19) qarşı Çinlə yanaşı, Almaniyanın “BioNTech” şirkətinin ortaqlığı ilə istehsal olunan peyvəndi də idxal edəcək.
SİA xəbər verir ki, Almaniya vətəndaşı olan türk əsilli həkim, akademik, immunoloq, onkoloq Uğur Şahinin də iştirakı ilə COVID-19-a qarşı hazırlanan peyvəndin Türkiyəyə ixrac ediləcəyilə bağlı xəbərdən alim məmnun olduğunu bildirib.
U.Şahin deyib ki, ana vətəni olan Türkiyəyə bu ilin sonuna qədər 550 min dozada peyvənd göndəriləcək. Mart ayının sonuna qədər 4,5 milyon peyvənd dozasının Türkiyəyə çatdırılması gözlənilir.
U.Şahin Türkiyə Səhiyyə Nazirliyinin tələbatı daxilində 30 milyon doza və daha artıq vaksinin bu ölkəyə göndərilməsinin mümkün olduğunu da qeyd edib.
Onkoloq U.Şahin “BioNTech” şirkətinin Türkiyədə ofisini açmaq və tibb sahəsində türkiyəli alimlərlə birgə tədqiqatlar aparmaq niyyətinin olduğunu da deyib: “Türkiyədə bir neçə universitetdə professorlarla əməkdaşlığa başladıq. Doğma vətənimdə xərçəng xəstəliklərinə qarşı da kliniki tədqiqatlar aparmağı düşünürük. İlk vaxtlar bir-iki layihəmiz uğurlu olarsa, biz bu tibb layihələrini Türkiyədə artıracağıq”.
Alim kasıb ölkələrə də COVID-19-a qarşı peyvənd yaymaq niyyətlərinin olduğunu deyib.
Qeyd edək ki, türk professorlar Uğur Şahin və onun xanımı Özlem Türeci tərəfindən qurulan Almaniyanın “BioNTech” şirkəti COVID-19-a qarşı “BNT162b2” peyvəndi hazırlayıblar. Dəyəri 20 milyard avro olan “BioNTech” dərman şirkətinin sahibi U.Şahin Almaniyanın ən zəngin 100 insanı arasında yer almaqdadır, 5,4 milyard dollarlıq şəxsi sərvəti ilə isə dünya zənginləri arasında 456-cı yerdədir və dünyanın ən zəngin türkü hesab edilir.
Bütün xəbərlər Facebook səhifəmizdə
USD
EUR
GBP
RUB